Tsumba Jehova xontlhe xikhati!

1-3. Xini xi nga vuna Paule lezaku a engetela ku tsumba Jehova? (Wona mufota laha hehla.)

A KUVA muKristu le Roma zi wa tisa makhombo yo tala. Hi 64 Nguveni ya hina va lo kumana ni tixanisa ta hombe, na va lumbetwa lezaku va vuxa woyonga lomu doropeni niku va na ni livengo hi vanhu. Loku u wa hi muKristu ka xikhati lexo, siku ni siku u wa ta hanya na uku ‘kuzilava nzi ta ta khonwa nzi biwa nyamutlha.’ A vokari xikari ka vamakabye va wena va moya va hlakatilwe hi zihari kutani va belelwe va tlhela va hiswa na va ha hanya kasi ku maha tikandiya ni wusiku.

² Kuzilava kuve ka xiyimo xalexo laha mupostoli Paule a nga valelwa paxweni le Roma hi khati ga wumbiri. Xana a maKristu manwani ma wa tata ma ta mu vuna ke? Za koteka ku ngha Paule a vile ni kukarateka ko kari hi mhaka leyo, hakuva i lo tsalela Timote aku: “A kutihlamuleleni ka mina ko ranga ku wa nga hi kona munhu loyi a nga nzi yimela, kanilezi vontlhe va lo nzi tsika; ngha va nga hlayelwi nanzu lowo.” Hambulezo, Paule i lo zi zwisisa lezaku i wa nga hi yece hi kumbhelela. I lo tsala lezi: “Kanilezi a Hosi yi lo nzi yimela, yi nzi tiyisa.” Kunene, Hosi Jesu i lo nyika Paule a ntamu lowu wu nga laveka. Wu mu vunisile kuyini a ntamu lowo wu tako hi ka Nungungulu? A mihanzu ya kona hi leyi: “Nzi lo hlangutwa nonwini wa nghala.” — 2 Tim. 4:16, 17.a

³ A ku alakanya ximaho lexo kuzilava zi mu tiyisile Paule, zi mu vuna ku tsumba lezaku Jehova i wa ta mu tiyisa kasi ku timisela a zikarato lezi a nga hi ka zona ni lezi zi nga hata. Kunene, i lo tekela ku wula lezi: “A Hosi yi ta nzi hlanguta mitirweni yontlhe ya kubiha.” (2 Tim. 4:18) Paule i wa gonzile lezaku hambu loku a vanhu va nga zi koti ku mu vuna, a xivuno xa Jehova ni N’wana wakwe xa lisine!

XIKHATI XA KU “TSUMBA JEHOVA”

4, 5. a) Himani a nga ku nyikako xivuno u xi lavako xontlhe xikhati? b) U nga gi tiyisisa kuyini a wunghana ga wena na Jehova?

⁴ U tshuka u ti wona na u nga hi na wa ku ku vuna ka xikarato xo kari u nga lwisana naxo? Kuzilava ku wa hi ku vumala ntiro, ku xaniswa xikoleni, xikarato xa lihanyo, kutani xiyimo xinwani xo nonoha. Kuzilava u kombele xivuno, kanilezi zo fana ni loku u nga kombelangi hakuva a nga kona a ku nyikileko xivuno lexo u nga xi lava. Kunene, a zikarato zinwani a zi nge mbheli hi ku vuniwa hi munhu. Ka ziyimo lezo, xana a wusungukati ga Biblia ga ku “tsumba Jehova” ga tira ke? (Mav. 3:5, 6) Kutani a gi vuni nchumu? Handle ko kanakana ga vuna! Jehova i nyika xivuno xa lisine, kota lezi zi kombiswako hi matimu yo tala ya Biblia.

⁵ Hikwalaho, wutshanwini ga ku veka xiviti loku a vanhu va nga zi koti ku ku nyika xivuno lexi u xi lavako, wona a xiyimo lexo kota lezi Paule a xi wonisileko zona — kota lungelo ga ku tsumba Jehova hi kumbhelela ni ku wona a kukhatala kakwe ka liranzo. Lezo zi ta ku maha u engetela ku mu tsumba zi tlhela zi maha wunghana ga wena na yena gi tiya nguvu.

