Jehovha i hlamulisa kuyini a mikhongelo ya hina?

1-2. Zvini hi nga ti wutisako xungetano hi mikhongelo ya hina?

U TSHUKA u ti wutisa ku xana Jehovha wa hlamula mikhongelo ya wena? Loku zvi hi lezvo, a hi wena wece. A kutala ka vamakabye va ti maha ciwutiso leci, nguvhunguvhu loku va kumana ni zvikarato. Hinawu loku hi kari hi xaniseka, zvi nga hi karatela a ku wona lezvi Jehovha a hlamulisako zvona mikhongelo ya hina.

² Hi ta wona ku hikuyini hi nga tiyisekako a ku Jehovha wa hlamula a mikhongelo ya vakhozeli vakwe. (1 Joh. 5:15) Hi ta tlhela hi hlamula a zviwutiso lezvi: Hikuyini ka zvikhati zvin’wani zvi nga wonekisako ku khwatsi Jehovha a nga hlamuli a mikhongelo ya hina? Jehovha i hlamulisa kuyini a mikhongelo ya hina nyamutlha?

JEHOVHA A NGA HI HLAMULA HI NDLELA YO KALA HI NGA YI RINDZELANGI

3. Hikuyini Jehovha a lavako ku hi khongela ka yena?

³ A Mitsalo yi hi tiyisekisa lezvaku Jehovha wa hi randza nguvhu niku hi va lisima kakwe. (Hag. 2:7; 1 Joh. 4:10) Hi cigelo leco a hi rambako ku hi khongela ka yena hi kombela ku a hi vhuna. (1 Ped. 5:6, 7) I lava ku hi vhuna a kuva kusuhani naye ni ku zvi kota ku timisela zvikarato zva hina.

4. Hi zvi tivisa kuyini a ku Jehovha wa hlamula a mikhongelo ya vakhozeli vakwe? (Wona ni mufota.)

⁴ Lomu ka Bhibhiliya ku ni makhati yo tala hi lerako ku Jehovha i hlamulile a mikhongelo ya vakhozeli vakwe. Wa alakanya a cikombiso co kari? A cin’we ca zvikombiso lezvo hi leci ca Hosi Dhavhidha. I vile ni valala va xapi ya hombe wutomini gakwe niku hi makhati yo tala i kombelile a civhuno ka Jehovha hi mukhongelo. Ka khati go kari, i no rilela Jehovha, aku: ‘Jehovha, zwana mukombelo wa mina, kangatela ndleve ka mikombelo ya mina. Ndzi hlamule hi kutsumbeka ka wena ni kululama ka wena.’ (Lis. 143:1) Jehovha i no hlamula mikhongelo ya Dhavhidha ya ku kombela kutlhatlhiswa. (1 Sam. 19:10, 18-20; 2 Sam. 5:17-25) Lezvo zvi mahile ku Dhavhidha a wula na a tiyile, aku: ‘Jehovha i kusuhani ni vontlhe lava va mu khongelako.’ Hinawu hi nga tiyiseka ka lezvo. — Lis. 145:18.

5. A ku a malandza ya Jehovha ya cikhatini ci nga hundza contlhe cikhati ma wa hlamuliwa a mikhongelo yabye hi ndlela leyi ma nga yi rindzela? Nyika cikombiso. (Wona ni mufota.)

⁵ Jehovha a nga tshuka a hlamula a mikhongelo ya hina hi ndlela yo hambana ni leyi hi yi rindzelako. Lezvo zvi humelele mupostoli Pawule. I kombele Nungungulu lezvaku a mu susa “muzwa nyameni”. Pawule i khongelile makhati manharu xungetano hi cikarato leco co bindza. A ku Jehovha i hlamulile a mikhongelo yakwe? Ina, kanilezvi hi ndlela yo hambana ni leyi Pawule a nga yi rindzele. Wutshan’wini ga ku susa cikarato, Jehovha i no mu nyika ntamu wu nga laveka kasi a simama a mu tirela hi kutsumbeka. — 2 Kor. 12:7-10.

