Wukhozeli ga ngango — u nga gi maha gi tsakisa nguvu ke?

“Hi bhula yi nga chayi Wukhozelini ga hina ga Ngango laha kaku, a kutala ka zikhati gi famba kala phinzulani loku nzi nga tsemarisi a va ngango wa mina,” ku wula a raru wo kari le Brazil. A hloko yo kari ya ngango ya le Japani yi wula lezaku a mufanyana wakwe wa khume ga malembe ko khwatsi ne ni ku a xikhati xi fambile nguvu a nga xi woni. I lava lezaku a xigonzo xiya mahlweni. Hikuyini? A raru wa kona i wula lezi: “I na ni manyawunyawu ya ku lava ku tiva zotala, niku hi zona zi mu nyikako litsako.”

Kunene, a hi vanana vontlhe va nga ni manyawunyawu yo lava ku gonza, niku hi lisine, za koteka ku a vo kari va nga xalali hi wukhozeli ga ngango. Hikuyini? A raru wo kari wa le Togo i tlhamusela lezi: “A ku khozela Jehova a ku faneli ku kola.” Loku ku hi lezaku ka kola, xana wu ngava mbhanzu wa lezi a wukhozeli ga ngango gi fambisiswako zona ke? A mingango yo tala yi wona lezaku a wukhozeli ga ngango gi ngava “litsako” khwatsi hi lezi Isaya a nga zi wula xungetano hi Sabado. — Isa. 58:13, 14.

A vararu va nga maKristu va zi tiva lezaku kasi a mingango yabye yi kuma litsako wukhozeli ga ngango, vontlhe va fanele ku rula, va tshamiseka, va nga karateki. Ralf, loyi a nga ni vanhanyana vanharu ni mufana munwe, i wula lezaku a wukhozeli gabye ga ngango gi fana ni ku tshama hasi va ti bhulela; a gi wonekisi ku khwatsi xigonzo. Vontlhe va hlengela mabhulweni. Hakunene, a ku maha lezaku vontlhe va simama ku tsakiswa ni ku yisa kupima kabye ka lezi zi gonziwako za karata ka zikhati zo kari. A mamani wo kari i ngalo: “A hi xikhati xontlhe nzi nga ni ntamu wo maha wukhozeli ga ngango gi tsakisa kota lezi nzi zi lavisako zona.” Xana u nga hlula xikarato lexo?

KUOLOVA NI KUCICACICA

“Zi lava hiva vanhu vo olova,” ku wula a raru wa vanana vambiri le Alemanya. Natalia, a mamani wa vana vambiri i ngalo: “A nchumu wa lisima nguvu ngangweni wa hina kucicacica.” A mingango yo tala yi avanyisa wukhozeli gabye ga ngango hi zipanze zo tala. “A kucicacica ku maha lezaku a xigonzo xiva xo hanya ni lezaku a ziro zontlhe laha ngangweni zi hlengela ka xona,” ku tlhamusela Cleiton, a raru wa vana vambiri va nga tangeni yo nghena ndlwini le Brazil. Loku a vapswali va avanyisa a xikhati xa xigonzo, va ta zi kota a ku khatalela a zilaveko za n’wana ni n’wana maringano ni tangana yakwe. A vapswali va nga khatalela a zilaveko za xiro xinwe ni xinwani xa ngango va tlhela va olova kuhlawuleni ka lezi va to gonza ni magonzela ya kona.

Zini lezi a mingango yo kari yi zi mahako kasi yi simama ku cicacica? A yo kari yi sangula a wukhozeli gabye ga ngango hi ku yimbelela tisimu ka Jehova. Juan wa le México i ngalo: “A ku maha lezo zi vanga matshamela yo rula ni ku longisela maalakanyo ya hina ka lezi hi to gonza.” A ngango wakwe wu hlawula tisimu leti ti yelanako ni mahungu lawa ma to gonziwa siku lego.

A mingango yo tala yi gonza a xipanze xo kari xa Biblia kota ngango. Hi kota ya ku fela ku cicacica, a ziro zo tsalangana za ngango zi gonza a zipanze za Biblia hi kucicisana, a munwe ni munwani a lera timhaka ta munhu wo kari. A raru wo kari wa le Japani i ngalo “kusanguleni zi wa nonohanyana a ku lera Biblia hi ndlela leyo.” Kanilezi a vafanyana vakwe va vambiri va wa tsaka hi ku wona vapswali vabye na va maha lezo zinwe navo. A mingango yo kari yiza yi maha a drama ya mahungu ya Biblia. A vanana “a kutala ka zikhati va wona zilo lomu ka Biblia zaku hina vapswali a hi zi woni,” ku wula Roger, a raru wa vana vambiri le Afrika Dzonga.

