BHIBLIOTEKA YA SAITE ya Watchtower
BHIBLIOTEKA YA SAITE
ya Watchtower
ciTshwa
  • BHIBHILIYA
  • MABHUKU
  • MITLHANGANO
  • w13 15/9 pp. 12-16
  • Ngha a zikhumbuxeto za Jehova zi tsakisa a mbilu ya wena

Ka cipandze leci a ku na vhidhyu

Hi tsetselele, kuve ni cikarato kasi a vhidhyu leyi yiba.

  • Ngha a zikhumbuxeto za Jehova zi tsakisa a mbilu ya wena
  • A Murinzeli I Huwelela a Mufumo Wa Jehova—2013
  • Zvihlokwana zva mhaka
  • Mahungu yo yelana ni lawa
  • TIYISA A KUTSUMBA KA WENA HI MUKHONGELO
  • EHLEKETA HI ZIKHUMBUXETO ZA NUNGUNGULU
  • TIYISA A KUTSUMBA KA WENA HI MITIRO YA WUKHOZELI
  • A zikhumbuxeto za Jehova zi tsumbekile
    A Murinzeli I Huwelela a Mufumo Wa Jehova—2013
  • Tsumba Jehova xontlhe xikhati!
    A Murinzeli I Huwelela a Mufumo Wa Jehova—2015
  • Tsumba vamakabye
    A Murindzeli i huwelela a Mufumo wa Jehovha (Wa cigondzo)—2022
A Murinzeli I Huwelela a Mufumo Wa Jehova—2013
w13 15/9 pp. 12-16

Ngha a zikhumbuxeto za Jehova zi tsakisa a mbilu ya wena

“A zikhumbuxeto za wena zi mahile tshomba ya mina kala kupinzuka.” — TIS 119:111.

U TA HLAMULA YINI KE?

  • Zigelo muni hi nga nazo za kuva hi tsaka hi zikhumbuxeto za Jehova?

  • Hi nga ku tiyisisa kuyini a kutsumba ka hina ka Jehova?

  • Hikuyini zi nga za lisima a ku tshama na hi khomekile mitirweni ya Mufumo?

1. (a) Xana a vanhu va maha yini loku va nyikiwa wusungukati, niku hikuyini? (b) Xana a matshanza ma nga khumbisa kuyini a mawonela ya munhu hi wusungukati?

A VANHU va kombisa ku amukela kutani ku nga amukeli wusungukati hi tindlela to hambanahambana. A xileletelo xi tako hi ka munhu wo kari a nga ni wuhosana xi nga tekela ku amukelwa, kuveni a wusungukati gi nyikwako hi munghana kutani munhu wa nyalidede gi nga ha aliwa zalezo. Loku munhu a nyikiwa wusungukati kutani ku layiwa wa zi kota ku tsaka, ku zangara kutani ku tsanwa. Kanilezi a vanwani va nga tizwa na va kuciwa ni ku tiyisiwa, zonake va maha za zi nene. Hikuyini ku nga ni kuhambana loko ke? A xinwe xa zigelo matshanza. Kunene, a matshanza ma nga onha kupima ka munhu laha ka kuza a ala wusungukati a tlhela a nga li woni a lisima la gona. — Mav. 16:18.

2. Hikuyini a maKristu ya lisine ma tsakelako a wusungukati ga Mhaka ya Nungungulu ke?

2 Hi tlhelo ginwani, a maKristu ya lisine ma tsaka hi ku nyikiwa wusungukati gi nene, nguvunguvu loku gi seketelwa Mhakeni ya Nungungulu. A zikhumbuxeto za Jehova za hi nyika wutlhari ga lisima, za hi gonzisa zi tlhela zi hi vuna ku potsa mitlhamu ya ku hlongolisela titshomba, wubhayi, ni ku delela byala kutani mimuri ya ku lahlisa mapimo. (Mav. 20:1; 2 Kor. 7:1; 1 Tes. 4:3-5; 1 Tim. 6:6-11) Tlhatakumbiri, ha giya “hi kutsaka ka timbilu” kota mbhanzu wa ku ingisa zikhumbuxeto za Nungungulu. — Isa. 65:14.

