Xivuno Ka Mingango

1. Xana a Sabado gi wa yi vunisa kuyini a mingango ya vaIsraeli viki ni viki?

¹ A kuhlayiswa ka Sabado ku wa hi lulamiselo ga liranzo ga Jehova kasi ku vuna mingango. A vaIsraeli va wa humula mitirweni yabye ya siku ni siku kasi vava ni xikhati xa ku alakanyela a wunene ga Jehova va tlhela va alakanyela hi kuzwanana kabye naye. A vapswali va wa zi kota ku lonzowota a xikhati lexi kasi va zikisa a Nayo wa Jehova timbilwini ta vana vabye. (Deut. 6:6, 7) A Sabado gi wa nyika xikhati ka vanhu va Jehova viki ni viki lezaku va khatalela a wumoya gabye.

2. Xana a Sabado gi hi gonzisa yini ha Jehova?

² Lisine lezaku Jehova a nga ha lavi lezaku a mingango yi hlayisa a Sabado. Hambulezo, a nayo lowu wu hi gonzisa xo kari hi Nungungulu wa hina. Xikhati xontlhe i khatalela nguvu a kutshamiseka ka vanhu vakwe hi tlhelo ga moya. (Isa. 48:17, 18) Inyamutlha, a yinwe ya tindlela leti Jehova a kombisako ha tona a kukhatala loku ka liranzo Wukhozeli ga Ngango.

3. Hi gihi a kungo ga Wukhozeli ga Ngango?

³ Hi Gihi A Kungo Ga Wukhozeli Ga Ngango? Hi Janeiro wa 2009, a Xigonzo xa Bhuku xa Bandla xi lo sangula ku mahiwa hi xikhati xinwe ni Xikola xa Wutireli ga Nungungulu zinwe ni Mutlhangano wa Ntiro. A xinwe xa zigelo za kucica loku kuve ku nyika xikhati ka mingango kasi yi tiyisa a wumoya ga yona hi ku yimisa a siku ginwe viki ni viki lezaku yiva ni wukhozeli ga ngango. A ngango wunwe ni wunwani wu lo kuciwa ku cica a siku ga xigonzo xa ngango lezaku wu xi maha hi siku legi a kale va nga hi ni xigonzo xa bhuku, loku zi koteka, ni ku tirisa a xikhati lexo kasi ku bhulisana hi Biblia na va nga tsutsumi ni ku zwananisa a xigonzo ni zilaveko za ngango.

4. Xana a ngango wu fanele ku gonza hi hora yinwe ntsena? Tlhamusela.

⁴ Kasi kuva kona ka Xigonzo xa Bhuku xa Bandla, hi wa lava xikhati xa ku boha, ku enza, ni zinwani. A votala xikari ka hina va wa tirisa a xikhati xo tala xa siku lego na va ti longisela a kuya ka mutlhangano lowu wa hora yinwe. Lezi ku nga ciciwa zo kari ka longoloko wa hina wa mitlhangano, hi na ni siku legi kasi ku khozela Jehova kota Ngango. Hikwalaho, a hi kurumeteki ku maha Wukhozeli ga hina ga Ngango hi hora yinwe ntsena. Kuhambana ni lezo, hi fanele ku alakanyela hi zilaveko ni xiyimo xa ngango wa hina zonake hi boha ku hi ta mbheta xikhati muni.

5. Xana a xikhati xontlhe xi fanele ku mbhetwa ka ziwutiso ni mihlamulo? Tlhamusela.

⁵ Xana A Xikhati Xontlhe Xi Fanele Ku Mbhetiwa Ka Ziwutiso Ni Mihlamulo? A xikhati lexi a mipatswa ya vatekani ni mingango yi nga ni vana va bhulisanako hi Mitsalo hi ku tirisa a ziwutiso ni mihlamulo, va tiyisana. (Rom. 1:12) A ngango wa bohana. Hikwalaho, a kubhulisana hi ziwutiso ni mihlamulo ku fanele kuva xipanze-tshinya xa Wukhozeli ga Ngango. Hambulezo, a xiro xinwe ni xinwani xa ngango xi nga ha mbheta xikhati ka xigonzo xa munhu wutsumbu. Hi xikombiso, anzhako ka kubhulisana na va hi zinwe, a ngango wu nga ha simama zinwe na xiro xinwe ni xinwani xiya mahlweni xi gonza xoce, kuzilava na xi mbhetisa a ku vuxeta mitlhangano kutani ku gonza a marevista. A mingango yo kari yi hlawula a ku nga vululi a televizawu anzhako ka lezo.

