Mosi — A wanuna wa kutikoramisa

XINI A KUTIKORAMISA?

A kutikoramisa zi wula ku nga ti kulisi kutani ku nga hi na matsanza. A munhu wa kutikoramisa a nga kanyisi vanwani. A munhu wa kutikoramisa wa alakanya lezaku a nga mbhelelangi niku wa tiva a kugumelwa kakwe.

XANA MOSI I KOMBISISILE KUYINI A KUTIKORAMISA?

Mosi a nga telwangi hi matshanza loku a nyikilwe wukosi. A kutala ka zikhati loku munhu a nyikwa wukosana go kari, a nga hleli ku woneka lezaku munhu wo ti koramisa kutani wa matshanza. Robert G. Ingersoll, a mutsali wo kari wa zana ga malembe ga wu 19, i zi tlhamusela hi ndlela leyi: “A vanhu vo tala va zi kota ku timisela a zikarato. Kanilezi loku u lava ku tiva lezi a munhu hakunene a nga zona, mu nyike wukosi.” Ka mhaka leyi, Mosi i vekile a xikombiso xa xi nene nguvu xa kutikoramisa. Hi ndlela muni?

Mosi i amukele a wukosi ga hombe nguvu, hakuva Jehova i mu yimisile kota murangeli wa vaIsraeli. Hambulezo, a wukosi lego a gi mahangi Mosi a ti kukumukisa. Hi xikombiso, wona lezi a yimisanisileko zona ni xikarato xi nga yelana ni tifanelo ta ku amukela tshomba. (Mitsengo 27:1-11) A xikarato lexo xi wa hi xa hombe, hakuva a xiboho lexi a nga wa ta xi maha xi wa ta khumba a zizukulwana zontlhe lezi zi nga hata.

Xana Mosi i wa ta hlamulisa kuyini? Xana i wa ta alakanya lezaku kota murangeli wa vaIsraeli, i wa xi tiva a xiboho lexi hakunene a nga fanele ku xi maha? Xana i wa ta tsumba a wutlhari gakwe ga mabeleko, kutani wutlhari a gi kumileko ka malembe yakwe ya ku hanya? Xana i wa ta tsumba a wutivi legi a nga hi nago xungetano hi kupima ka Jehova?

Kuzilava a munhu wa matshanza i wa ta ngha a mahisile zalezo. Kanilezi Mosi ahihi. A Biblia gi ngalo: “Mosi i lo yisa a mhaka yabye mahlweni ka Jehova.” (Mitsengo 27:5) Alakanya lezi! Hambu lezi a nga sina a rangele a tiko ga Israeli hi 40 wa malembe, Mosi i khegele ka Jehova, na ku nga hi ka wutlhari ga yena wutsumbu. Zi la su dlunya lezaku Mosi i wa ti koramisa.

Mosi a nga alakanyangi lezaku a wukosi gi wa ringana yena yece. I lo tsaka a xikhati lexi Jehova a nga vumela ku a vaIsraeli vanwani va tira naye kota vaprofeti. (Mitsengo 11:24-29) A xikhati lexi a muxade wakwe a nga mu nyika mawonela ya kuva a hlawula vavanuna vo kari lezaku va mu vuna hi mitiro yo kari, Mosi i tirisile mawonela lawo hi kutikoramisa. (Eksodusi 18:13-24) Niku a xikhati lexi a nga hi kusuhani ni kufa, hambu lezi a nga ha tiyile, Mosi i lo kombela Jehova lezaku a yimisa munhu wa ku mu valeta. A xikhati lexi Jehova a nga hlawula Joxua, Mosi i lo seketela a jaha lego hi mbilu yontlhe, a kuca vanhu vontlhe lezaku va vumela ku Joxua a va rangela kala Tikweni ga Xitsumbiso. (Mitsengo 27:15-18; Deuteronome 31:3-6; 34:7) Lisine lezaku Mosi i wa zi wona kota lungelo a ku rangela a vaIsraeli wukhozelini. Kanilezi i wa nga nyiki nguvu lisima a wukosi gakwe ku hunza kutshamiseka ka vanwani.

HINA KE, HI GONZA YINI?

Ngha hi nga vumeli ku a wukosi kutani wutlhari ga mabeleko zi hi maha hi telwa hi matshanza. Alakanya lezaku kasi ku Jehova a hi tirisa khwatsi, a kutikoramisa ka hina ku fanele kuva ka hombe ku hunza a wutlhari legi hi nga nago. (1 Samueli 15:17) Loku hi hi ni kutikoramisa ka lisine, hi ta ti karatela ku lanzela a wusungukati legi ga Biblia: “Tsumba Jehova hi mbilu ya wena yontlhe, u nga tsumbi kupimisisa ka wena wutsumbu.” — Mavingu 3:5, 6.

A xikombiso xa Mosi xi hi gonzisa kambe lezaku hi nga nyiki lisima ku hunza mpimo a xikhundla xa hina kutani wukosi.

Xana ha vuneka hi ku pimanyisa a xikombiso xa Mosi xa kutikoramisa? Handle ko kanakana! Loku hi hlakulela a kutikoramisa ka lisine, hi hehukisa a wutomi ga lava hi hanyako navo, niku lezo za va maha va hi ranza. Niku a xa lisima nguvu hi ku lezo zi hi maha hi ranziwa nguvu hi Jehova Nungungulu, loyi yena wutsumbu a kombisako a tshamela legi go saseka. (Tisimu 18:35) “Nungungulu wa ala a vamatshanza, kanilezi i nyika tipswalo ka lava va ti koramisako.” (1 Pedro 5:5) Handle ko kanakana hi na ni xigelo xo zwala xa kuva hi pimanyisa a kutikoramisa ka Mosi!