3. Matshamela muni ya mutsali wa tisimu lawa zi nga wa tava zi nene a ku ma pimanyisa?

3 Kasi hi hlayisa kuzwanana ka hina ni Dadani wa hina wa le tilweni, hi fanele ku simama ku hanya hi zileletelo za Jehova za wutlhari wutomini ga hina. Hi nga wona a kusaseka ka zona loku a matshamela ya hina ma fana ni lawa ya mutsali wa tisimu, loyi a ngaku: “A zikhumbuxeto za wena zi mahile tshomba ya mina kala kupinzuka, hakuva zi tsakisa a mbilu ya mina”! (Tis. 119:111) Xana hinawu ha tsakiswa hi zikhumbuxeto za Jehova, kutani hi zi wona kota nzhwalo ka zikhati zinwani ke? Hambu loku ka zikhati zo kari zi nga nanzihi a ku amukela wusungukati lego, hi nga mbheli ntamu. Ha zi kota a kuva ni kutsumba ko tiya ka wutlhari ga Nungungulu gi hunzeleleko kutlakuka! A hi wulawuleni hi tindlela tinharu ta ku maha lezo.

TIYISA A KUTSUMBA KA WENA HI MUKHONGELO

4. Xini xi nga cicangiko wutomini ga Davida?

4 Hosi Davida i’ve ni zimaho za zi nene ni za kubiha wutomini gakwe, kanilezi ku’ve ni lexi xi nga kala ku cica — kutsumba ko tiya ka Muvangi wakwe. I te ngalo: “Jehova, nzi tlakusa a muhefemulo wa mina ka wena. Nungungulu wa mina, nzi ku tsumbile.” (Tis. 25:1, 2) Xini xi vunileko Davida a kuva ni kutsumba loko hi Dadani wakwe wa le tilweni?

5, 6. Xana a Biblia gi hi byela yini hi kuzwanana loku Davida a nga hi nako na Jehova?

5 A vanhu vo tala va khongela ka Nungungulu ntsena loku va hi zikaratweni za hombe. U wa ta ti zwisa kuyini loku a munghana kutani xaka ga wena gi wo wulawula na wena ntsena loku gi lava mali kutani xivuno ke? Hi kufamba ka xikhati, u wa ta sangula ku kanakanela lexi xi mu mahako a ku lava. Davida i wa nga hi tano. A kuzwanana kakwe na Jehova ku ti kombile hi kukholwa ni liranzo lakwe hi Nungungulu wakwe wutomini gakwe gontlhe — zikhatini za zi nene ni zo biha. — Tis. 40:8.

6 Wona magezu ya Davida ya ku dumisa ni ku bonga Jehova: “Jehova, Hosi ya hina, gi dzunzekisile kuyini a vito ga wena misaveni yontlhe! Wena loyi u ti yimiseleko a wukosi ga wena hehla ka matilo.” (Tis. 8:1) A wu ku woni a kuzwanana ka hombe loku Davida a nga hi nako ni Dadani wakwe wa le tilweni ke? A lisima leli Davida a nga nyika wudzunzo ni kungangamela ka Nungungulu zi mu susumetile a ku dumisa Jehova “gontlhe siku.” — Tis. 35:28.

7. Hi vunekisa kuyini hi ku tshinela ka Jehova hi mukhongelo?

7 A ku fana na Davida, hi fanele ku wulawula na Jehova hi kukhanzakanya kasi hi tiyisa a kutsumba ka hina. A Biblia gi ngalo: “Tshinelani ka Nungungulu, na yena i ta tshinela ka nwina.” (Jak. 4:8) A ku tshinela ka Nungungulu hi mukhongelo i ndlela ya lisima ya ku kuma a moya wa ku basa. — Gonza 1 Johani 3:22.

