Kulamula ka Nungungulu — Xana ku vile ka tihanyi?

KASI ku kuma a hlamulo wa xiwutiso lexi, a hi kambisiseni a zikombiso zimbiri za kulamula ka Nungungulu ku kumbukiwako lomu ka Biblia — a Ntalo wa masikwini ya Noa ni kuloviswa ka vaKanani.

A NTALO WA MASIKWINI YA NOA

LEZI A VOKARI VA WULAKO: “Nungungulu i kombisile a kuva ni tihanyi a xikhati lexi a nga tisa ntalo lowu wu nga lovisa a vanhu vontlhe ku sala Noa ni ngango wakwe ntsena.”

LEZI A BIBLIA GI ZI WULAKO: Nungungulu i te ngalo: “A nzi xalaliswi hi kufa ka wakubiha; kanilezi nzi xalaliswa hi kuhunzuluka ka wakubiha a ndleleni yakwe a hanya.” (Ezekieli 33:11) Hikwalaho a kulovisiwa ka vakubiha masikwini ya Noa a ku mu xalalisangi Nungungulu ne ni kutsongwani. Makunu, hikuyini a va lovisileko?

A Biblia gi hlamula lezaku a xikhati lexi Nungungulu a nga neha a kulamula loko ka vakubiha xikhatini xi hunzileko, i wo veka “xikombiso ka lava va ta nga kala va nga hanyeli Nungungulu.” (2 Pedro 2:5, 6) Xikombiso muni?

Xo ranga, Nungungulu i kombile lezaku hambu lezi zi mu bayisako a ku lovisa vanhu, wa va wona a vakubiha lava va xanisako vanwani a tlhela a va lamula hi kota ya mitiro yabye. Xikhatini xa ha tako, yena i ta fuvisa a wubihi gontlhe ni kuxaniseka kontlhe.

Xa wumbiri, a xikombiso xa zilo lezi Nungungulu a zi mahileko kaleloko xi komba lezaku Nungungulu wa kombisa liranzo hi ku tlharihisa a vanhu na a nga se neha a kulamula kakwe. Noa i wa hi mukaneli wa kululama, kanilezi a vanhu vo tala va lo mu kanyisa. A Biblia gi ngalo: “A va chelangi kota kala wuta ntalo, wu ta va kukuleta vontlhe.” — Mateu 24:39, Tradução do Novo Mundo.

Xana Nungungulu wa khomelela ka xikombiso lexo? Ina. Hi xikombiso, yena i tlharihisile a vanhu vakwe va ka Israeli lezaku loku va wo tshuka va maha za ku biha a ku fana ni matiko lawa ma nga va ranzele, i wa ta tsika a valala vabye va va hlasela; va lovisa a doropa gabye ga Jerusalema; va tlhela va va khoma va va yisa wukhumbini. A vaIsraeli va lo maha kubiha futsi — laha ka kuza va maha miphahlo hi vana vabye. Xana Jehova i mahile xo kari? Ina, kanilezi i rangile hi ku rumela a vaprofeti vakwe va ya va tlharihisa hi kuphindaphinda lezaku va cica a mahanyela yabye na a xikhati xa ha vumela. I tlhelile aku: “Hosi Jehova a nga zi koti ku maha nchumu na a nga se ku tivisa a malanza yakwe, va nga vaprofeti.” — Amosi 3:7.

LEZI U PATSEKISAKO ZONA: A xikombiso lexi hi xi wonako ka kulamula ka Jehova ka xikhatini xi hunzileko xi hi nyika kutsumba. Hi nga rinzela na hi hi ni kutsumba lezaku Nungungulu i ta lamula a vanhu va tihanyi lava va vangako kuxaniseka. A Biblia gi ngalo: “A vamahi va kubiha va ta lobyiswa . . . Kanilezi lava va rulako va taga tshomba ya tiko, va ta xalaliswa hi kurula ka hombe.” (Tisimu 37:9-11) Hi wahi a mawonela ya wena xungetano hi kulamula loku ku tlhatlhisako vanhu ka kuxaniseka? Ku kombisa tihanyi, kutani wuxinji?

