Hikuyini a vanhu va wulako lezaku Nungungulu i na ni tihanyi?

XANA a xiwutiso xi nga ka kapa ya revista legi xa ku tlhava mbilu? Va kona xi va tlhavako, kanilezi a vanhu vo tala va kanakanela a ku ngha Nungungulu a hi ni tihanyi — kutani ku wula futsi lezaku i nato. Hikuyini?

A vokari va ponileko ka timhango ta ntumbuluko, va wutisa lezi: “Hikuyini Nungungulu a tsikako a zilo lezi zi humelela? Xana o kala a nga khatali? Kutani ova ni tihanyi?”

A vanwani va maha a xiwutiso lexo a xikhati va gonzako a Biblia. A xikhati lexi va wonako a mitlhatlhambutelo yo kota lowu wu wulawulako hi Noa zinwe ni Ntalo, va ti wutisa lezi: ‘A Nungungulu wa liranzo a nga va dayela yini a vanhu vontlhe lavo? A ngova ni tihanyi?’

Xana wenawu wa tshuka u ti maha a ziwutiso lezi? Kutani za ku karatela ku hlamula lava va ti wutisako a ku xana Nungungulu a ngova ni tihanyi ke? Ni ka xihi xiyimo, ehleketa hi xiwutiso lexi.

HIKUYINI HI VENGAKO TIHANYI?

Hi ndlela yo olova, hi venga a tihanyi hi lezi hi nga ni wuzikoti ga ku hambanyisa za zi nene ni za ku biha. Hi zalezo zi hi hambanyisako nguvu ni zihari. A Muvangi wa hina i hi mahile “hi mufananiso wakwe.” (Genesisi 1:27) Zi wula yini lezo? Yena i hi nyikile a wuzikoti ga ku pimanyisa a matshamela yakwe ni milayo yakwe ya mahanyela, ni ku tiva a ku hambanyisa za zi nene ni za ku biha. Ehleketa hi mhaka leyi: Loku a hi Nungungulu a nga hi nyika a wuzikoti ga ku tiva ku hambanyisa za zi nene ni za ku biha lezi zi hi mahako hi byekelela ku venga a tihanyi, xana lezo a zi kombi lezaku Nungungulu wa ti venga nguvu?

A Biblia ga seketela a lisine lelo, hakuva lomu ka Biblia Nungungulu i hi byela lezi: “A tindlela ta mina ti tlakukile ku hunza ta nwina, ni maalakanyo ya mina ma hunza ya nwina.” (Isaya 55:9) Makunu loku hi wo wula lezaku Nungungulu i na ni tihanyi, hi wa nga ta ngha hi kaneta a Biblia — hi wula lezaku a tindlela ta hina ti tlakukile ku hunza leti takwe ke? Kunene zi wa tava wutlhari a ku ranga hi ku tiva zinwani xungetano hi yena na hi nga se wula lezo. Kuzilava wutshanwini ga ku wutisa ku Nungungulu i na ni tihanyi ke, hi fanele ku wutisa a ku hikuyini a zimaho zo kari zakwe zi wonekisako ku khwatsi i na ni tihanyi. Kasi ku hi vuna, a hi woneni a ku xana a kuva ni “tihanyi” zi wula yini hakunene.

Loku hi wula lezaku a munhu i na ni tihanyi, ho wula lezaku i maha zilo hi xikongomelo xa hava. A munhu wa tihanyi hi loyi a ranzako ku wona vanwani na va xaniseka kutani a kalako a nga khatali hi zikarato zabye. Hikwalaho, a papai a tsayisako n’wana wakwe hi ku lava ku mu wona na a rila i na ni tihanyi. Kanilezi a papai a tsayisako a n’wana wakwe hi ku lava ku mu gonzisa ni ku mu vikela mu nene. Loku ku hi lezaku i kona a nga tshuka a ku alakanyela za hava, wa zi tiva lezaku za olova ku a vanhu va maha lezo.

Zalezi a hi kambisiseni a zilo zimbiri zi mahako vanhu vo kari va alakanya lezaku Nungungulu i na ni tihanyi — a timhango ta ntumbuluko leti hi ti wonako nyamutlha ni kulamula ka Nungungulu loku hi ku wonako a xikhati hi gonzako a Biblia. Xana a zilo lezo za komba hakunene lezaku Nungungulu i na ni tihanyi?