8. Hikuyini hi nga faneliko ku phindaphinda magezu mikhongelweni ya hina?

8 Loku u kari u khongela, xana wa tala ku phindaphinda magezu yalawa ya manwe khati ni khati ke? Loku zi hi tano, ranga hi ku nyima u alakanyela na u nga se khongela. Loku hi phindaphinda magezu yalawa ya manwe ka xaka kutani munghana khati ni khati hi wulawulako naye, xana zi ta mu xalalisa? A nga ha sangula ku ti vala tindleve loku hi wulawula. Lisine lezaku Jehova a nga ta tshuka a ala a mukhongelo wa malanza yakwe yo tsumbeka wu humako mbilwini. Kanilezi i chukwana hi nga phindaphindi a magezu loku hi khongela.

9, 10. (a) Hi nga patsa yini mikhongelweni ya hina? (b) Zini zi to hi vuna a ku maha mikhongelo yo zwala?

9 Zi la su dlunya lezaku loku hi xuva ku tshinela ka Nungungulu, a mikhongelo ya hina yi nga tava yo hunzisa ntungu. Loku hi chulula nguvu a mbilu ya hina ka Jehova, hi ta tshinela nguvu ka yena hi tlhela hi mu tsumba nguvu. Hambulezo, zini hi faneleko ku zi patsa mikhongelweni ya hina? A Biblia ga hlamula: “Timhakeni tontlhe tivisani a mixuvo ya nwina ka Nungungulu hi kukombela ni kukhongotela, na mu kari mu bonga.” (Fil. 4:6) A mhaka yo tiya hi leyi: Ni xihi xi khumbako a kuzwanana ka hina na Jehova kutani wutomi ga hina kota malanza yakwe, hi fanele ku khongela ha xona.

10 Hi nga gonza zotala kambe ka mikhongelo ya vavanuna ni vavasati vo tsumbeka yi nga lomu ka Biblia. (1 Sam. 1:10, 11; Miti. 4:24-31) A bhuku ga Tisimu gi na ni mikhongelo yi humako mbilwini ni tisimu ti yimbelelweko Jehova. A kutizwa kontlhe ka munhu ka kubayiseka ka hombe ni ku giya hi kutsaka, za kombiswa ka mikhongelo ni tisimu leto. A ku ehleketa hi mikhongelo ya malanza lawo yo tsumbeka zi nga hi vuna a ku maha a mikhongelo yo zwala ka Jehova.

EHLEKETA HI ZIKHUMBUXETO ZA NUNGUNGULU

11. Hikuyini hi faneleko ku ehleketa hi zileletelo za Nungungulu?

11 Davida i te ngalo: “A zikhumbuxeto za Jehova zi tsumbekile, zi tlharihisa xipumbu.” (Tis. 19:7, NM) Ina, hambu loku hi nga tlharihangi, hi ngaza hi tlhariha loku hi ingisa milayo ya Nungungulu. Hambulezo, ku na ni zileletelo zo kari lomu ka Biblia zi lavako lezaku hi ehleketa khwatsi hi zona kasi hi vuneka. A zileletelo lezo zi nga ha yelana ni ku hlayisa kutsumbeka ka hina loku hi kucetelwa ku maha za kubiha xikoleni kutani mitirweni, ku namarela ka nayo wa Jehova xungetano hi nkhata, ku nga ti ngheniseli ka politika, ni ku lanzela matshinya ya milayo ya Biblia ka maambalela ni kutisasekisa. A kuva ni kupima ka Nungungulu timhakeni leti zi ta hi vuna ku wona zikarato lezo na zi nga se chikela. Hi kumaha loko, hi ta ti mahela xiboho mbilwini ya hina xa lezi hi faneleko ku maha loku hi kumana ni zikarato lezo. A kuehleketa loko ni ku ti longisela na ga ha hi mixo zi nga hi ponisa ka zikarato zo tala zi panzisako timbilu. — Mav. 15:28.