6. Xana a xigonzo xi nga mahiswa kuyini?

⁶ Xana A Xigonzo Lexo Xi Nga Mahiswa Kuyini? A ku na xilaveko xa lezaku xikhati xontlhe a xigonzo lexi xi mahiwa hi ziwutiso ni mihlamulo. Kasi a Wukhozeli ga Ngango gi tsakisa, a mingango yo tala yi maha a longoloko wo fana ni lowu wa mitlhangano ya hina ya bandla. Va avanyisa a xigonzo xabye hi zipanze va tlhela va maha a zipanze lezo hi tindlela to hambanahambana. Hi xikombiso, vona va nga ha gonza zinwe a Biblia, va vuxeta a xipanze xo kari xa mitlhangano, kutani ku maha mukombiso wo kari va to wu tirisa sinwini. A mawonela manwani ma ka phajina 6.

7. Xana a vapswali va fanele ku ti karatela ku a ngango wu ti zwisa kuyini?

⁷ Xana A Vapswali Va Fanele Ku Ti Karatela Ku A Ngango Wu Ti Zwisa Kuyini? A ngango wa nwina wu ta gonza khwatsi loku wu kombiswa liranzo ni loku a ziro za wona zi rulile, zi nga karateki hi nchumu. Zikhati zinwani mu nga ha gonza lahandle loku a macela ma hi ma nene. Tanani na mu humula loku zi laveka. A mingango yo kari yi longisela za ku miyeta nyoka kasi ku khomisa nzeni anzhako ka xigonzo. Hambu lezi a vapswali va nga faneliko ku tirisa a Wukhozeli ga Ngango kasi ku bhongela kutani ku tsayisa a vana vabye, va nga ha tirisa a xikhati xo kari nzeni ka gona kasi ku wulawula hi xikarato kutani kubyekelela ko kari va ku wonako. Hambulezo, zi wa tava chukwana a ku wulawula ni n’wana xihundleni, hi xikhati xinwani, loku ku hi ni mhaka yo kari leyi yena wutsumbu a hoxisileko kasi a ngawi tingana loku a byeliwa mahlweni ka vamakabye vakwe. A Wukhozeli ga Ngango a gi faneli ku swira kanilezi gi fanele ku tsakisa, gi pimanyisa a Nungungulu wo tsaka loyi hi mu khozelako. — 1 Tim. 1:11.

8, 9. Xana a tihloko ta mingango ti fanele ku longisela yini?

⁸ Xana A Tihloko Ta Mingango Ti Nga Longiselisa Kuyini? A ngango wu ta vuneka nguvu loku a hloko ya ngango yi longisela a Wukhozeli ginwe ni ginwani ga Ngango na ka ha hi mahlweni hi ku boha lezi zi to gonziwa ni ndlela ya chukwana ya ku zi gonza. (Mav. 21:5) I chukwana a ku a nuna a kombisana ni sati wakwe xungetano hi mhaka leyi. (Mav. 15:22) Tihloko ta mingango, hikuyini mu nga tiko na mu wutisa lezi a vana va nwina va zi tsakelako a ku gonza? Loku mu maha lezo, mu ta zi tiva khwatsi lezi zi va tsakisako ni lezi zi va karatako.

⁹ Ka maviki yo tala, ku nga tava ni xilaveko xa lezaku a hloko ya ngango yi mbheta xikhati xo tala na yi longisela. Handle ko kanakana, hi maviki yo kari a ngango wu ta tsakela ku gonza hi ndlela yo fana niku ku nga tava na xilaveko xa lezaku a hloko ya ngango yita ni longoloko wuswa viki ni viki. A nga ha zi wona na zi bhinzula a ku tekela ku longisela a longoloko wa viki gi lanzelako zalezo va gumesako a ku gonza, na a ha zi alakanya khwatsi a zilaveko za moya za ngango wakwe. A tihloko to kari ta mingango ti tsala a longoloko wo koma zonake ti wu nameka laha a ngango wontlhe wu zi kotako ku wu wona. Lezo zi maha a ngango wu zi donela mari lezi zi to gonziwa wu tlhela wuva ni xikhati xa ku ti longisela, loku zi laveka.