A KU TSUMBA JEHOVA ZA LISIMA

6. Hikuyini zi tshukako zi karata nguvu ku tsumba Jehova loku hi hi ni zikarato?

⁶ Xana u nga hendleleta xikarato ka Jehova hi mukhongelo u tlhela uva ni kurula, hi ku tiva lezaku u mahile lezi u zi kotako hi xiyimo lexo niku yena i ta maha lezi zi seleko ke? Ina, u nga zi kota! (Gonza Tisimu 62:8; 1 Pedro 5:7.) A ku gonza ku maha lezo za lisima kasi ku tiyisa a wunghana ga hina na Jehova. Hambulezo, a ku tsumba lezaku Jehova i ta ku nyika a xivuno lexi u xi lavako za tshuka zi karata. Hikuyini? A xinwe xa zigelo ku ngava lezaku Jehova a nga hlamuli mikhongelo yontlhe kwalaha ni kwalaha. — Tis. 13:1, 2; 74:10; 89:46; 90:13; Hab. 1:2.

7. Hikuyini Jehova a kalako a nga hlamuli yontlhe a mikhongelo ya hina kwalaha ni kwalaha?

⁷ Hikuyini Jehova a nga tekeliko ku hlamula ni xihi xikombelo hi xi mahako? Alakanya lezaku i fananisa a wunghana ga hina naye ni legi ga n’wana ni raru. (Tis. 103:13) A n’wana a nga rinzeli lezaku a mupswali a mu nyika ni xihi a xi lavako kutani ku mu nyika kwalaha ni kwalaha. A zikombelo zo kari za nwanana zi ngava za xikhatanyana zi hunza. A zinwani i fanele ku rinzela kala ku chikela xikhati xi faneleko. A zinwani kambe a zi laveki hakuva zi ta mu vangela zikarato yena kutani vanwani. Tlhatakumbiri, a ku tekela ku nyika nwanana ni xihi a kombelako zi wa ta cica a ku tirisana ka n’wana ni raru ku maha ka hosi ni nanza, laha a n’wana a nga hosi. Hi kufanana, Jehova a nga ha tsika xikhati xi hunza na a nga se hlamula mikhongelo ya hina, na a mahela ku hi vuna. Lego hi gona tshamela ga yena kota Muvangi wo tlhariha, tlhelo Hosi ya liranzo, ni Dadani wa le tilweni. A ku tekela ku maha zontlhe lezi hi zi kombelako kwalaha ni kwalaha zi wa ta onha a wunghana ga hina naye. — Ringanisa na Isaya 29:16; 45:9.

8. Jehova i tsumbisa yini xungetano hi kugumelwa ka hina?

⁸ A xigelo xinwani hi lezaku Jehova wa ku tiva khwatsi a kugumelwa ka hina. (Tis. 103:14) Hikwalaho, a nga rinzeli lezaku hi timisela hi ntamu wa hina wutsumbu, kanilezi i hi nyika a xivuno xakwe xa wuraru. Kunene, ka zikhati zo kari hi nga ha alakanya lezaku a ha hi na xo maha. Kanilezi Jehova wa hi tiyisekisa lezaku a nga ta tshuka a tsika malanza yakwe ma ringwa ku hunza lezi ma zi kotako ku zi timisela. I ta hi “mahela a ndlela ya kupona” (Gonza 1 Va Le Korinte 10:13.) Hikwalaho, hi na ni xigelo xo zwala xa ku tsumba lezaku Jehova wa zi tiva lezi zi nga ntanwini wa hina.

9. Zini hi faneleko ku maha loku hi nga tekeli ku tlhatlhelwa zikarato za hina anzhako ka kuva hi khongele?

⁹ Loku a zikarato za hina zi nga tekeli ku tlhatlhiwa anzhako ka kuva hi khongele, a hi rinzeleni Loyi a xi tivako a xikhati xi nene xa ku hi vuna. Alakanya lezaku yenawo o timisela, hakuva i xuva nguvu ku hi tlhatlhisa. “Jehova i ta rinzela . . . kasi a fela ku mu zwela wusiwana. Hakuva Jehova hi Nungungulu a lulamileko, va katekile vontlhe va mu rinzelako.” — Isa. 30:18.

“NONWINI WA NGHALA”

10-12. a) A xiyimo xi nga tshuka xi mu binzelisa kuyini a muKristu a hlayisako xaka gi nga ni mababyi yo kala ma nga hunzi ke? b) A kutsumba Jehova zikhatini zo nonoha zi nga gi khumbisa kuyini a wunghana ga hina na yena? Nyika xikombiso.

