Xana Jehovha i ta hlamula mikhongelo ya mina?

1-2. Hikuyini hi nga tshukako hi ti zwisa ku khwatsi Jehovha a nga hlamuli mikhongelo ya hina?

‘TI XALALISE ha Jehovha, yena i ta ku nyika a kuxuva ka mbilu ya wena.’ (Lis. 37:4) A hi ku hlamalisa ka citsumbiso leci! Kanilezvi, hi fanele ku rindzela lezvaku Jehovha a tekela ku hi nyika zvontlhe hi kombelako? Hikuyini a ciwutiso leci ci nga ca lisima? Ehleketa hi zviyimo zvi landzelako. A makabye wa cisati a nga chadhangiko a khongelela a kuya Cikoleni ca Vavhangeli va Mufumo. Kanilezvi ku hundza malembe yo tala, niku i simama ku nga rambiwi. A makabye wo kari wa muswa i kombela Jehovha lezvaku a mu hanyisa ka mababyi ya hombe a nga nawo kasi a zvi kota ku maha zvo tala lomu bandleni. Kanilezvi a nga chukwati. A vapswali vo kari va maKristu khongelela ku a n’wana wabye a simama lisineni. Kanilezvi a n’wana wabye i boha ku nyima ku tirela Jehovha.

² Kuzvilava wenawu u kombelile cokari ka Jehovha, kanilezvi a wu se hlamuliwa. Kota wuyelo, kuzvilava u nga chikelela a magumo ya lezvaku Jehovha wa hlamula mikhongelo ya van’wani, kanilezvi leyi ya wena a nga hlamuli. Kutani ku alakanya ku ci kona u nga wonha. Hi zvalezvo a makabye wo kari waku hi Janiceb a nga ti zwisa zvona. Yena ni nuna wakwe va khongele xungetano hi mixuvo yabye ya kuya tira Bheteli. I wula lezvi: “Ndzi wa tiyiseka lezvaku hi ta rambiwa kasi ha tira Bheteli na zvi nga tekangi cikhati.” Kanilezvi ku no hundza tihweti ni malembe na va nga se rambiwa. Janice i wula lezvi: “Ndzi no kwata ndzi tlhela ndzi karateka. Ndzi ti wutisa ku cini ndzi nga mu gohela Jehovha. Ndzi khongele nguvhu xungetano hi kuya Bheteli. Hikuyini a nga kala ku hlamula mukhongelo wa mina?”

3. Zvini hi to bhula hi zvona ka ndzima leyi?

³ Ka zvikhati zvo kari, hi nga ha ti wutisa ku Jehovha wa ingisela mikhongelo ya hina. Hambu a vavanuna vo kari vo tsumbeka va cikhatini ci hundzileko va ti wutisile zvo fana. (Joba 30:20; Lis. 22:2; Hab. 1:2) Cini ci nga ku kholwisako lezvaku Jehovha i ta hlamula a mikhongelo wa wena? (Lis. 65:2) Kasi ku hlamula ciwutiso leci, hi ta ranga hi ku hlamula a zviwutiso lezvi: 1) Zvini hi nga zvi rindzelako ka Jehovha? 2) Zvini lezvi Jehovha a zvi rindzelako ka hina? 3) Hikuyini zvi nga lavako ku hi chukwatisa zvokari ka lezvi hi kombelako?

ZVINI HI NGA ZVI RINDZELAKO KA JEHOVHA?

4. Hi kuya hi Jeremiya 29:12, zvini lezvi Jehovha a tsumbisako ku maha?

⁴ Jehovha i tsumbisa ku ingisela mikhongelo ya hina. (Lera Jeremiya 29:12.) Nungungulu wa ma randza a malandza yakwe yo tsumbeka, hikwalaho a nga ta tshuka a nga cheli kota hi mikhongelo yabye. (Lis. 10:17; 37:28) Hambulezvo, lezvo a zvi wuli lezvaku i ta hi nyika zvontlhe lezvi hi mu kombelako. Zvi nga tshuka zvi lava ku hi rindzela kala misaveni yiswa na hi nga se amukela a zvilo zvo kari hi mu kombeleko.

