A Xigonzo Xa Biblia Xa Munhu Wutsumbu Ni Xa Ngango Za Lisima!
1. Hi kwihi a kukhatala ka hombe loku a Hubye yi Fumako yi nga nako ha hina xikhatini lexi, niku hikuyini?
1 A ku fana ni ka zana ga malembe go sangula, a Hubye yi Fumako yi na ni kukhatala ka hombe hi kutshamiseka ka vanhu va Jehova. (Miti. 15:6, 28) Kota lezi a kuxaniseka ka hombe ku yako ku tshinela, za lisima nguvu lezaku a muhuweleli munwe ni munwani wa Mufumo ava ni kuzwanana ko tiya na Jehova. Xana u ta xi tirisisa kuyini a xikhati lexi a kale xi nga tiriselwa a Xigonzo xa Bhuku xa Bandla? Hontlheni ha kuciwa lezaku hi tirisa a xikhati lexi kasi ku khozela hi wungango. A ku tirisa a xikhati lexi hi wutlhari ku ta hi vuna a ku kela nguvu Mhakeni yi pimisilweko ya Nungungulu hi tlhela hikha ka yona a mati ma nyikako wutomi. — Tis. 1:1-3; Rom. 11:33, 34.
2. Xana a wukhozeli ga hina wutsumbu ni ga ngango ga ni gambo gi nga mahiswa kuyini?
2 Wukhozeli Ga Ngango Ga Ni Gambo: A tihloko ta mingango ti na ni wutihlamuleli mahlweni ka Jehova ga ku tiyisekisa lezaku ku lanzelwa a longoloko wa xigonzo xa Biblia xa ngango xi nga ni xigelo ni xo khanzakanya. (Deut. 6:6, 7) A vamakabye va xinuna ni va xisati va nga chadangiko ni ku nga hi na wutihlamuleli ga ngango, va ta zi kota ku tirisela a xikhati lexi ka xigonzo xa Biblia xa munhu wutsumbu ni kukambisisa. Za lisima a kuva hontlheni hi ‘tirisa khwatsi xikhati’ lezaku hi gonza ni ku ehleketa kasi hi simama na hi tiyile hi tlhelo ga moya hakuva a “masiku ma bihile.” — Efe. 5:15, 16.
3, 4. Hi wahi a mawonela ma nyikiwako xungetano hi mahungu lawa hi nga ha ma tirisako, niku na hi hi ni kungo muni?
3 Lezi Zi Nga Gonziwako: A Índice das Publicações da Torre de Vigia kutani Watchtower Library hi CD-ROM zi nga ku vuna ku kuma mahungu lawa ma ta nga maha a xigonzo xa nwina xa Biblia xi tsakisa. A mingango yi nga ha gonza a tinzima ti nga ka A Sentinela, to kota leti ti humako hi kukhanzakanya “Como Ter uma Família Feliz”, “Ensine Seus Filhos”, ni “Para os Jovens”. Ahandle ka leti, a Despertai! gi na ni xaxameto “Os Jovens Perguntam” ni tinzima to tsakisa ti wulawulako hi zihlamaliso za ntumbuluko.
4 A ku lera a Biblia na mu nga hi na xihatla zi nga zikisa matshinya ya milayo ya Nungungulu ni zigonzo mapinwini ni timbilwini ta vontlhe laha ngangweni. (Maheb. 4:12) Ka zikhati zinwani, mu nga ha bukela a mavidiyu ma mahiwako hi hlengeletano mu tlhela mu bhulisana hi wona. Wa zi kota ku alakanyela zo tala kuhlawuleni ka lezi zi to gonziwa ni magonzela ya zona. Hikuyini u nga wutisiko a ziro za ngango wa wena lezaku zi wa ta tsakiswa hi yini?
5. Hikuyini a xigonzo xo Biblia xa munhu wutsumbu ni xa ngango xi hi xa lisima nguvu wutomini ga hina zalezi?
5 Hikuyini Zi Nga Za Lisima Zalezi: A ku tiyisa a wumoya ga hina ku ta hi longisela a ku ‘yima hi wona a kuhanyisa ka Jehova.’ (Ekso. 14:13) A vapswali va na ni xilaveko xa ku rangelwa hi Nungungulu kuwundleni ka vana “xikari ka xizukulwana xi gombonyekileko ni xi bihileko.” (Fil. 2:15) A vanana va lava xivuno kasi va zi kota ku yimisana ni mahanyela ma yako mahlweni hi kubiha zikoleni inyamutlha. (Mav. 22:3, 6) A mipatswa yi maha khwatsi hi ku tiyisa a gota gabye na Jehova legi gi petsilweko kunharu. (Mutsh. 4:12) Makunu a hi tiriseni hi wutlhari a xikhati lexi xi seleko kasi hi ti aka ‘kukholweni ka hina loku ku basileko’ nguvu! — Juda 20.