12. Zini lezi loku hi ehleketisisa hi zona zi to hi vuna a ku hlayisa zikhumbuxeto za Jehova ke?

12 Na ha ha rinzela a kutatiseka ka zitsumbiso za Nungungulu, xana a mahanyela ya hina ma komba lezaku ha hanyanya hi tlhelo ga moya ke? Hi xikombiso, ha kholwa hakunene lezaku Babuloni loyi wa Hombe i ta loviswa lokuloku? Xana a makatekwa lawa ma ha tako yo kota wutomi ga pinzukelwa paradiseni laha misaveni, ma ha hi ya lisine a ku fana ni xikhati lexi hi nga ma gonza hi khati go sangula? Ha ha hiseka wutirelini ni ku hi tsikile zilo za hina wutsumbu zi ranga wutomini ga hina ke? Ahati a xitsumbiso xa kuvuka ka vafileko, kubasiswa ka vito ga Jehova, ni kulwelwa ka wuhosi gakwe ke? Xana a zilo lezi zontlhe za ha hi za lisima ka hina? A ku ehleketa hi ziwutiso lezi zi nga hi vuna ku pimanyisa a mutsali wa tisimu, loyi a ngaku, “a zikhumbuxeto za [Nungungulu] zi mahile tshomba ya mina kala kupinzuka.” — Tis. 119:111.

13. Hikuyini a maKristu zi nga ma karatela ku zwisisa a timhaka to kari ka zana ga malembe go sangula? Nyika xikombiso.

13 A zilo zo kari zi kumbukiwako lomu ka Biblia zi nga tshuka zi nga zwisisiwi hi kumbhelela ka xikhati lexi hakuva a xi se chikela xikhati xa kuva Jehova a zi dlunyatisa. Jesu i byelile vapizani vakwe hi kuphindaphinda lezaku i wa ta xaniswa a tlhela a dawa. (Gonza Mateu 12:40; 16:21.) Kanilezi a vapostoli a va zi zwisisangi lezaku i wa wula kuyini. Va zi zwisisile anzhako ka loku a delwe a tlhela a vuka, laha a nga ambala a miri wa nyama, a woneka ka vapizani vo tala, a tlhela a “vulula a kupima kabye, lezaku kasi va fela ku pima mitsalo.” (Luka 24:44-46; Miti. 1:3) Hi kufanana, na moya wa ku basa wu nga se chululwa hehla kabye hi Pentekosta wa 33 Nguveni ya Hina, a valanzeli va Kristu va wa nga zi zwisisi lezaku a Mufumo wa Nungungulu wu wa ta yimiswa le tilweni. — Miti. 1:6-8.

14. Kusanguleni ka zana ga malembe ga wu 20, xikombiso muni xa xi nene xi vekilweko hi vamakabye vo tala, hambu lezi va nga kala ku zwisisa khwatsi a zilo zo kari xungetano hi masiku yo gumesa ke?

14 Hi kufanana, kusanguleni ka zana ga malembe ga wu 20, ku wa hi ni kurinzela ko tala ka hava xikari ka maKristu ya lisine xungetano hi lezi zi nga wa ta humelela “masikwini yo gumesa.” (2 Tim. 3:1) Hi xikombiso, a vokari va wa alakanya lezaku va wa ta tekiwa vaya tilweni hi 1914. A xikhati lexi va nga wona lezaku lezi va nga zi rinzela a zi mahekangi, va lo tshama hasi va hlola Mitsalo. A Mitsalo yi lo komba lezaku ku wa ha hi ni ntiro wa hombe wa kuxumayela lowu wu nga fanele ku mahiwa. (Mar. 13:10) Hikwalaho, hi 1922, J. F. Rutherford, loyi a nga rangela ntiro wa kuxumayela ka xikhati lexo, i lo byela lava va nga tlhanganile ka gotsovanyano wa matiko manyingi le Cedar Point, Ohio, Estados Unidos aku: “Cuwukani, a Hosi ya fuma makunu! Nwina mu vahuweleli va yona. Hikwalaho, huwelelani, huwelelani, huwelelani, a Hosi ni mufumo wa yona.” Kusukela kwalaho, a ntiro wa ku xumayela a “ivangeli ya mufumo” wu lova xifungo xa malanza ya Jehova ya xikhati lexi. — Mat. 4:23; 24:14.