10. Xana lava va hanyako voce va nga xi tirisisa kuyini a xikhati xa Wukhozeli ga Ngango?

¹⁰ Ahati Loku Nzi Hi Nzoce Ngangweni Wa Mina? Lava va hanyako voce va nga tirisa a xikhati xa Wukhozeli ga Ngango kasi ku ti mahela xigonzo xa munhu wutsumbu. A longoloko wu nene wa xigonzo xa munhu wutsumbu wu fanele ku patsa a ku gonza Biblia, ku longisela mitlhangano, ni ku gonza A Sentinela ni Despertai! Ahandle ka lezi, a vahuweleli vo kari va kambisisa a mhaka yo kari yo eta va yi hlawulileko. Ka zikhati zo kari va nga ha ramba a muhuweleli kutani ngango wo kari kasi ku tava ni mabhulo ma akako, ma seketelwako Mitsalweni.

11, 12. Hi wahi a mabhinzu yo kari ya kuva ni Wukhozeli ga Ngango hi kukhanzakanya?

¹¹ Hi Wahi A Mabhinzu Ya Ku Maha A Wukhozeli Ga Ngango Hi Kukhanzakanya? A ku khozela Nungungulu wa lisine hi mbilu yontlhe zi maha munhu a tshinela ka Jehova. Ahandle ka lezo, a mingango leyi yi khozelako zinwe yi tiyisa a kuzwanana ka yona. A patswa wo kari wa vatekani wu tsalile a magezu lawa xungetano hi mabhinzu lawa va ma kumako: “Kota patswa wa maphayona ma nga hiko na vana, hi gi rinzela hi mahlo yo pswhuka a siku legi hi mahako hi gona a Wukhozeli ga hina ga Ngango. Hi zi wona khwatsi lezaku a kuzwanana ka hina vambiri kuya ku engeteleka, niku hiya hi tizwa kusuhani nguvu ni Dadani wa hina wa le tilweni. Zalezi, loku gi chikela a siku legi hi gi vekeleko a ku gonza zinwe, hi wutisana lezi, ‘Hi nga dhumba, xini hi to maha nyamutlha? Wukhozeli ga Ngango!’”

¹² A lulamiselo ga kuva ni siku ga wukhozeli ga ngango ga vuna a mingango yi tshamako na yi khomekile kambe. A mamani wo kari a wundlako vana vambiri na a hi yece tlhelo phayona ga xikhati xontlhe i tsalile a magezu lawa: “A kale hi wa nga zi koti a ku maha xigonzo xa hina xa ngango hi kukhanzakanya hakuva nzi wa karele. Nzi wa nga xi tivi xo maha. Hikwalaho, nzi tsala a papilo legi kasi ku mu bonga nguvu hi kota ya siku ga Wukhozeli ga Ngango. Zalezi, ha zi kota kuva ni xigonzo xa ngango hi kukhanzakanya niku xa hi vuna.”

13. Xini xi to maha lezaku a ngango wa wena wu vuneka nguvu hi lulamiselo legi?

¹³ A ku fana ni Sabado, a siku ga Wukhozeli ga Ngango xinyikiwo xi tako hi ka Dadani wa hina wa le tilweni lexi xi vunako a mingango. (Jak. 1:17) A mingango ya vaIsraeli leyi nga gi tirisa khwatsi a Sabado yi wa vuneka nguvu hi tlhelo ga moya. Hi kufanana, loku hi tirisa khwatsi a siku legi hi nyikilweko ku maha hi gona a wukhozeli ga ngango, a mingango ya hina yi ta vuneka nguvu. (2 Kor. 9:6; Gal. 6:7, 8; Kol. 3:23, 24) Loku mu tirisa khwatsi a lulamiselo legi, a mingango ya nwina yi nga phindaphinda a magezu lawa ya mutsali wa Tisimu: “Kanilezi zi nzi sasekele a ku tshama kusuhi ni Nungungulu; nzi mahile Hosi Jehova a kuva wuchavelo ga mina.” — Tis. 73:28.

[Tlhamuselo wa mifota ka phajina 5]

A Wukhozeli ga Ngango a gi faneli ku swira kanilezi gi fanele ku tsakisa, gi pimanyisa a Nungungulu wo tsaka loyi hi mu khozelako

[Tlhamuselo wa mifota ka phajina 6]

XI HLAYISE

Tindlela To Kari Ta Ku Maha A Wukhozeli Ga Ngango

Biblia:

• Lerani zinwe a xipanze xo kari xa kugonza ka Biblia ka viki ni viki. Loku a xipanze xa kona xi fanela, cicisanani; a munwe wa nwina a nga ha gonza a magezu ya mutlhamuseli, lava vanwani va nga ha gonza a magezu ya lava vanwani va kumbukiwako ka xipanze lexo.

