Timhango ta ntumbuluko — Xana xikombiso xa lezaku Nungungulu i na ni tihanyi?

LEZI A VOKARI VA WULAKO: “Nungungulu hi yena a fumako misava, hikwalaho hi yena a vangako a timhango ta ntumbuluko; hi xigelo lexo i na ni tihanyi.”

LEZI A BIBLIA GI ZI WULAKO: “A tiko gontlhe gi le ntanwini wa loyi wa kubiha.” (1 Johani 5:19) Himani a “wa kubiha”? A Biblia gi mu tivekisa kota Satani. (Mateu 13:19; Marku 4:15) Xana za ku karatela a ku zi zwisisa? Ehleketa hi lezi: Loku Satani a hi yena a fumelako a tiko legi, hi yena a mahako a vanhu vava ni makangwa va tlhela vava ni kupima ku nga nyawuliko a ku fana na yena. Xana lezo a zi ku vuni a ku zwisisa a ku hikuyini a vanhu va hohlotako misava ha voce? A titlhari ti tlharihisa lezaku a kuhohlotwa ka misava konawo ka patseka ka timhango ta ntumbuluko, ku nga hava ka ku ti vanga, kutshingisa, kutani ku maha vanhu va vumala ka ku tsutsumela kona.

Makunu, hikuyini Nungungulu a tsikako Satani ava ni kucetelo lowo? A hlamulo wa xiwutiso lexi wu hi yisa kusanguleni ka wutomi ga vanhu, ka xikhati lexi a vapswali va hina vo sangula va nga hluwukela a wuhosi ga Nungungulu. A kutala ka vanhu va lanzela a xikombiso xabye xo biha. A kuhlawula loko — ka ku hluwukela a wuhosi ga Nungungulu — ku mahile lezaku a vanhu vava mandleni ya nala wa Nungungulu, Satani. Jesu i vitanile Satani lezaku i “hosana ya tiko.” (Johani 14:30) Xana Satani i ta fuma kala kupinzuka? Ahihi!

A hi ku khwatsi Jehovaa o kala a nga khatali hi kuxaniseka loku ku vangiwako hi Satani. Hi lisine, Nungungulu wa khumbiwa nguvu mbilu hi ku xaniseka ka vanhu. Hi xikombiso, xungetano hi xikhati lexi a tiko ga Israeli gi nga hi lomu zikaratweni, a Biblia gi wula lezi xungetano hi Nungungulu: “Lomu zikaratweni zabye zontlhe i lo karateka zinwe navo.” (Isaya 63:9) Hi wuxinji, Nungungulu i mahile malulamiselo kasi ku fuvisa a mufumo wa tihanyi wa Satani lokuloku! I yimisile a N’wana wakwe Jesu Kristu, kasi kuva Hosi yo lulama kala kupinzuka.

LEZI U PATSEKISAKO ZONA: Hambu lezi a mufumo wa Satani wu tsanzekako ku vikela a vanhu ka timhango ta ntumbuluko, a mufumo wa Jesu wu ta va vikela. Ka khati go kari, Jesu i vikele a vapizani vakwe ka bhubhutsa. A tlhatlhambutelo wa kona wa Biblia wu ngalo: “I lo . . . kawuka a mheho, aku ka bimbi: Miyela, uku hwi! Ni mheho yi lo gawuka, kuva ni malenga ya hombe.” A vapizani vakwe vaku: “Kasi himani loyi, waku hambu mheho ni bimbi zi mu ingisa ke?” (Marku 4:37-41) A ximaho lexo xi hi nyika a kutsumba ka lezaku Jesu i ta vikela a vanhu vontlhe va ingisako a xikhati lexi a to fuma kota Hosi. — Danieli 7:13, 14.