15. Hi vunekisa kuyini hi ku ehleketa hi lezi Jehova a tirisanisako zona ni malanza yakwe?

15 Loku hi ehleketa hi ndlela yo hlamalisa leyi Jehova a nga tirisana hi yona ni vanhu vakwe, va xikhati xi hunzileko ni va xikhati lexi, zi hi maha hi tsumba nguvu a ntamu wakwe wa ku maha kuranza kakwe ni ku tatisa a kungo gakwe ka xikhati xi tako. Ka xikhati xalexi xa xinwe, a zikhumbuxeto za Nungungulu za hi vuna ku tshama na hi alakanya ziprofeto zakwe lezi za ha rinzelako ku tatiseka. Ha tiyiseka lezaku loku hi maha lezo zi ta hi vuna a ku tiyisa kutsumba ka hina a zitsumbisweni zakwe.

TIYISA A KUTSUMBA KA WENA HI MITIRO YA WUKHOZELI

16. Makatekwa muni hi ma kumako hi ku tshama na hi khomekile wutirelini?

16 Jehova Nungungulu wa hina, i Nungungulu wa ntamu, ni Nungungulu wa mitiro. A mutsali wa tisimu i lo wutisa aku: “Himani a nga ni ntamu wo fanana ni wa wena, Jehova”? I lo engeta aku: “A canja ga wena gi na ni ntamu; a canja ga wena ga xinene gi tlakukile.” (Tis. 89:8, 13) Kota a Nungungulu wa mitiro, Jehova wa bonga ni ku katekisa a mizamo ya hina yo yisa mahlweni a ntiro wa Mufumo. Wa zi wona lezaku a malanza yakwe — ya xinuna ni ya xisati, vanana ni vahombe — a ma tshami hasi maga “zakuga za wulolo.” (Mav. 31:27) Hi ku pimanyisa a Muvangi wa hina, hi tshama na hi khomekile mitirweni ya Nungungulu. A ku tirela Nungungulu hi mbilu yontlhe za hi bhinzulela nguvu, niku zi nyika Jehova a litsako la hombe la kuva a katekisa a wutireli ga hina. — Gonza Tisimu 62:12.

17, 18. Hikuyini hi nga wulako lezaku a mitiro ya kukholwa ya hi vuna ku tiyisa a kutsumba loku hi nga nako ka wusungukati ga Jehova? Nyika xikombiso.

17 Xana a mitiro ya kukholwa yi hi vunisa kuyini lezaku hi tiyisa kutsumba ka hina ka Jehova ke? Hi nga ehleketa hi matimu ya vaIsraeli ya kunghena kabye Tikweni gi Tsumbisilweko. Jehova i wa leletele a vapristi lezaku va teka a nghaxa ya xivumelwano va famba nayo kala Congweni wa Jordani. Hambulezo, a xikhati lexi a vanhu va nga tshinela kusuhani, va lo wona lezaku a congo wu wa tele hi mati hi kota ya tivula ni lezaku ma wa tsutsuma nguvu. Xana a vaIsraeli va wa ta kuyini? Va wa ta gwimba matenda yabye va tshama mbhirini ya congo, va mbheta maviki kutani xikhati xo leha na va rinzela lezaku a mati mapswha ke? Ahihi. Va lo tsumba Jehova hi kumbhelela va tlhela va lanzela zileletelo zakwe. Ku’ve ni wuyelo muni? A matimu me ngalo: ‘Loku mikonzo ya vapristi yi pelile matini, a mati ma lo yima, zonake a vanhu va lo tlhatuka hi laha ko cuwukana na Jeriko. Ni vapristi lava va rwalako a nghaxa ya xivumelwano xa Jehova va lo yima vaku tseka hi mikonzo lomu ku omileko kala vontlhe vanhu va tlhatuka Jordani.’ (Jox. 3:12-17) Hi nga alakanyela lezi zi khumbisileko zona a timbilu tabye a ku wona mati lawo yo tala na ma nyimile! Hakunene, a kukholwa ka vaIsraeli ka Jehova ku tiyisilwe hakuva va wa tsumba a zileletelo zakwe.

