WUTLHARI GA KALE GI VUNAKO MASIKWINI YA HINA
Tsetselela hi mbilu yontlhe
TSHINYA GA NAYO WA BIBLIA: “Honiselanani ni ku tsetselelana; loku munhu a hi ni xisolo ka munwani, kota lezi Hosi yi nga mu tsetselela, nwinawu mahani zalezo.” — Va Le Kolosi 3:13.
Zi wula yini lezo? Lomu ka Biblia, a xionho xi fananisiwa ni mangava; a kutsetselela ku fananisiwa ni ku vinyiwa ka mangava. (Luka 11:4) A bhuku go kari gi wula lezaku lomu Mitsalweni, a gezu ga xiGreki gi hunzuluselweko ku “kutsetselela” gi wula ku “tsika mangava, u nga ha lonzi.” Hi ndlela leyo, loku hi hlawula ku tsetselela loyi a hi maheleko kubiha, a hi rinzeli lezaku a hi mahela xo kari. A kuva hi mu tsetselela hi mbilu yontlhe a zi wuli lezaku ho tsakela ku mahelwa wubihi kutani ku zi wona zi nga hi za nchumu lezi a hi maheleko. Wutshanwini ga lezo, hi maha xiboho xa ku nga mu vekeli xiviti, hambu loku hi hi ni xigelo xo zwala xa kuva “ni xisolo.”
Gi na ni xivuno masikwini ya hina? Kota vanhu va nga mbhele- langiko, ha onha. (Va Le Roma 3:23) Hikwalaho, zi nene a kuva hi tshama na hi longile ku tsetselela vanwani, hakuva hinawu hi ta tshuka hi lava ku tsetselelwa. Tlhatakumbiri, loku hi tsetselela, hinawu ha vuneka. Hi ndlela muni?
Loku hi tshama ni khulo ni xiviti — hi ala ku tsetselela — ho ti bayisa ha hoce. A kutizwa loko ka hava ku nga hi yivela litsako, ku hi komisela wutomi, ni ku tshama hi karatekile. Zi nga tlhela zi hi vangela mababyi ya hombe. A mahungu ma nga ka Journal of the American College of Cardiology, ma tsalilweko hi Dr. Yoichi Chida na Andrew Steptoe, a nga Mugonzisi wa Psicologia, ma wula lezi: ‘A mibiko ya zezanyana yi komba lezaku ku na ni kuyelana ko kari ku nga ni mhango xikari ka zanga ni tihanyi zinwe ni mababyi ya mbilu.’
Xungetano hi mawonela ma nene, wona mabhinzu ya ku tsetselela. Loku hi tsetselela vanwani hi mbilu yontlhe, hi hlayisa wumunwe ni kurula, hi ndlela leyo hi nga onhi kuzwanana. A xa lisima nguvu hi lezaku hi ti kombisa kota vapimanyisi va Nungungulu, loyi a tsetselelako vaonhi vo ti sola ni loyi a rinzelako ku hi maha lezo. — Marku 11:25; Va Le Efesusi 4:32; 5:1.