“Hi wihi a nayo wo ranga ka yona yontlhe ke?”

Xini xi lavekako kasi ku xalalisa Nungungulu? Xana ku na ni milayo ya tsanza vahlayi hi faneleko ku yi lanzela? Lexi xi tsakisako hi ku a hlamulo wa kona i ahihi! Kota kuwula ka N’wana wa Nungungulu, Jesu Kristu, lezi Nungungulu a zi lavako ka hina hi nga zi songa hi zi wula hi gezu ginwe ntsena. — Gonza Marku 12:28-31.

A kuranga, wona laha Jesu a wulileko kona a magezu lawa. I wa kari a gonzisa tempeleni hi 11 ka Nisani, masiku matsongwani mahlweni ka kufa kakwe. A valala vakwe va wo mu ringa hi ku mu maha ziwutiso zi nga vuxa kukanetisana xikari ka vanhu. Ka makhati wontlhe, Jesu i tekele ku va vala milomu hi mihlamulo yakwe. Hi kulanzela, va lo mu maha xiwutiso lexi: “Hi wihi a nayo wo ranga ka yona yontlhe ke?” — Vesi 28.

Lexi xi wa hi xiwutiso xo karata nguvu. A vaJuda vo kari va wa kanetisana hi milayo ya kuhunza 600 leyi yi nga wumba a Nayo wa Mosi, na va lava ku tiva ku hi wihi wu nga hi wo ranga kutani wa lisima ku hunza yontlhe. Zi wonekisa ku khwatsi a vo kari va wa wula lezaku a milayo yontlhe ya fana va tlhela vaku zi bihile ku nyika nguvu lisima a milayo yo kari ku hunza yinwani. Xana Jesu i wa ta xi hlamulisa kuyini xiwutiso lexo?

Kota hlamulo, Jesu a nga kumbukangi a nayo wunwe ntsena kanilezi yimbiri. A kuranga i te ngalo: “U ta ranza [Jehova] Nungungulu wa wena hi mbilu ya wena yontlhe, ni muhefemulo wa wena wontlhe, ni kupima ka wena kontlhe, ni ntamu wa wena wontlhe.” (Vesi 30; Deuteronome 6:5) A magezu “mbilu,” “kupima,” “muhefemulo” ni “ntamu” a ma wuli zilo zo hambana.a A tlhamuselo hi lowu: A ku ranza Jehova zi fanele ku patsa a munhu yentlhe, a wuzikoti gakwe gontlhe ni zontlhe lezi a nga nazo. A bhuku go kari gi tlhamuselako a Biblia gi zi wula hi ndlela leyi: “Nungungulu i lava ku ranziwa hi kumbhelela.” Loku u ranza Nungungulu, u ta maha zontlhe u zi kotako kasi u hanya hi ndlela leyi yi mu xalalisako siku ni siku. — 1 Johani 5:3.

Xa wumbiri, Jesu i te ngalo: “U ta ranza [muakelani wa] wena kota lezi u ti ranzako wena.” (Versi 31; Levi 19:18) A ku ranza Nungungulu ni ku ranza muakelani zi laha ka kunwe. A ku ranza muakelani i mbhanzu wa ku ranza Nungungulu. (1 Johani 4:20, 21) Loku hi ranza vaakelani va hina kota lezi hi ti ranzisako zona, hi ta va mahela lezi hi lavako lezaku va hi mahela. (Mateu 7:12) Hi ndlela leyo hi komba lezaku ha mu ranza a Nungungulu loyi a hi vangileko — hontlheni — hi mufananiso wakwe. — Genesisi 1:26.

Hi lihi a lisima la milayo ya ku ranza Nungungulu ni muakelani? Jesu i te ngalo: “A wu kona nayo munwani wa hombe ku hunza leyi.” (Versi 31) Ka tlhatlhambutelo wunwani wo fana ni lowu, Jesu i wulile lezaku a milayo leyi ya yimbiri hi yona tshinya ga milayo yontlhe. — Mateu 22:40.

A ku xalalisa Nungungulu a zi karati. Zontlhe lezi a zi lavako hi nga zi songa hi zi wula hi gezu ginwe ntsena: liranzo. Legi hi gona a tshinya ga wukhozeli ga lisine kusukela ka kale — niku gi ta simama kuva galegi. Kanilezi a liranzo a hi magezu kutani kutizwa ntsena; li kombiswa hi mitiro. (1 Johani 3:18) Hikuyini u nga gonziko tindlela ta ku hlakulela ni ku kombisa a liranzo la wena hi Jehova, a Nungungulu loyi a nga “liranzo”? — 1 Johani 4:8.