U ta tsumba Jehova a ku fana ni vanhu vakwe masikwini ya Joxua ke? (Wona nzimana 17 ni 18)

18 Lisine lezaku Jehova a nga mahi zihlamaliso lezo ka vanhu vakwe nyamutlha, kanilezi wa katekisa a mitiro yabye ya kukholwa. A ntamu wa Nungungulu wa va tiyisa lezaku va maha ntiro wabye wa ku xumayela mahungu ya Mufumo misaveni yontlhe. Niku Jesu Kristu, loyi a vuxilweko hi ka vafileko tlhelo Mboni ya Jehova ya hombe ka tontlhe, i lo tiyisekisa vapizani vakwe lezaku i wa tava zinwe navo ntirweni lowu wa lisima laha a ngaku: “Hikwalaho fambani, mu va maha vapizani a [vanhu va] matiko wontlhe . . . nzi na nwina a masiku wontlhe, na kona kugumelweni ka xikhati.” (Mat. 28:19, 20) A Timboni to tala ti nga hi ni tingana kutani ku chava ku bhula ni vanhu, ti zi wonile hi toce lezaku a moya wa ku basa wa Nungungulu wa ti tiyisa hlana kala ti zi kota ku kuwulawula ni vanhu ti nga va tiviko ntirweni wa simu. — Gonza Tisimu 119:46; 2 Va Le Korinte 4:7.

19. Kutiyiswa muni hi ku kumako, hambu loku hi tsanzeka ku maha zotala hi kota ya mababyi?

19 A vamakabye vo kari va xinuna ni va xisati va tsanzekiswa ku maha zotala hi mababyi kutani tanga. Hambulezo, va nga tiyiseka lezaku “a Dadani wa wuxinji ni Nungungulu wa kuchavelela kontlhe” wa zwisisa a xiyimo xa muKristu munwe ni munwani wa lisine. (2 Kor. 1:3) Wa tsaka hi kota ya zontlhe lezi hi mahako kasi ku yisa mahlweni a ntiro wa Mufumo. Hontlheni hi fanele ku tiva lezaku a ku kholwa muphahlweni wa Kristu hi zona nguvunguvu zi hanyisako a mihefemulo ya hina a xikhati lexi hi mahako zontlhe zi nga ntanwini wa hina. — Maheb. 10:39.

20, 21. Hi tihi tindlela to kari leti hi kombako hi tona lezaku ha mu tsumba Jehova?

20 A wukhozeli ga hina gi patsa ku tirisa xikhati, ntamu, ni titshomba ta hina kala laha hi zi kotako. Hi xuva ku “tira a ntiro wa muvangeli” hi mbilu ya hina yontlhe. (2 Tim. 4:5) Handle ko kanakana, ha tsaka hi ku maha lezo, kota lezi zi vunako vanwani lezaku ‘vava ni kutiva ka lisine.’ (1 Tim. 2:4) Zi la su dlunya, lezaku a ku dumisa Jehova, zi hi maha hi ganya hi tlhelo ga moya. (Mav. 10:22) Niku lezo zi hi vuna kuva ni kutsumba ko tiya ka Muvangi wa hina. — Rom. 8:35-39.

21 Kota lezi hi nga gonza, a ku tsumba Jehova lezaku a hi nyika wurangeli ga wutlhari a ziti halahala; hi fanele ku ti karata kasi hiva ni kutsumba loku. Hikwalaho, ti karatele ku khegela ka Jehova hi mukhongelo. Ehleketa hi lezi Jehova a tatisisileko zona a kuranza kakwe xikhatini xi hunzileko ni lezi a to mahisa zona xikhatini xi tako. Niku simama ku tiyisa a kutsumba ka wena ka Jehova hi mitiro ya wukhozeli. Hakunene, a zikhumbuxeto za Jehova zi ta tshama kala kupinzuka. Wenawu!

    Mabhuku ya ciTshwa (2000-2025)
    Huma
    Nghena
    • ciTshwa
    • Rumela
    • Ti hlawulele
    • Copyright © 2025 Watch Tower Bible and Tract Society of Pennsylvania
    • Nayo wa matirisela
    • Nayo wa cihundla
    • Privacy Settings
    • JW.ORG
    • Nghena
    Rumela