• Mahani a drama ya xipanzana xo kari xa Biblia.

• Avela a xiro xinwe ni xinwani xa ngango a zipimo zo kari za Biblia lezaku xi gonza na ka ha hi mahlweni xi tlhela xi tsala a xiwutiso xinwe kutani zimbiri zi fambelanako ni mhaka leyo. Hi ku lanzela, lavani zinwe a mihlamulo ya ziwutiso za munwe ni munwani.

• Viki ni viki longiselani a xiphephana xo kari, mu tsala a mutsalo wa Biblia ka tlhelo ginwe ni timhaka ta wona ka ginwani tlhelo zonake mu ti karatela ku wu tiva hi hloko ni ku wu tlhamusela. Hlayisani a ziphephana lezo mu tlhela mu zi vuxeta viki ni viki kasi mu wona a ku mitsalo yingani ma ha yi alakanyako.

• Ingiselani a timhaka to kari ta Biblia ti gravarilweko na mu kari mu lanzela lomu ka maBiblia ya nwina.

Mitlhangano:

• Longiselani zinwe a xipanze xo kari xa mitlhangano ya bandla.

• Vuxetani a tisimu ta Mufumo leti ti to yimbelelwa ka viki gi tako.

• Loku a wokari a hi ni kanelo ka Xikola xa Wutireli ga Nungungulu kutani mukombiso ka Mutlhangano wa Ntiro, nyikanani a mawonela ya lezi a to mahisa zona, kutani ku vuxeta a xipanze lexo mahlweni ka ngango.

Zilaveko Za Ngango:

• Gonzani a timhaka ka bhuku Os Jovens Perguntam kutani Aprenda do Grande Instrutor.

• Mahani mukombiso wa lezi mu nga hlamulisako zona a mhaka yo kari leyi yi nga ha mahekako xikoleni.

• Mahani mikombiso leyi a ka yona a vapswali ni vana va cicisanako a zipanze. A vana va kambisisa a mhaka yo kari zonake va bhulisana hi yona ni vapswali.

Wutireli:

• Mahani mikombiso ya zingheniso kasi ku zi tirisa kumbheleni ka viki.

• Bhulani hi mixuvo leyi a ngango wu nga ti vekelako kasi ku engetela a wutireli ga nwina nguveni ya Xialakanyiso kutani loku mu hi ni maferiya.

• Nyika a xiro xinwe ni xinwani xa ngango a xikhati xa ku kambisisa a mihlamulo ya ziwutiso zo hambanahambana lezi kuzilava mu to kumana nazo wutirelini zonake mu maha mikombiso ya mahlamulela ya kona.

Manwani Mawonela:

• Gonzani zinwe a nzima yo kari ya marevista ma ha hi ku humako.

• Ngha a xiro xinwe ni xinwani xa ngango xi gonza a nzima yo kari ya lomu ka marevista ma ha hi ku humako leyi yi mu djudjako kupima, zonake a wulawula hi yona.

• Tana na u ramba a muhuweleli kutani patswa wa vatekani lezaku u maha navo a Wukhozeli ga nwina ga Ngango kutani ku tlhela u va maha a ziwutiso zo kari.

• Wonani a yinwe ya mavidiyu ya hina mu tlhela mu bhulisana hi yona.

• Bhulisanani hi tinzima “Os Jovens Perguntam” kutani “Para Considerar em Família” lomu ka Despertai!

• Bhulisanani hi tinzima “Ensine Seus Filhos” kutani “Para os Jovens” lomu ka A Sentinela.

• Gonzani a xipanze xo kari xa Anuário mu tlhela mu bhulisana hi xona, kutani bhuku gi humesilweko ka gotsovanyano wa ha hi ku hunzako.

• Anzhako ka gotsovanyano kutani mutlhangano wa hombe, vuxetani a timhaka-tshinya ta wona.

• Ti nyikeni xikhati xa ku wona a zivangwa za Jehova mu tlhela mu bhula hi lezi zi hi gonzisako xungetano hi Jehova.

• Mahani zinwe a nchumu wo kari, wo kota ku tsala a mapa, kwadru, kutani ku maha xithombe xa nchumu wo kari.