Xana u ta tsumba Nungungulu?

HI NGA alakanya lezi: U na ni munghana u mu ranzako nguvu, kanilezi i maha zilo zo kari lezi wena u nga zi zwisisiko. A vanwani va sola lezi a zi mahileko, va tlhela va lamula a zigelo zakwe za ku a maha zilo lezo, va wula lezaku a munghana wa wena i na ni tihanyi. Xana u wa ta tekela ku kholwa lezi va wulako a vanhu lavo, kutani u wa ta rinzela a kuzwa lezi a munghana wa wena a nga nazo a ku wula? Loku a nga hi kona laha kusuhani kasi ku mu wutisa, xana u wa tava ni lihlaza-mbilu, u rinzela kala a ta ku tlhamusela?

Na u nga se hlamula, u nga ha lava a ku tiva zinwani. U nga ha ti wutisa lezi: ‘Xana a munghana loyi nzi mu tiva a ku ya chikela kwihi, niku xini xi nzi mahako nzi mu ranza nguvu?’ Makunu, ehleketa hi lezi: A hi nge mahi zalezo xungetano hi mhaka leyi yaku xana Nungungulu i na ni tihanyi ke?

Zi nga ha ku karatela a ku zwisisa a zilo zo kari lezi Nungungulu a zi mahileko, kutani ku zwisisa a ku hikuyini a zi tsikileko zi humelela. Ku na ni vanhu vo tala lava va to ku byela lezaku Nungungulu i na ni tihanyi, va tlhela va ku kuca a ku lamula a zigelo zakwe a ku fana na vona. Xana u ta rinzela kala u tiva zinwani? A hlamulo wu ta khegela ka lezi u mu tivisako zona Nungungulu. Ti wutise lezi, ‘Wunghana muni legi Nungungulu a gi kombisako ka mina?’

Loku ku hi lezaku a wutomi ga wena gi tele hi zikarato, u nga ha ringiwa ku wula lezaku Nungungulu a hi munghana futsi. Kanilezi hi nga nyima u ehleketanyana. Xana Nungungulu hi yena a ku vangelako a zikarato wutomini — kutani hi yena a ku katekisako? Kota lezi hi zi wonileko, ‘a hosana ya tiko legi’ hi Satani, a hi Jehova. (Johani 12:31) Hikwalaho, Satani hi yena a vangako a hlomulo ni wubihi lomu tikweni. Xana a wu kholwi kambe lezaku a kungambheleli ka hina ni zilo za ku maheka na hi nga zi rinzelangi zonawu za vanga a zikarato zo tala lezi hi lwisanako nazo?

Hi tlhelo ginwani, zini zi tako hi ka Nungungulu? Ehleketa hi lezi a Biblia gi zi wulako: gi ngalo Nungungulu hi yena “a nga maha tilo ni misava”; a mitiro yakwe yi patsa a mimiri ya hina, leyi yi ‘wumbilweko hi ndlela yo hlamalisa’; niku Jehova i “Nungungulu loyi a muhefemulo wa wena wu nga canjeni gakwe.” (Tisimu 124:8; 139:14; Danieli 5:23) Zi wula yini zontlhe lezo?

Lezo zi wula lezaku a Muvangi wa hina hi yena a hi nyikako a wutomi. (Mitiro 17:28) Lezo zi wula a ku a xinyikiwo xa wutomi, a kusaseka loku hi ku wonako, kutsakisa ka liranzo ni wunghana, litsako la kuzwa a kunanziha ni kunuhela, wuzikoti ga kuingisa ni ku tiva zilo hi ku zi khoma, — zontlhe lezo zinyikiwo zi tako hi ka Nungungulu. (Jakobe 1:17) Xana a wu kholwi lezaku a makatekwa lawo a hi nyikileko ma mu maha ava munghana loyi hi faneleko ku mu nyika lisima ni ku mu tsumba?

Handle ko kanakana, zi nga ha ku karatela a ku tsumba Nungungulu. Kuzilava u ti wona na u nga se mu tiva khwatsi laha ka kuza u mu tsumba. Niku lezo za zwisiseka. Ka tinzimana leti to koma, a hi nge tlhamuseli zontlhe zigelo lezi zi mahako vokari va wula lezaku Nungungulu i na ni tihanyi. Kanilezi, xana a zi ngevi chukwana a ku zama ku mu tiva khwatsi Nungungulu?a Ha ku tiyisa lezaku, loku u maha lezo u ta tiva lisine xungetano hi Nungungulu. Xana i na ni tihanyi? I le kule ni lezo, hakuva “Nungungulu liranzo.” — 1 Johani 4:8.