KULOVISWA KA VAKANANI

LEZI A VOKARI VA WULAKO: “A kuloviswa ka vaKanani ku vile yimpi ya tihanyi leyi yi fanako ni kuhihiritwa ka vanhu nyamutlha.”

LEZI A BIBLIA GI ZI WULAKO: “Tontlhe tindlela [ta Nungungulu] ti lulamile; i Nungungulu wa kutsumbeka, loyi a nga hiko na kukanganyisa.” (Deuteronome 32:4) A kulamula ka Nungungulu ko lulama a hi ko kala hi ku fananisa ni tiyimpi ta vanhu. Hikuyini? Hakuva a ku hambana ni vanhu, Nungungulu i na ni wuzikoti ga ku wona lezi zi nga lomu mbilwini ya munhu.

Hi xikombiso, a xikhati lexi Nungungulu a nga lamula a madoropa ya Sodoma ni Gomora, a boha ku ma lovisa, Abrahama, a nga hi wanuna wo tsumbeka i wa karatekela kululama mhakeni leyo. Zi wa mu karatela a ku alakanya lezaku Nungungulu wakwe wo lulama a nga “lovisa a valulamileko ni vangalulamangiko.” Nungungulu i lo kombisa lihlaza-mbilu, a mu tiyisa lezaku loku i wo kuma hambu kova 10 wa vanhu vo lulama le Sodoma, i wa ta tsika ku lovisa doropa lego hi kota yabye. (Genesisi 18:20-33) Zi la su dlunya lezaku Nungungulu i wa hlolile a timbilu ta vanhu lavo a wona a kutshisa ka wubihi gabye. — 1 Kronekele 28:9.

Hi kufanana, Nungungulu i wonile lezaku a vaKanani va wa bihile, a guma a laya hi kufaneleko lezaku va loviswa. A vaKanani va wa tiveka nguvu hi tihanyi tabye, leti ti nga patsa a ku hisa vanana na va ha hanya kota muphahlelo.a (2 Tihosi 16:3) A vaKanani va wa zi tiva lezaku Jehova hi yena a nga ruma a vaIsraeli lezaku va teka tiko gontlhe. Lava va nga hlawula a ku simama va tlhela va vuxa yimpi va wa nga vukeli a vaIsraeli ntsena, kanilezi va vukela Jehova kambe, loyi a nga nyikile a xikombiso xo tiya xa lezaku i wa seketela a malanza yakwe.

Ahandle ka lezo, Nungungulu i kombisile a wuxinji hi vaKanani lava va tsikileko a wubihi gabye va tlhela va vumela ku hanya hi matshinya ya milayo ya Jehova. Hi xikombiso, Rahabi, loyi a nga hi muKanani wa xibhayi, i ponisilwe zinwe ni ngango wakwe. Tlhatakumbiri, a xikhati lexi a vahanyi va doropa ga Gibeoni ga le Kanani va nga kombela ku mahelwa wuxinji, va lo tsika ku va daya zinwe ni vana vabye. — Joxua 6:25; 9:3, 24-26.

LEZI U PATSEKISAKO ZONA: Hi nga gonza nchumu wa lisima nguvu ka kulamulwa ka vaKanani. “A siku ga kulamulwa ni ga kulobyiswa ka vanhu lava va nga chaviko Nungungulu” gi kari gi tshinela hi xihatla. (2 Pedro 3:7) Loku hi ranza Jehova, hi ta kuma makatekwa yo tala a xikhati lexi yena a to fuvisa a kuxaniseka ka vanhu hi ku lovisa lava va alako a wuhosi gakwe.

Jehova i kombisa liranzo hi ku hi alakanyisa lezaku a kuhlawula loku a vapswali va ku mahako ka khumba a vana vabye. A Mhaka ya Nungungulu yi ngalo: “Hlawula wutomi kasi wa fela ku hanya, wena ni pswalo wa wena; u ranza Jehova Nungungulu wa wena, u ingisa a gezu gakwe, u namarela ka yena.” (Deuteronome 30:19, 20) Xana lawo magezu ya Nungungulu wa tihanyi kutani magezu ya Nungungulu a ranzako vanhu a tlhela a lava lezaku va hlawula za zi nene?