Va tsumbisa Jehovha

Loku ku hundzile cipimo ca tihweti timbiri a vaIzrayeli na va humile tikweni ga Gibhite, va no chikela Citsungeni ca Sinayi, va gumesa va gwimba matenda yabye va tshama laho. Jehovha i no byela Mosi lezvaku a noma le hehla ka citsunga, a gumesa a ya mu byela lezvi: ‘Ndzi tlhatlhisile vaIzrayeli. Loku va ndzi ingisa va tlhela va hlayisa milayo ya mina, va tava vanhu va mina vo hlawuleka’. Mosi i no relela a ya byela vaIzrayeli lezvi Jehovha a nga wulile. Zvini va nga hlamula? Va te: ‘Hi ta maha zvontlhe lezvi Jehovha a nga wula’.

Mosi i no tlhela le hehla ka citsunga, Jehovha a ya mu byela lezvi: ‘Ndzeni ka masiku manharu, ndzi ta wulawula na n’wina. Byela vanhu lezvaku va ti wonela. Va nga kweli Citsunga ca Sinayi’. Mosi i no relela a ya byela vaIzrayeli lezvaku va ti longisela kasi vazwa lezvi Jehovha a nga lava ku wula.

Hi siku ga wunharu, a vaIzrayeli va no wona kuhatima le hehla ka citsunga ku tlhela ku phuma hi refu. Va nozwa kudzindza ka hombe ni kuvhuma ka mpundzu. Jehovha i no gumesa a relela hi lomu ndzilweni aya le hehla ka citsunga. A vaIzrayeli va no chava nguvhu laha ka kuza va rurumela. A citsunga contlhe ci no tsekatseka nguvhu ci tlhela ci fenengetiwa hi musi. A guwa ga mpundzu gi noya gi engetela nguvhu. Nungungulu a gumesa aku: ‘Hi mina Jehovha. Mu nga khozeli vanungungulu van’wani’.

Mosi i no tlhela le hehla ka citsunga, Jehovha a ya mu nyika milayo ya lezvi va nga fanele ku mu khozelisa zvona ni lezvi va nga fanele ku hanyisa zvona. Mosi i no tsala milayo leyo a gumesa a yi lerela vaIzrayeli. Va no tsumbisa lezvi: ‘Hi ta maha zvontlhe lezvi Jehovha a hi byelako’. Va no tsumbisa Nungungulu lezvaku va ta mu ingisa. A ku hakunene va wa ta tatisa citsumbiso cabye?