Jehova i mu tsetselele hi mbilu yontlhe

“Loyi a nga tsetseleliko vanwani i tsema a bhulaho legi a faneleko ku tsemakanya hi gona.” A magezu lawa ya Edward Herbert, a mutsali wa matimu wa zana ga malembe ga wu 17, ma komba khwatsi a ku hikuyini hi faneleko ku tsetselela vanwani: Hinawu hi ta tshuka hi lava ku tsetselelwa. (Mateu 7:12) Hambulezo, ku na ni xigelo xa lisima nguvu xo hunza lexo xa kuva hi tsetselela vanwani. Wona magezu ya mupostoli Paule ma nga ka Va Le Kolosi 3:13. — Gonza.

Kota lezi hontlheni hi nga mbhelelangiko, ha tshuka hi swira kutani ku zangarisa vanwani, niku vonawu va nga maha lezo ka hina. (Va Le Roma 3:23) Hi nga zi kotisa kuyini ku hanya hi kurula ni vanhu-kulori va nga mbhelelangiko ke? Hi ku pupuxelwa hi Nungungulu, Paule i hi kuca lezaku hi nga cheli nguvu kota hi zihoxo za vanwani hi tlhela hi tsetselela. A wusungukati legi ga ha hi ga lisima nguvu ni nyamutlha a ku fana ni xikhatini lexi gi nga tsaliwa hi xona, kwalomo ka 2.000 wa malembe ma hunzileko. A hi kambisiseni khwatsi a magezu ya Paule.

“Honiselanani.” A gezu legi gi hunzulusela a gezu ga xiGreki gi wulako kutimisela kutani ku nga cheli kota. A bhuku go kari gi ngalo a maKristu ma kombisa tshamela legi hi “ku timisela lava va nga ni zihoxo kutani matshamelana ma va swirako.” A gezu “honiselanani” gi komba lezaku hina hi fanele ku maha lezo ka vanwani, vonawu va maha lezo ka hina. Lezo zi wula ku loku hi alakanya lezaku hinawu ha maha zilo zi swirako vanwani, hi nga ta tsika a zilo lezi zi hi swirako ka vona zi hi maha hi nga zwanani. Kanilezi, loku va hi onhela ke?

Mu “tsetselelana.” A tlhari yo kari yi wula lezaku a gezu ga xiGreki legi gi hunzuluselweko ku “ku tsetselelana,” “a hi gona gi tolovelako ku tirisiwa laha ka ku tsetselela . . . kanilezi i gezu ga ntamu gi khanyisako a wuxinji ga ku tsetselela.” A bhuku ginwani gi wula lezaku a gezu lego gi nga wula “ku mahela wuxinji, wunene, kutani ku vuna munhu.” Hi mahela wuxinji vanwani hi ku va tsetselela hambu loku hi hi ni xigelo xa ku va sola. Kanilezi, hikuyini hi faneleko ku ti yimisela ku va mahela wuxinji lego? Hi lezaku hinawu hi ta tshuka hi lava ku a munhu loye a hi mahelawu wuxinji hi ku hi tsetselela.

“Kota lezi [Jehova a] nga mu tsetselela, nwinawu mahani zalezo.” Lexi hi xona xigelo xo sangula xi hi mahako hi lava ku tsetselela vanwani: Jehova Nungungulu wa hi tsetselela hi matsenya. (Mika 7:18) Hi nga alakanyela a wuxinji legi Jehova a mahelako vaonhi. A kuhambana na hina, Jehova a nga tshuki a onha. Hambulezo, Jehova wa tsetselela vaonhi hi matsenya hambu lezi a zi tivako ku a nga ta tshuka a lava ku tsetselelwawu hi vaonhi lavo. Kunene, a ku na munhu a tsetselelako vaonhi va ti solako a ku hunza Jehova!

A wuxinji ga Jehova gi hi kuca ku tshinela ka yena gi tlhela gi hi kuca ku mu pimanyisa. (Va Le Efesusi 4:32–5:1) Zi tava zi nene kuva hi ti wutisa lezi: ‘Lezi Jehova a nzi mahelako wuxinji a nzi tsetselela, nzi ta tsikela yini ku tsetselela munhu-kulori wo kala a nga mbhelelangi loyi a ti solako ka lezi a nga nzi onhela ke?’ — Luka 17:3, 4.