¹⁰ Loku u hi zikaratweni za hombe, u nga ha ti zwisa ku khwatsi hi Paule — u ku khwatsi u lomu “nonwini wa nghala” kutani kusuhani nguvu nawo. Ka zikhati lezo a ku tsumba Jehova za karata nguvu, kanilezi hi kwalaho zi lavekako nguvu. Hi xikombiso, hi nga ti alakanyela na u khatalela xaka gi nga ni mababyi yo kala ma nga hunzi. Kuzilava u khongela nguvu u kombela wutlhari ni ntamu.b Anzhako ka ku maha zontlhe zi nga ntanwini wa wena, xana a wu kumi kurula ko kari hi ku tiva lezaku Jehova wa ku wona niku i ta ku nyika lezi zi lavekako kasi u simama ku timisela hi kutsumbeka ke? — Tis. 32:8.

¹¹ A ziyimo zo kari zi nga tshuka zi ku maha u alakanya lezaku Jehova a nga ku vuni. U nga ha nyikwa mawonela yo lwisana hi vadokodela. Kutani a maxaka, lawa u nga tsumba lezaku ma ta ku vuna ma nga ha nonohisa nguvu a xiyimo xa wena. Simama ku hlota ntamu ka Jehova. Simama ku tshinela ka yena. (Gonza 1 Samueli 30:3, 6.) A xikhati lexi a zikarato lezo zi to hunza, a wunghana ga wena naye gi ta ngha gi engetele ku tiya.

¹² Lindac i sangulile ku zwisisa mhaka leyi anzhako ka malembe yo kari na a vunetela ku khatalela vapswali vakwe ka malembe yo gumesa ya kuhanya kabye. I ngalo: “Na ha halwa ni xikarato lexi, mina ni nuna wa mina, ni makabye wa mina zi wa hi karatela ku tiva xo maha. Ka zikhati zo kari hi wa tizwa hi nga hi na ntamu. Hambulezo, loku hi cuwuka nzhako ha zi wona khwatsi lezi Jehova a nga ti kombisa zona ku i na hina. I lo hi tiyisa a tlhela a hi nyika lezi hi nga zi lava, hambu loku zi wonekisa ku khwatsi hi gumelwe.”

13. A ku tsumba Jehova zi vunisile kuyini makabye wo kari a ku lwisana ni zikarato?

¹³ A ku tsumba Jehova hi kumbhelela zi nga hi vuna kambe loku hi kumana ni makhombo. Laha a nuna wa Rhonda, loyi a nga hiko Mboni, a nga kari a lulamisela maphepha ya ku tlhatlha wukati, a makabye wakwe i lo khonwa mababyi ya lupus, lawa ma nga mababyi ma dayako. Anzhako ka tihweti to kari, a makabye wakwe i lofa. Laha Rhonda a nga alakanya lezaku i sangulile ku rivala a zikarato lezo za hombe, i lo teka wuphayona ga xikhati xontlhe. Anzhako ka xikhatanyana, a mamani wakwe i lofa. Xini xi vunileko Rhonda a ku timisela zikarato lezo? I ngalo: “Nzi wa bhula na Jehova siku ni siku, hambu ka zilo za zi tsongwanyani. A ku maha lezo zi nzi vunile ku wona Jehova kota wa lisine. Zi nzi gonzisile ku tsumba yena wutshanwini ga ku ti tsumba kutani ku tsumba vanhu vanwani. Niku i wa nzi nyika xivuno xa lisine — i wa khatalela zilaveko za mina zontlhe. Kota wuyelo ga kona, nzi lo ti wona na nzi tira zinwe na Jehova.”

14. Ku tsumba muni va nga vako nako lava va nga ni maxaka ma susilweko bandleni?

¹⁴ A xikombiso xinwani hi lexi. Hi nga alakanya ku tshuka a xaka go kari gi susiwa bandleni. Hi xigonzo xa wena xa Biblia wa zi tiva lezi hi faneleko ku va khomisa zona a vanhu va susilweko bandleni. (1 Kor. 5:11; 2 Joh. 10) Hambulezo, a ku khomelela ka xiboho lexo zi nga tshuka zi karata nguvu, kutani ku wonekisa ku khwatsi a zi koteki.d Xana u ta tsumba lezaku a Dadani wa wena wa le tilweni i ta ku nyika a ntamu lowu wu lavekako kasi u zi kota ku khomelela ka xileletelo xa Biblia mayelano ni lava va susilweko bandleni? Wa wona lungelo ga ku tiyisa a wunghana ga wena na Jehova hi ku wumba kubohana ka hombe naye ke?