A ndlela yinwani ya ku cicacica ku tira zinwe ka nchumu wo kari wo kota ku aka a mufananiso wa taru ga Noa kutani tempeli ya Solomoni. A mitiro leyo yi lava lezaku hi kambisisa. Kukambisiseni loko, hi nga pola zilo zo tsakisa nguvu. Hi xikombiso, laha saleni ya ngango wo kari le Asia ku wa hi ni nhanyana wa ntlhanu wa malembe ni vapswali vakwe zinwe ni kokwani wakwe. Va wo tsala kwadru go hlakana hi gona xungetano hi tipfhumba ta wurumiwa ta mupostoli Paule. A mingango yinwani yi tsala makwadru yo hlakana hi wona ma seketelweko ka matimu ma nga ka bhuku ga Eksodusi. Donald wa 19 wa malembe wa le Togo i ngalo: A kucicacica “ku nehile wutomi giswa wukhozelini ga hina ga ngango ni ka ngango wa hina wutsumbu.” Xana u nga alakanyela hi ntiro wo kari wu to maha lezaku a wukhozeli ga nwina ga ngango gi tsakisa nguvu ke?

A KU NA XO VALETA KU LONGISELA

Hambu lezi a kucicacica ni kuolova zi mahako wukhozeli ga ngango gi tsakisa, lezaku gi gonzisa, a ziro zontlhe za ngango zi fanele ku longisela. Ka zikhati zo kari a vanana va karala, hikwalaho a vararu va fanele ku sangula hi ku alakanyela lezi zi to gonziwa va tlhela va ti nyika xikhati xa ku longisela khwatsi. A raru wo kari i ngalo: “Loku nzi ti longisele, vontlhe va vuneka hi xigonzo.” A raru wo kari le Alemanya i tivisa ngango wakwe na ga ha hi mixo xungetano hi lezi va to zi gonza ka maviki ma tako. A xikhati lexi a hlawula DVD yo kari yi seketelweko ka Biblia kota xipanze xa wukhozeli gabye ga ngango, a raru wo kari a nga ni ntlhanu wa vana ni munwe le Benin i nyikela ziwutiso na ka ha hi ni xikhati. Hakunene, a ku longisela ku na ni xivuno xa hombe wukhozeli ga hina ga ngango.

Loku a va laha ngangweni va zi tiva na ka ha hi ni xikhati lezi zi to gonziwa, va nga bhula hi mhaka leyo kufambeni ka viki, hi ku maha loko va gi donela mari a wukhozeli lego. Ahandle ka lezo, loku a munwe ni munwani a hi ni xiavelo, i ta zizwa lezaku wukhozeli gakwe ga ngango.

TI KARATELENI A KU NGA XWISELI

Ku na ni mingango yo tala zi yi karatelako a kuva ni wukhozeli ga ngango yi nga xwiseli.

A vararu vo tala va tira xikhati xo leha kasi va kuma za kutihanyisa. Hi xikombiso, a raru wo kari le México i suka laha kaya hi 6 hora niku a nga wuyi kaya na ku nga seba a 20 hora. Tlhatakumbiri, ka tshuka kuva ni xilaveko xa ku cica siku kutani xikhati xa Wukhozeli ga Ngango hi kota ya mutlhangano munwani wa moya.

Hambulezo, hi fanele ku khoma zi tiya kasi hiva hi wukhozeli ga ngango hi kukhanzakanya. Loïs, wa 11 wa malembe le Togo i wula lezi xungetano hi kutiyimisela ka ngango wabye: “Hambu lezi ka zikhati zo kari hi kurumetekako ku sangula a wukhozeli ga hina na hora yi hunzile hi kota ya zokari zi nga humelela kufambeni ka siku, a hi tshuki hixwa na hi nga mahangi a wukhozeli ga ngango.” Makunu wa xi wona xigelo xa kuva a mingango yo kari yi yimisa siku ga wukhozeli gabye ga ngango kusanguleni ka viki. Loku ku humelela zo kari hi xitshuketi, ya zi kota a ku maha wukhozeli gabye ga ngango ka siku ginwani nzeni ka viki lego.

Khwatsi hi lezi a vito ga kona ha goce gi zi kombako, a “wukhozeli ga ngango” xipanze xa wukhozeli ga wena ka Jehova. Ngha a ziro zontlhe za ngango wa wena zi neha ‘muphahlo ka Jehova hi milomu yabye’ viki ni viki. (Hos. 14:2) Ngha a wukhozeli ga ngango giva xikhati xo tsaka ka munwe ni munwani laha ngangweni, “hakuva a litsako la Jehova i ntamu wa nwina.” — Neh. 8:9, 10.