XIPANZE 9
Khozelani Jehova kota ngango
“Khizamelani loyi a nga maha tilo ni misava.” — Kuvululelwa 14:7
Kota lezi u zi wonileko ka broxura legi, a Biblia gi na ni matshinya yo tala ya milayo lawa ma to vuna wena ni ngango wa wena. Jehova i lava lezaku mu tsaka. I tsumbisa lezaku loku u rangisa a wukhozeli gakwe, “ku ta engetelwa ka nwina zontlhe lezi zilo.” (Mateu 6:33) A lisine hi lezaku yena i lava ku u maha munghana wakwe. Lonzowota a xikhati xihi ni xihi lezaku u hlakulela wunghana na Nungungulu. Lego i lungelo ga hombe ka wontlhe lawa a munhu a zi kotako kuva nawo. — Mateu 22:37, 38.
1 TIYISA A KUZWANANA KA WENA NA JEHOVA
LEZI A BIBLIA GI WULAKO: “Nzi tava Raru wa nwina, nwina mu tava a varisanyana ni vanhanyana va mina, ku wula Hosi” Jehova. (2 Va Le Korinte 6:18) Nungungulu i lava lezaku u maha munghana wakwe wa hombe. A yinwe ya tindlela ta ku hlakulela a wunghana lego ku khongela. Jehova i hi kuca hi magezu lawa: “Khongelani mu nga tsiki.” Yena wa xuva nguvu kuzwa lezi u nga nazo mbilwini a ku patsa ni zikarato za wena. (Va Le Filipi 4:6) Loku u maha mikhongelo na u hi zinwe ni ngango wa wena, vona va ta wona lezi Nungungulu a nga wa lisine ha zona ka wena.
Ahandle ka ku wulawula ntsena na Nungungulu, u fanele ku mu ingisa. U nga maha lezo hi ku gonza a Mhaka yakwe ni mabhuku ma seketelwako ka Biblia. (Tisimu 1:1, 2) Ehleketa hi lezi u zi gonzako. (Tisimu 77:11, 12) A ku ingisa Nungungulu zi patsa kuya mitlhanganweni ya wuKristu hi kukhanzakanya. — Tisimu 122:1-4.
A yinwani ndlela ya ku tiyisa a kuzwanana ka wena na Jehova ku wulawula hi yena ka vanwani. Laha u yako u zi maha nguvu, u ta tizwa na u tshinela nguvu ka yena. — Mateu 28:19, 20.
LEZI U NGA MAHAKO:
Ti siyele xikhati xa ku lera a Biblia ni ku khongela siku ni siku
Kota ngango, rangisani zilo za moya a ku hunza kutihungata
2 MAHANI WUKHOZELI GA NGANGO
LEZI A BIBLIA GI WULAKO: “Tshinelani ka Nungungulu, na yena i ta tshinela ka nwina.” (Jakobe 4:8) Mu fanele ku ti mahela a longoloko wa wukhozeli ga ngango go khanzakanya mu tlhela mu wu lanzela. (Genesisi 18:19) Kanilezi ka ha laveka zinwani. Nungungulu i fanele ku maha xipanze xa wutomi ga nwina ga siku ni siku. Tiyisa a kuzwanana ka ngango wa wena na Nungungulu hi ku wulawula hi yena “lomu ndlwini ka wena, ni lomu kuenzeni ka wena, ni kuetleleni ka wena, ni kuvukeni ka wena.” (Deuteronome 6:6, 7) Ti vekele kungo ga ku fana na Joxua, loyi a ngaku: “Mina ni ngango wa mina hi ta khozela Jehova.” — Joxua 24:15.
LEZI U NGA MAHAKO:
Ti maheleni longoloko wa kugonza lowu wu yelanako ni zilaveko za munwe ni munwani laha ngangweni