15. Hikuyini Adamu a nga kala ku ingisa a nayo wa Jehova le Edeni?

¹⁵ Ka mhaka leyi, ehleketa kutsongwani hi wanuna sangula, Adamu. I wa kholwa hakunene lezaku i ta simama a hanya hambu loku a tsika ku ingisa Jehova ke? Ahihi, hakuva a Mitsalo yi hi byela lezaku “a hi Adamu a nga khohliswa.” (1 Tim. 2:14) Makunu, hikuyini a nga kala ku ingisa? Kuzilava Adamu i gile a hanzu lowu Eva a nga mu nyika hi ku ranza sati wakwe. I lo ingisa gezu gakwe wutshanwini ga ku ingisa Nungungulu wakwe, Jehova. — Gen. 3:6, 17.

16. A liranzo la hina li fanele kuya ka mani kuranga, niku hikuyini?

¹⁶ Xana lezo zi wula lezaku a hi faneli kuva ni liranzo la hombe hi maxaka ya hina? Ahihi! Hambulezo, a liranzo la hina la hombe li fanele kuya ka Jehova kuranga. (Gonza Mateu 22:37, 38.) A ku maha lezo hi lisine ku kombisa liranzo hi maxaka ya hina, na ku nga khataliseki lezaku ma tirela Jehova zezi kutani a ma mu tireli. Hikwalaho simama ku tiyisa a liranzo la wena ha Jehova u tlhela u engetela ku mu tsumba. Niku loku u karateka hi kota ya wutomi ga xaka go kari gi susilweko bandleni, chulula a mbilu ya wena ka Jehova hi mukhongelo.e (Rom. 12:12; Fil. 4:6, 7) Tirisa a xiyimo lexo xo bayisa kasi ku tiyisa a wunghana ga wena na Jehova. Lezo zi ta ku vuna ku hlota Jehova na u tsumba lezaku i ta ku nyika xivuno xa lisine.

NA WA HA RINZELA

17. A xikhati hi hisekako kuxumayeleni ka Mufumo, hi kombisa kuyini lezaku ha mu tsumba Jehova?

¹⁷ Hikuyini Paule a nga “hlangutwa nonwini wa nghala”? I ngalo: “Kasi a mhaka ya fela ku biwa hungu hi mina matlhelweni wontlhe, lezaku a vamatiko vontlhe va fela kuzwa.” (2 Tim. 4:17) A xikhati lexi hinawu hi khomekako hi ntiro wa kuxumayela, a ku fana na Paule, hi tsumba lezaku Jehova i ta maha lezaku hi “engetelwa” zontlhe zilo le’zinwani zi lavekako. (Mat. 6:33) Kota vaxumayeli va Mufumo, hi ‘nyikilwe a ntiro wa mahungu yo saseka,’ niku Jehova i hi wona kota “zitiri-kulobye.” (1 Tes. 2:4; 1 Kor. 3:9) Hi ku hiseka nguvu hi laha hi zi kotako hi kona ntirweni wa Nungungulu, zi ta hi olovela ku rinzela a kutlhatlhiwa ka zikarato za hina.

18. Hi nga maha yini kasi ku engetela ku tsumba Jehova ni ku tiyisa a wunghana ga hina naye?

¹⁸ Ngha hi tirisa a xikhati lexi kasi ku tiyisa a wunghana ga hina na Jehova. Loku a xiyimo xo kari xi hi maha hi karateka, a hi xi tiriseni kasi ku tshinela nguvu ka Jehova. Hi xigonzo xo eta xa Mhaka ya Nungungulu, ku khongela hi nga tsiki, ni ku tshama hi khomekile hi mitiro ya moya, ngha hi tsumba lezaku Jehova i na ni ntamu wa ku hi vuna niku i ta hi khatalela zikaratweni lezi hi kumako nazo zalezi ni zontlhe lezi za ha tako.