6. Hikuyini ka zvikhati zvo kari zvi nga wonekisako ku khwatsi Jehovha a nga hlamuli a mikhongelo ya hina?

⁶ Ka zvikhati zvo kari, hinawu hi nga kuma hlamulo wo hambana ni lowu hi wu rindzelako. Hi nga tiyiseka lezvaku Jehovha wa yi tiva khwatsi a ndlela ya yi nene ya ku hi vhuna. A nga maha zvo “hundza zvontlhe lezvi hi zvi kombelako kutani ku zvi alakanya”. (Efe. 3:20) Hi cigelo leco, a hlamulo wa Jehovha ka mikhongelo ya hina wu ngata hi cikhati kutani hi ndlela yo kala hi nga yi rindzelangi.

7. Hikuyini zvi nga lavako ku hi cica lezvi hi zvi khongelelako? Nyika cikombiso.

⁷ Laha hi yako hi ku zwisisa khwatsi a kurandza ka Jehovha, kuzvilava zvi nga lava ku hi cica lezvi hi zvi khongelelako. Wona cikombiso ca Martin Poetzinger. Andzhakunyana ka kuchadha, makabye Poetzinger i no khomiwa a yisiwa livaleni la xanisa la vaNazi. Kusanguleni, i no khongela, a kombela ka Jehovha lezvaku a humesiwa livaleni la xanisa kasi a ya khatalela a sati wakwe ni ku tlhela a chumayela. Hambulezvo, andzhako ka mavhiki mambiri a ci kona ci nga komba lezvaku Jehovha i vhulile ndlela ya ku a humesiwa. I no sangula ku khongela, aku: “Jehovha, ndzi kombe lezvi u lavako lezvaku ndzi maha.” I no sangula ku ehleketa hi lezvi a vamakabye van’wani laha livaleni la xanisa va nga kumana nazvo. A kutala kabye va wa karateka nguvhu hi vasati vabye ni vana vabye. Makabye Poetzinger i no guma a khongela, aku: “Jehovha ndza bonga hi ciavelo ca mina ca ciswa. Ndzi vhune ku tiyisa ni ku kuca vamakabye va mina.” Hi zvalezvo futsi a nga maha ka 9 wa malembe ma nga landzela na a hi tivaleni ta xanisa.

8. Zvini hi faneleko ku zvi alakanya a cikhati hi khongelako?

⁸ Hi fanele ku alakanya lezvaku Jehovha i na ni kungo niku i ta gi tatisa hi cikhati leci a ci yimisileko. A kungo lego gi patsa a ku fuvisa hi kumbhelela a zvikarato zvontlhe zvi hi vangelako a kuxaniseka nyamutlha — a zvikarato zvo kota timhango ta ntumbuluko, mababyi ni kufa. Jehovha i ta tatisa a kungo gakwe hi ku tirisa Mufumo wakwe. (Dan. 2:44; Kuv. 21:3, 4) Hambulezvo, kala ka cikhati leci, Jehovha i tsika Sathani a fumela tiko.b (Joh. 12:31; Kuv. 12:9) Loku Jehovha o fuvisa a zvikarato zvontlhe zva vanhu zvezvi, zvi ta ku khwatsi a mafumela ya Sathani mova manene. Kanilezvi, hambu lezvi zvi lavako ku hi rindzela a ku Jehovha a tatisa a zvitsumbiso zvo kari, a zvi wuli ku o hi tsika hoce. A hi kambisiseni a tindlela to kari leti Jehovha a hi vhunako hi tona.