5. Zvini lezvi Jehovha a vekako kupima ka zvona loku a ingisela mikhongelo ya hina? Tlhamusela.

⁵ Jehovha wa hlola lezvi a mikhongelo ya hina yi yelanisako zvona ni kungo gakwe. (Isa. 55:8, 9) A gin’we ga makungo yakwe ku tata misava hi vavanuna ni vavasati vo tsaka ni vo zwanana lava va mu ingisako kota Hosi yabye. Kanilezvi Sathani i wula ku a vanhu va wa ta tsaka loku va ti fuma ha voce. (Gen. 3:1-5) Kasi ku komba lezvaku lezvi Dhiyabho a nga zvi wula mawunwa, Jehovha i vhumeleli vanhu a ku va ti fuma ha voce. Hambulezvo, a mufumo wa vanhu wu vangile zvikarato zvo tala lezvi hi kumanako nazvo nyamutlha. (Mutsh. 8:9) Ha zvi zwisisa lezvaku Jehovha a nga ta fuvisa a zvikarato zvontlhe lezvi ka cikhati leci. Loku i wo zvi fuvisa zvezvi, a vanhu lava va kalako va nga kholwi ka Nungungulu va wa ta alakanya ku mifumo ya vanhu yi fuvisako a zvikarato. Va wa ta pimisa ku a vanhu zvi nga va fambela khwatsi loku va ti fuma ha voce.

6. Hikuyini hi faneleko ku tiyiseka lezvaku contlhe cikhati Jehovha i ta hlamula a mikhongelo ya hina hi ndlela ya lirandzo ni ya kululama?

⁶ Jehovha a nga hlamula a mikhongelo yo fana hi tindlela to hambana. Hi cikombiso, a cikhati leci Hosi Ezekhiya a nga babya nguvhu, i kombelile Jehovha kasi a mu hanyisa. Niku Jehovha i no mu hanyisa futsi. (2 Tih. 20:1-6) Kanilezvi, a cikhati leci mupostoli Pawule a nga khongotela Jehovha lezvaku a mu susela “muzwa nyameni,” kuzvilava a mu hanyisa mababyi yo kari, Jehovha a nga mu suselangi cikarato cakwe. (2 Kor. 12:7-9) Ehleketa kambe hi cikombiso ca mupostoli Jakobe na Pedro. Hosi Herodhi i wa lava ku va daya. A bandla gi no khongelela Pedro na Jakobe. Hambulezvo, Jakobe i no dawa, kanilezvi Pedro i no ponisiwa hi ngilozi. (Miti. 12:1-11) Hi nga ha ti wutisa ku, ‘hikuyini Jehovha a nga ponisa Pedro kanilezvi a nga ponisi Jakobe?’ A Bhibhiliya a gi wuli.c Leci hi nga tiyisekako ka cona ku a tindlela ta Jehovha a ti na “kukanganyisa”. (Deut. 32:4) Niku ha zvi tiva lezvaku Pedro na Jakobe hi wumbiri gabye va wa tsakelwa hi Jehovha. (Kuv. 21:14) Ka zvikhati zvo kari, Jehovha a nga tshuka a nga hlamuli a mikhongelo ya hina hi ndlela leyi hi yi rindzelako. Kanilezvi a hi soli lezvi a hlawulako ku hi hlamulisa zvona, hakuva ha zvi tiva ku Jehovha i hlamula mikhongelo ya hina hi ndlela ya lirandzo ni yo lulama. — Joba 33:13.

