Jesu a tira le Galileya a tlhela a ruma vapostoli va ya chumayela

Ka nguva leyo ku wa hundza cipimo ca malembe mambiri Jesu na a chumayela yi nga chayi. Ku ngava lezvaku makunu ci wa hi cikhati ca ku a tshama a ku ge, a humula? Ahihi. I no ya mahlweni a tira nguvhu, a “ndzulandzula mitini yontlhe ni zvimitaneni [zva Galileya], a gondzisa masinagogeni, na a kanela Ivhangeli ya Mufumo, a chuma tontlhe tixaka ta tinghumbe ni tixaka tontlhe ta mababyi.” (Matewu 9:35) Lezvi a nga zvi wona, zvi no mu maha a zwisisa lezvaku zva ha laveka ku a andzisa ntiro wa kuchumayela. Makunu, i wa ta zvi mahisa kuyini?

Laha a nga kari a fambafamba, i no wona vanhu va nga fanele ku vhuniwa ni ku chavelelwa hi tlhelo ga moya. Va wa fana ni tiyivhu ti nga kari ti pepetseka, ti xaniseka ti huma ni zvilondza hi ku vhumala murisi. I no va zwela wusiwana, a byela vapizani vakwe aku: “A kutshovela ka hombe nguvhu, kanilezvi a zvitiri zvi tsongwani. Hikwalaho kombelani a Hosi ya kutshovela, lezvaku yi rumela a zvitiri kutshoveleni ka yona.” — Matewu 9:37, 38.

Jesu i wa yi tiva ndlela ya ku va vhuna. Hikwalaho, i no vitana vapostoli vakwe va 12, a va ava hi vambiri vambiri kasi a va ruma ku ya chumayela. I no va nyika zvileletelo zvo dlunyateka, aku: ‘Mu ngayi ka vamatiko, hambu ku nghena ka muti wa vaSamariya. Kanilezvi yanani ka tiyivhu ti lahlekileko ta yindlu ya ka Izrayeli. Kufambeni ka n’wina kanelani muku: A Mufumo wa tilo wu tshinele.’ — Matewu 10:5-7.

A Mufumo lowu va nga fanele ku chumayela, hi walowu Jesu a nga wulawula hi wona a cikhati a nga va gondzisa ku khongela. Makunu ‘a Mufumo wu wa tshinele’ hi ndlela muni? Hi lezvaku Jesu Kristu — a Hosi yi hlawulilweko hi Nungungulu — i wa hi kona. Cini ci nga wa ta tiyisekisa lezvaku hakunene a vapizani va Jesu va wa yimela Mufumo wa Nungungulu? Jesu i no va nyika ntamu kasi va hanyisa vababyi va tlhela va vhuxa vafileko; zvontlhe lezvo va wa fanele ku zvi maha mahala. Makunu, a vapostoli va wa ta zvi kuma kwihi zva ku ti hanyisa, zvo kota zvakuga ke?

Jesu i no byela vapizani vakwe lezvaku va nga teki nchumu. Va wa nga faneli ku teka ouro, ni silivha, kutani suku lomu ka zvipachi zvabye; ne ku teka zvakuga hambu tinguwo to cica kutani zvilato lomu ka tipaxta tabye. Hikuyini? I no va byela lezvi: “A citiri ci fanelwe hi kuga ka cona.” (Matewu 10:10) Lava va nga wa ta va amukela va tlhela va tsakela lezvi va nga chumayela va wa ta va hlayisa. Jesu i no va byela lezvi: ‘Kani hi kwihi laha mu nghenako lomu ndlwini, tshamani kona mu kala mu suka wutshan’wini lego.’ — Marku 6:10.

Jesu i no tlhela a va tlhamusela lezvi va nga fanele ku tirisa zvona loku va chumayela a mahungu ya Mufumo. I naku: ‘Laha na mu nghenile ndlwini mu ta yi losa. Loku a yindlu yi fanele, a kurula ka n’wina a ku tshame ka yona; kanilezvi loku yi nga faneli, ngha kurula ka n’wina ku tlhelela ka n’wina. Kani hi wihi a ta nga kala ku mu amukela, hambu ku ingisa a timhaka ta n’wina, a cikhati mu humako ka yindlu leyo kutani muti lowo, phuhunhani a ntshuri wa mikondzo ya n’wina.’ — Matewu 10:12-14.

Hambu vanhu va dhoropa gontlhe va wa ta tshuka va nga ma tsakeli a mahungu lawa a vapizani va nga kari va chumayela. Zvini zvi nga wa ta humelela vanhu va dhoropa lego? Jesu i kombile lezvaku va wa ta lamuliwa hi ndlela yo bayisa nguvhu. I te: “Hizvinene ndziku ka n’wina: Hi siku ga kulamula a kutsayiswa ka muti [“dhoropa”, NM] lowo ku ta hundza ka Sodhoma ni Gomora.” — Matewu 10:15.