Khombo ga wu 10

Mosi i no tsumbisa Faro lezvaku i wa nga ta ha wonana naye kambe. Kanilezvi, na a nga se suka a famba, i no byela Faro, aku: ‘Cikari ka wusiku ga nyamutlha, a vafana vontlhe va matewula ya vaGibhite va tafa, kusukela ka n’wana wa wena kala ka vana va zvitiri’.

Jehovha i no byela vaIzrayeli lezvaku va bhika zvakuga zvo hlawuleka vaga. I te: ‘Dayani yivhu kutani mbuti ya matsune ya lembe gin’we, mu totela nkhata wa kona lomu ka tiaro ta tivati ta n’wina. Wocani nyama ya kona muga ni tipawa to kala ku cheliwa zva ku kukumukisa hi zvona. Bohani masandalia ya n’wina, mu tshama na mu longile ku famba. Ndzi ta mu tlhatlhisa wusiku legi’. Hi nga alakanyela lezvi a vaIzrayeli va nga tsakisile zvona!

Laha cikari ka wusiku, a ngilozi ya Jehovha yi noya tindlwini tontlhe ta le Gibhite. Ka yindlu leyi yi nga kala yi nga totelwangi nkhata laha ka aro ya livati, yi no daya n’wana wa mufana wa matewula. Kanilezvi, ka tiyindlu leti ti nga totelwe nkhata, a ngilozi yi no hundza hi le hehla. Ka miti yontlhe ya vaGibhite, ya lava vo ganya ni ya lava va zvisiwana, ku nofa n’wana. Kanilezvi a ku fangi ne n’wana mun’we wa vaIzrayeli.

A n’wana wa Faro yenawu i nofa. Faro a nga ha zvi kotangi ku zvi timisela. I no tekela ku byela Mosi na Aroni, aku: ‘Sukani mu famba. Fambani mu ya khozela Nungungulu wa n’wina. Tekani zvihari zva n’wina mu famba’!

A vaIzrayeli va no huma lomu Gibhite a n’weti na wu te pa, va famba hi mingango ni tixaka tabye. Va wa hi 600 000 wa vavanuna zvin’we ni vavasati ni vanana vo tala. Ku fambile ni vanhu van’wani vo tala va nga hiko vaIzrayeli kasi vonawu va ya khozela Jehovha. Makunu va wa tlhatlhisilwe!

Kasi va alakanya lezvi Jehovha a nga va tlhatlhisisa zvona, a vaIzrayeli va wa fanele kuga zvakuga zvo hlawuleka lembe ni lembe, zvo fana ni lezvi va ngaga siku legi va nga tlhatlhisiwa hi gona. A cimaho leco, ci wa vitaniwa ku i Pasika.