7. Zvini hi zamako ku zvi potsa niku hikuyini?

⁷ Hi zama ku potsa ku fananisa a ciyimo ca hina ni ca van’wani. Hi cikombiso, hi nga tshuka hi kombela ku Jehovha a hi vhuna hi ndlela yo kari, kanilezvi a mukhongelo wa hina wu nga hlamuliwi. Hi ndzhako ka cikhati, hi tiva lezvaku a wokari i kombelile zvo fana, niku zvi wonekisa ku khwatsi Jehovha i mu hlamulile. Lezvo zvi humelele makabye wo kari waku hi Anna. I khongeleli ku a nuna wakwe, Matthew, a hanya kankro. Ka cikhati caleci ca cin’we, a vamakabye vambiri va cisati va khosaheleko vonawu va wa hi ni kankro. Anna i no khongelela Matthew ni vamakabye lavo. A vamakabye lavo va hanyile, kanilezvi Matthew i nofa. Kusanguleni, Anna i no ti wutisa ku, a ku Jehovha i no va vhuna ku va hanya ke? Makunu loku zvi hi lezvo, hikuyini a nga kala ku hlamula mukhongelo wakwe kasi a nuna wakwe a hanya? Hi lisine, a hi zvi tivi a ku cini ci nga hanyisa a vamakabye lavo va vambiri va cisati. Kanilezvi ha zvi tiva lezvaku Jehovha i ta mbheta zvontlhe zvi hi xanisako, niku wa zvi xuva nguvhu a ku vhuxa vanghana vakwe lava va fileko. — Joba 14:15.

8. a) Hi kuya hi Isaya 43:2, Jehovha i hi vhunisa kuyini? b) A mukhongelo wu nga hi vhunisa kuyini loku hi kumana ni zvikarato zvo bindza? (Wona a vhidhio As Orações Ajudam-nos a Lidar com Problemas.)

⁸ Contlhe cikhati Jehovha i ta hi vhuna. Kota Papayi wa hina wa lirandzo, Jehovha a nga zvi lavi ku hi wona na hi xaniseka. (Isa. 63:9) Hambulezvo, a nga hi vhikeli ka zvontlhe zvikarato zva hina, lezvi zvi nga fananisiwako ni malangavi ya ndzilo kutani micongo. (Lera Isaya 43:2.) Kanilezvi, i hi tsumbisile ku i ta hi vhuna ku zvi “tsemakanya”. Niku hambu loku ho kumana ni zvikarato zva tshamela muni, a nga ta zvi tsika zvi hi tsandzekisa ku hi mu tirela. Jehovha i tlhelile a hi nyika a moya wakwe wo basa wa ntamu kasi wu hi vhuna ku timisela. (Luka 11:13; Filp. 4:13) Hikwalaho, hi nga tiyiseka lezvaku contlhe cikhati i ta hi nyika lezvi zvi lavekako kasi hi zvi kota ku timisela ni ku simama hi tsumbekile kakwe.d

ZVINI LEZVI JEHOVHA A ZVI RINDZELAKO KA HINA?

9. Hi kuya hi Jakobe 1:6, 7, hikuyini hi faneleko ku kholwa lezvaku Jehovha i ta hi vhuna?

⁹ Jehovha i rindzela ku hi mu tsumba. (Mah. 11:6) Ka zvikhati zvin’wani a zvikarato zva hina zvi nga wonekisa ku khwatsi a zvi na muri. Kuzvilava hi nga sangula ku kanakana lezvaku hakunene Jehovha wa hi vhuna. Kanilezvi a Bhibhiliya ga hi tiyisekisa lezvaku hi ntamu wa Nungungulu hi nga “tlula ligingisi.” (Lis. 18:29) Wutshan’wini ga ku tsika ku kanakana ka hina ku kula, hi fanele ku khongela hi kukholwa, na hi tsumba lezvaku Jehovha i ta hlamula mikhongelo ya hina. — Lera Jakobe 1:6, 7.

10. Nyika cikombiso ca kutikarata hi faneleko ku ku maha andzhako ka loku hi khongelile ka Jehovha hi kombela civhuno.

¹⁰ Jehovha i rindzela lezvaku i maha zvilo zvi yelanako ni mikhongelo ya hina. Hi cikombiso, a makabye wo kari a nga kombela Jehovha kasi a mu vhuna ku kuma folga ntirweni wakwe kasi a ya wona gotsovanyano wa muganga. Jehovha a nga wu hlamulisa kuyini a mukhongelo lowu? Kuzvilava a nga mu nyika kutiya hlanha loku a makabye loyi a ku lavako kasi a ya kombela patrawu wakwe. Kanilezvi zvi ta lava ku a ya ka patrawu wakwe a ya kombela. Zvi nga lava ku a kombela hi kuphindaphinda. A nga tlhela a kombela ku cicana ni mutiri-kuloni. Niku loku zvi laveka, a nga ti nyikela ku suka ka siku lego hambu loku zvi lava ku va mu tsemela muholo.

