MIHLAMULO YA BIBLIA

Xana hi nga tsetselelwa a zionho za hina?

Hi kuya hi lezi a Biblia gi wulako, a vanhu vontlhe va onhile. Hi thapelisilwe xionho hi wanuna wo sangula, Adamu. Hi xigelo lexo, ha tshuka hi maha zilo zo biha hi guma hi ti laya. Jesu Kristu, a N’wana wa Nungungulu, i hakhele a zionho za hina hi ku hi fela. A muphahlo wakwe wa ku tirula wu vululile ndlela ya ku hi tsetselelwa a zionho za hina. Lexo xinyikiwo xi tako hi ka Nungungulu. — Gonza Va Le Roma 3:23, 24.

A vokari va mahile zionho zo tshisa niku va ti wutisa a ku xana Nungungulu a nga va tsetselela ke. Lexi xi tsakisako hi lezaku a mhaka ya Nungungulu yi ngalo: ‘A nkhata wa Jesu a N’wana wakwe wa hi hlaza zionho zontlhe.’ (1 Johani 1:7) Jehova wa tsetselela hambu a zionho zo tshisa loku hi kombisa ku ti sola hi mbilu yontlhe. — Gonza Isaya 1:18.

Xana hi fanele ku maha yini kasi hi tsetselelwa?

Loku hi lava lezaku Jehova Nungungulu a hi tsetselela, hi fanele ku gonza xungetano hi yena — hi zwisisa a tindlela takwe, wusungukati gakwe, ni zileletelo zakwe. (Johani 17:3) Jehova wa tsetselela hi matsenya lava va ti solako ka mahanyela yabye yo biha va tlhela va ti karatela ku cica. — Gonza Mitiro 3:19.

A ku xalalisa Nungungulu a zi karati ku hunza mpimo. Jehova wa zwisisa a gome ga hina. I na ni wuxinji niku mu nene. Xana a tipswalo takwe a ti ku mahi u lava ku gonza zinwani zi lavekako kasi ku mu tsakisa? — Gonza Tisimu 103:13, 14.