XIPANZE XA WUNHARU
Kukhunguvanyiswa — Loku u “hi ni xisolo”
A makabye wo kari wa xisati wa bandla ga mina i lo nzi lumbeta ku ngha nzi mu yivele mali. A vanwani lomu bandleni va lo tiva a mhaka leyo zonake va sangula ku yima ni munwe wa hina. Hi kugumesa, a makabye loyi a nga nzi lumbetile i lo nzi byela lezaku i byelilwe mahungu maswa ma kombako lezaku a nzi yivangi mali yakwe. A xikhati lexi a nga kombela kutsetselelwa, nzi ti zwisile ku khwatsi nzi wa nga ta tshuka nzi mu tsetselela hi kota ya zontlhe lezi a nga wa nzi mahele.” — Linda.
XANA wenawu u tshuka u humelelwa hi lezi zi nga humelela Linda, loyi a nga khunguvanyiswa nguvu hi zimaho za muKristu-kuloni? Lexi xi nga tsakisiko hi lezaku a vokari va khunguvanyisilwe nguvu hi mahanyela ya vanwani laha ka kuza va lahlekelwa hi ntamu wa ku maha mitiro ya moya. Xana wenawu zi ku mahekele lezo?
Xana i kona loyi a nga zi kotako “ku hi hambanyisa ni liranzo la Nungungulu”?
Kasi ku wula lisine, zi nga ha hi karatela nguvu ku tsetselela mukholwa-kulori loyi a hi khunguvanyisileko. Hakuva a maKristu ma fanele ku ranzana. (Johani 13:34, 35) Loku hi onhelwa hi muKristu-kulori, a kukhunguvanyeka ni kubayisa loku hi ku zwako ku ngava ka hombe nguvu. — Tisimu 55:12.
Kunene, a Biblia ga vumela lezaku ku na ni zikhati lezi a maKristu ma nga “ni xisolo” ka manwani. (Va Le Kolosi 3:13) Kanilezi, loku lezo zi humelela hina wutsumbu zi nga ha hi karatela nguvu a ku yimisana nazo. Xana ku na ni xokari xi nga hi vunako mhakeni leyi? Wona a matshinya manharu ya milayo ya Biblia lawa ma nga hi vunako:
A Papai wa hina wa le tilweni wa zi wona zontlhe. Jehova wa zi wona zontlhe lezi zi hi humelelako, a ku patsa ni wubihi legi hi mahelwako ni kuxaniseka ku tako hi kota ya wubihi lego. (Maheberu 4:13) Tlhatakumbiri, Jehova wa bayisekawu a xikhati lexi hi xanisekako. (Isaya 63:9) A nga tshuki a vumelela a “kukarateka, kutani hlomulo” kutani nchumu wunwani — ge hambu a nanza go kari gakwe — lezaku zi “hi hambanyisa ni liranzo la Nungungulu.” (Va Le Roma 8:35, 38, 39) Xana a hi kuceki ku maha zo fana ni lezo, hi nga vumeleli nchumu ge hambu munhu lezaku a hi hambanyisa na Jehova?
A ku tsetselela a zi wuli lezaku wa tsakiswa hi zilo za kubiha. A ku tsetselela lava va hi onheleko a zi wuli lezaku ho kalala a zihoxo zabye, ho zi yimelela kutani ku ho tsakiswa hi lezi va zi mahileko. Alakanya lezaku Jehova a nga xalaliswi hi xionho hambulezo wa tsetselela loku ku hi ni xigelo xo zwala xa ku maha lezo. (Tisimu 103:12, 13; Habakuka 1:13) A xikhati lexi Jehova a hi kucako lezaku hi tsetselela vanwani, hi lisine o hi kombela lezaku hi mu pimanyisa. Hakuva yena a nga ‘zangari kala kupinzuka’. — Tisimu 103:9; Mateu 6:14.
A ku nga veki xiviti za hi vuna hina wutsumbu. Hi ndlela muni? Hi nga alakanyela a mufananiso lowu: U rola ribye, kuzilava gi binzako a tikilo titsongwani ntsena, u gi khoma hi mandla. Kuzilava zi nga ta ku karatela ku gi welela hi xikhatanyana. Kanilezi, ahati loku u lava ku simama xikhati xo leha na u gi welele? Xana u ta gi welela hi xikhati xo chikela kwihi — xana u ta gi welela hi timeneti to kari ntsena? hora? kutani ni ku hunza? Handle ko kanakana a woko ga wena gi ta karala nguvu! Lisine lezaku a kubinza ka ribye a ku cicangi, kanilezi a ku gi welela hi xikhati xo leha hi zona zi ku mahako uzwa nguvu a kubinza ka gona. Lezo hi zona zi humelelako loku a munhu a vekela munwani xiviti. Loku hi simama ku vekela vanwani xiviti — hambu loku xi hi xitsongwani — hi ta ti vangela kubayisa ka hombe nguvu. Hikwalaho, a zi hlamalisi lezi Jehova a hi kucako a ku nga vekeli vanwani xiviti. Kunene, a ku nga vekeli vanwani xiviti zi vuna hina wutsumbu. — Mavingu 11:17.
A ku nga veki xiviti zi vuna hina wutsumbu
Nzi ti zwisile ku khwatsi Jehova o wulawula na mina hi kukongoma”
Xini xi vunileko Linda a ku nga vekeli xiviti a mukholwa-kulobye? A xinwe xa zilo zi mu vunileko ku ehleketa hi zigelo za mitsalo kasi ku rivalela vanwani. (Tisimu 130:3, 4) Linda i khumbilwe nguvu hi ku tiva lezaku loku hi tsetselela vanwani Jehova yenawu i ta hi tsetselela. (Va Le Efesusi 4:32–5:2) Na a wulawula hi lezi a timhaka leti ti nga mu khumbisa zona, Linda i ngalo: “Nzi ti zwisile ku khwatsi Jehova o wulawula na mina hi kukongoma.”
Laha a xikhati xi ngaya xi hunza a xiviti lexi Linda a nga hi naxo xi lo mbhela. I lo rivalela a makabye wakwe na zi sukela mbilwini, niku zezi vona vambiri vanghana va hombe. Linda i simama ku tirela Jehova. Tiyiseka lezaku Jehova wa zi lava ku ku vunawu.