11. Hikuyini hi faneleko ku khongela hi kuphindaphinda?

¹¹ Jehovha i rindzela ku hi khongela hi kuphindaphinda xungetano hi lezvi zvi hi karatako. (1 Tes. 5:17) Jesu i wulile ku a mikhongelo yo kari hi mahako yi wa nga ta tekela ku hlamuliwa. (Luka 11:9) Hikwalaho, u nga mbheli ntamu! Khongela hi kuphindaphinda. (Luka 18:1-7) Loku hi khongela hi kuphindaphinda, hi komba Jehovha lezvaku lezvi hi zvi khongelelako ho zvi lava hakunene. Hi komba kambe lezvaku i na ni ntamu wa ku hi vhuna.

HIKUYINI ZVI NGA LAVAKO KU HI CHUKWATISA ZVOKARI KA LEZVI HI KOMBELAKO?

12. a) Hi cihi a cin’we ca zviwutiso lezvi hi faneleko ku ti wutisa xungetano hi lezvi hi zvi khongelako, kona hikuyini? b) Hi nga tiyisekisa kuyini ku a mikhongelo ya hina ya kombisa cichavo hi Jehovha? (Wona a kwadru “A mikhongelo ya mina ya kombisa cichavo hi Jehovha?”)

¹² Loku hi nga kumi lezvi hi kombelako ka mukhongelo, hi nga ti wutisa zviwutiso zvinharu. Co sangula hi leci ci nge: ‘Lezvi ndzi zvi khongelelako zvilo zva zvinene?’ A zvikhati zvo tala, hi alakanya ku ha zvi tiva lezvi zvi nga zvinene ka hina. Kanilezvi a zvilo lezvi hi kombelako kuzvilava a zvi nge hi vhuni hi cikhati co leha. Loku ku hi ku hi khongela hi kota ya cikarato co kari, kuzvilava ku ngava ni malulamisela ya chukwana yo hundza lawa hi ma kombelako. Niku a zvin’wani hi zvi kombelako kuzvilava a zvi yelani ni kurandza ka Jehovha. (1 Joh. 5:14) Hi cikombiso, wona a tshango ga vapswali lava kumbukilweko kusanguleni. Va wa kombelile Jehovha kasi ku a n’wana wabye a simama lisineni. Zvi wonekisa ku khwatsi leco cikombelo ca cinene. Hambulezvo, Jehovha a nga ta hi kurumeta ku hi mu tirela. I lava ku hontlheni a ku patsa ni vana va hina, hi hlawula ku mu tirela. (Deut. 10:12, 13; 30:19, 20) Hikwalaho, a vapswali va nga kombela Jehovha lezvaku a va vhuna ku khumba timbilu ta vana vabye kasi va kuceka ku randza Jehovha ni kuva vanghana Vakwe. — Mav. 22:6; Efe. 6:4.

13. Hi kuya hi Mahebheru 4:16, hi rini laha Jehovha a to hi vhuna? Tlhamusela.

¹³ A ciwutiso ca wumbiri hi leci: ‘A ku leci hi cona cikhati ca Jehovha ca ku hlamula mukhongelo wa mina?’ Hi nga tshuka hi alakanya ku hi lava ku hlamuliwa zva kwalaha ni kwalaha. Kunene, Jehovha wa ci tiva cikhati ca cinene kasi ku hi vhuna. (Lera Mahebheru 4:16.) Loku hi nga tekeli a ku hlamuliwa a mukhongelo wa hina, hi nga alakanya ku Jehovha o ala ku hi hlamula. Kuveni kuzvilava o hi byela ku a ci se chikela cikhati. Hi cikombiso, tlhela u ehleketa hi makabye wa muswa loyi a nga khongela kasi a hanyisiwa a wubabyi gakwe. Loku Jehovha i wa no mu hanyisa hi ndlela yo hlamalisa, Sathani na a wulile ku a makabye loye i simama ku tirela Jehovha hi kota ya lezvi a nga mu hanyisa. (Joba 1:9-11; 2:4) A cin’wani kambe, Jehovha i sina a vekile cikhati ca ku fuvisa mababyi wontlhe. (Isa. 33:24; Kuv. 21:3, 4) Niku kala ka cikhati leco, a hi nge rindzeli ku Jehovha a hi hanyisa mababyi ya hina hi zvihlamaliso. Hikwalaho, a makabye loye a nga kombela Jehovha lezvaku a mu tiyisa ni ku mu nyika kurula ka mapimo kasi a timisela wubabyi gakwe ni ku simama a tirela Nungungulu hi kutsumbeka. — Lis. 29:11.

