Jesu a cica misava yiva paradhise a ku fana ni kusanguleni

Zvalezvi Jesu a nga bhabhatiswa, i no tekela ku lwisana ni nala a nga zama hi tindlela tontlhe kasi a mu pengisa ne na a nga se sangula ku tira. Sathani i ringile Jesu hi kuphindaphinda futsi. Hi kufamba ka cikhati, Jesu i wulile lezvi xungetano hi nala loye wa bihela ga cima: “A hosana ya tiko legi yata, hambulezvo a yi na ntamu ka mina.” — Johani 14:30, NM.

Ka muwoniso wo kari, mupostoli Johani i wonile lezvi zvi nga wa ta humelela “drako loyi wa hombe, a nga nyoka leyi ya kale, yi tibyako Muhlevi na Sathani”. A nala loye wa hombe wa vanhu i wa ta hlongoliwa le tilweni, ‘na a zangarile nguvhu, hi ku tiva lezvaku a cikhati leci ci mu saleleko ci tsongwanyani.’ (Kuvhululelwa 12:9, 12) A maKristu a ma na cigelo ca ku kanakana lezvaku zvezvi ma hanya ka ‘cikhati leco ca ci tsongwanyani’, ni lezvaku zvezvanyana “drako loyi wa hombe, a nga nyoka leyi ya kale,” i ta bohiwa a vhalelwa nkeleni wa lieswila, a tshama lomo hi 1000 wa malembe, Jesu na a kari a fuma Mufun’weni wa Nungungulu. — Kuvhululelwa 20:1, 2.

Ndzeni ka cikhati leco, zvini zvi to maheka laha misaveni — a muti wa hina? Himani a to hanya kona, na ku hi ni matshamela muni? Jesu i hlamulile ha yece. Ka mufananiso wakwe wa tiyivhu ni timbuti, i kombile lezvi zvi to humelela vanhu vo lulama va hanyako kota tiyivhu, lava va tirisanako ni vamakabye vakwe va tlhela va va mahela zva zvi nene. I tlhelile a komba lezvi zvi to humelela lava va kalako va nga zvi mahi lezvo, lava vo fana ni timbuti. I te: “Ni lava [a timbuti] va taya kutsayisweni ka pindzukelwa; kanilezvi a valulamileko [a tiyivhu] va taya wutomini ga pindzukelwa.” — Matewu 25:46.

Lezvo zvi hi vhuna ku zwisisa lezvi Jesu a nga byela cigevenga leci ci nga hi tlhelweni gakwe laha mhandzeni. Jesu a nga ci tsumbisangi zvo fana ni lezvi a nga tsumbisa vapostoli vakwe vo tsumbeka, zva ku va tava naye Mufun’weni wa tilo. Kanilezvi, i tsumbisile cigevenga leco ci nga ti sola, aku: “U tava na mina Paradhiseni.” (Luka 23:43) Hi magezu lawo, Jesu i no tsumbisa wanuna loye lezvaku i ta hanya Paradhiseni — ku nga parki, kutani jardhim yo saseka. Kunene, laha Jesu a to lamula vanhu cikhatini ci tako, lava va to kumeka va hi tiyivhu va tlhela va kuma ‘wutomi ga pindzukelwa’, vonawu va ta hanya Paradhiseni lego.

Lezvo zvi yelana khwatsi ni lezvi mupostoli Johani a nga tlhamusela xungetano hi lezvi a zvilo zvi to tshamisa zvona laha misaveni cikhatini leco. I te: ‘A tabhernakeli ga Nungungulu gi kona cikari ka vanhu; i ta tshama navo, vona va tava vanhu vakwe, ina Nungungulu wutsumbu i tava navo, ava Nungungulu wabye. I ta kulula mihloti yontlhe mahlweni yabye. Ku nga ta hava kona kufa, hambu ni hlomulo, kutani kurila ni kubayisa; hakuva a zvilo zvo sangula zvi hundzile.’ — Kuvhululelwa 21:3, 4.

A cigevenga leco ci ta vhuxiwa hi ka vafileko kasi ci ti buza hi wutomi lego Paradhiseni. Ku ta vhuxiwa vanhu van’wani kambe. Jesu i yi dlunyatisile khwatsi a mhaka leyi laha a ngaku: A “cikhati ca hata, laha vontlhe va nga le zvilahleni va ta ngazwa a gezu gakwe, va huma; lava va mahileko kusaseka, va vhuka a kuya wutomini; ni lava va mahileko kubiha, va vhuka vaya kulamulweni.” — Johani 5:28, 29.

Makunu, ahati a vapostoli va Jesu vo tsumbeka ni vanhu van’wani va va tsongwani lava va tova naye le tilweni ke? A Bhibhiliya gile: “Va tava vapristi va Nungungulu ni va Kristu, va ta fuma naye 1000 wa malembe.” (Kuvhululelwa 20:6) Handle ko kanakana, lava va to fuma na Kristu le tilweni va tava tihosi ti nga ni tipswalo va tlhela va va zwisisa khwatsi lava va to hanya laha misaveni, hakuva vonawu va ranga hi ku hanya kwalaha kota vavanuna ni vavasati. — Kuvhululelwa 5:10.

Jesu i ta tirisa ndzhiho wakwe kasi ku vhuna vanhu laha misaveni, a va tlhatlhisa ka ciwonho ca mabeleko. Yena ni lava a to fuma navo va ta vhuna vanhu vo tsumbeka lezvaku va mbhelela. Cikhatini leco, a vanhu va ta ti buza hi wutomi legi Nungungulu a nga lava ku va gi hanya kusanguleni, a cikhati a nga byela Adhamu na Evha lezvaku va pswalelana. A vanhu kambe va nga ta hafa hi ciwonho va ci kumileko ka Adhamu!

Ka ciyimo leco, Jesu i tava a mbhetile ntiro wontlhe lowu Jehovha a mu rumileko ku wu maha. Loku Jesu a fumile hi 1000 wa malembe, i ta hendleleta Mufumo ni vanhu vo mbhelela ka Papayi wakwe. Mupostoli Pawule i wulawulile hi zvilo lezvo zvo ti koramisa lezvi Jesu a to zvi maha. I te: ‘Loku zvilo zvontlhe zvi vekilwe lahasi kakwe, na yena N’wana i ta vekiwa lahasi ka loyi a vekileko zvilo zvontlhe lahasi kakwe, kasi Nungungulu ava zvontlhe ka vontlhe.’ — 1 Va Le Korinte 15:28.

Zvi la su dlunya lezvaku Jesu i maha ntiro wa lisima kasi ku tatiseka makungo ya ma nene nguvhu ya Nungungulu. Laha a makungo lawo ma to simama ku tatiseka hi kupindzuka ni kupindzuka, zvi ta tatiseka khwatsi lezvi Jesu a zvi wulileko hi yena n’winyi, aku: “Mina ndzi ndlela, ni lisine, ni wutomi.” — Johani 14:6, NM.