14. U gondza yini ka matimu ya Janice?

¹⁴ Ehleketa hi cikombiso ca Janice, loyi a nga khongela a kombela ku ya tira Bheteli. Andzhako ka ntlhanu wa malembe, i zvi zwisisile ku Jehovha i wa hlamulile mukhongelo wakwe hi ndlela yo hambana ni leyi a nga yi rindzele. I wula lezvi: “Jehovha i tirisile cikhati leco kasi ku ndzi gondzisa ni ku ndzi vhuna kuva muKristu wa munene. Ndzi wa fanele ku engetela ku mu tsumba. Ndzi wa fanele ku chukwatisa a magondzela ya mina a Bhibhiliya. Niku ndzi wa fanele ku tiva ku ndzi nga tsaka loku ndzi tirela Jehovha ka ni gihi wutshamu.” Hi kugumesa, Janice ni nuna wakwe va no rambiwa ku tira ku endzela mabandla ya cipandze. Loku a cuwuka ndzhako, Janice i wula lezvi: “Jehovha i hlamulile mikhongelo ya mina hambu lezvi a nga hlamula hi ndlela ya ku a ndzi yi rindzelangi. Zvi tekile cikhati kasi ndzi wona kusaseka ka hlamulo wakwe, kanilezvi ndza bonga nguvhu hi lezvi ndzi ngava ni thomo ga kuzwa a lirandzo lakwe ni wunene gakwe.”

15. Hikuyini zvi nga lavako ku hi nga khongeleli a nchumu wo kongoma? (Wona ni mufota.)

¹⁵ A ciwutiso ca wunharu hi leci: ‘Ndzi fanele ku khongela hi nchumu wun’wani?’ Zvinene a ku kombela zvilo zvo kongoma mikhongelweni ya hina. Kanilezvi, ka zvikhati zvo kari zvi ngava chukwana a ku nga kombeli nchumu wo kongoma kasi hi tiva a ku zvini lezvi Jehovha a zvi lavako ka hina. Ehleketa hi cikombiso ca makabye wo kari wa cisati a nga khongelela kuya Cikoleni ca Vavhangeli va Mufumo. I wa xuva kuya cikoleni leco kasi a tira lomu ku nga ni cilaveko ca hombe ca vahuweleli. Hikwalaho, laha a nga simama ku khongela kasi a rambiwa kuya Cikoleni ca Vavhangeli va Mufumo, i wa kombela Jehovha kasi a mu komba tindlela tin’wani kasi a engetela ntiro wakwe. (Miti. 16:9, 10) I wa ta maha zvilo zvi yelanako ni mukhongelo wakwe, hi ku wutisa a muwoneleli wakwe wa cipandze a ku ku ngava ni bandla laha kusuhani gi nga ni cilaveko ca maphayona. Kutani ku i wa ta tsalela a hofisa ya ravi a wutisa lomu ku nga ni cilaveko ca vahuweleli va Mufumo.e

16. Zvini hi faneleko ku tiyiseka ka zvona?

¹⁶ Kota lezvi hi gondzileko, hi nga tiyiseka lezvaku Jehovha i ta hlamula a mikhongelo ya hina hi ndlela ya lirandzo ni yo lulama. (Lis. 4:3; Isa. 30:18) Ka zvikhati zvin’wani hi nga tshuka hi nga kumi hlamulo hi nga wu rindzela. Kanilezvi Jehovha a nga ta tshuka a ti vhala tindleve ka mikhongelo ya hina. Jehovha wa hi randza nguvhu. Niku a nga ta tshuka a hi tsika. (Lis. 9:10) Hikwalaho, simama ku tsumba “yena masiku wontlhe,” hi ku chulula a mbilu ya wena kakwe hi mukhongelo. — Lis. 62:8.