LEZVI JEHOVHA A HLAMULISAKO ZVONA MIKHONGELO NYAMUTLHA

9. Jehovha a nga hi vhunisa kuyini loku hi lava a ku maha ciboho? Nyika cikombiso.

⁹ I hi nyika wutlhari. Jehovha i tsumbisa ku hi nyika wutlhari hi gi lavako kasi ku maha zviboho. A wutlhari ga Nungungulu hi gi lava nguvhu loku hi lava ku maha zviboho zvi to khumba a wutomi ga hina gontlhe, zvo kota ku chadha kutani ku nga chadhi. (Jak. 1:5) Wona cikombiso ca makabye wo kari wa gwendza wa ku hi Mariya.c A cikhati a nga tivana ni makabye wo kari wa cinuna, i wa ti buza hi ku tira kota phayona ga cikhati contlhe. I wula lezvi: “Laha a wunghana ga hina gi ngaya gi kula, a kutizwa ka hina konawu ku no kula. Ndzi wa zvi tiva ku ndzi fanele ku maha ciboho. Ndzi no khongela nguvhu hi mhaka leyo. Ndzi wa lava ku Jehovha a ndzi rangela. Kanilezvi ndzi wa zvi tiva kambe ku Jehovha a nga ta ndzi mahela ciboho.” I zvi wonile ku Jehovha i hlamulile a mikhongelo yakwe ya ku kombela civhuno. Hi ndlela muni? A cikhati leci a nga kambisisa lomu ka mabhuku ya hina, i kumile tindzima to kongoma ti nga mu vhuna ku kuma mihlamulo ya zviwutiso zvakwe. I tlhelile a ingisa wusungukati ga wutlhari a nyikilweko hi mamani wakwe wo tsumbeka. A wusungukati lego gi vhunile Mariya lezvaku a hlolisisa khwatsi a kutizwa kakwe. Hikwalaho, i zvi kotile ku maha ciboho ca wutlhari.

10. Hi kuya hi Va Le Filipi 4:13, zvini Jehovha a to maha kasi ku vhuna a vakhozeli vakwe? Nyika cikombiso. (Wona ni mufota.)

¹⁰ I hi nyika ntamu wa ku timisela. A ku fana ni lezvi a nga maha ka mupostoli Pawule, Jehovha i ta hi nyika ntamu wu lavekako kasi hi timisela zvikarato zva hina. (Lera Va Le Filipi 4:13.) Wona lezvi Jehovha a mu vhunisileko zvona a makabye wo kari wa ku hi Benjamin a ku timisela zviyimo zvo bindza. A cikhati co tala ca wuswa gakwe, Benjamin ni ngango wabye va hanyile tivaleni ta valuveli le Afrika. Benjamin i wula lezvi: “Ndzi no khongela ka Jehovha hi kukhandzakanya, ndzi mu kombela lezvaku a ndzi nyika ntamu wa ku maha lezvi zvi nga zvinene mahlweni kakwe. Jehovha i hlamulile mikhongelo ya mina hi ku ndzi nyika kurula ni kutiya-hlanha kasi ku simama ndzi chumayela, a tlhela a ndzi nyika mabhuku kasi ndzi simama ndzi tiyile hi tlhelo ga moya.” I tlhela aku: “A ku lera a matshango ya vamakabye van’wani ni ku gondza lezvi Jehovha a va vhunisileko zvona ku timisela, zvi ndzi vhunile ku ndzi ti yimisela ku simama ndzi tsumbeka.”

11-12. Jehovha a nga va tirisisa kuyini a vamakabye kasi ku hlamula mikhongelo ya hina? (Wona ni mufota.)

¹¹ I tirisa a ngango wa hina wa moya. Ka wusiku ga mahlweni ka ku Jesu a nyikela a wutomi gakwe, i khongelile nguvhu. I no khongotela Jehovha lezvaku a nga tsiki vanhu va alakanya ku murukateli. Wutshan’wini ga ku maha lezvo, Jehovha i no vhuna Jesu hi ku rumela ngilozi — a mun’we wa vamakabye vakwe — kasi yi ya mu tiyisa. (Luka 22:42, 43) Jehovha a nga hi vhuna kambe hi ku tirisa a makabye wo kari lezvaku a hi tiyisa hi ku hi fonela kutani ku hi vhuxela. Hontlheni hi nga lava tindlela ta ku va byela “gezu gi nene” a vamakabye va hina. — Mav. 12:25.

¹² Wona cikombiso ca makabye wa cisati wa ku hi Miriam. Andzhako ka mavhiki yo kari na a felwe hi nuna wakwe, Miriam i no sala yece laha kaya, i wa karatekile ni ku nga tivi co maha. I wa rila yi nga chayi niku i wa lava wa ku bhula naye. I wula lezvi: “Ndzi wa nga hi na ntamu wa ku fonela munhu, makunu ndzi no khongela ka Jehovha. Na ndza ha rila ni ku khongela, a fone ya mina yi no vitana. Ku wa hi dhota tlhelo munghana wo randzeka.” Miriam i chavelelwe hi dhota lego ni sati wa gona. I tiyisekile lezvaku hi Jehovha a nga khumba a makabye loye lezvaku a mu fonela.

13. Nyika cikombiso ca lezvi Jehovha a nga va tirisisako zvona lava va nga hiko vakhozeli vakwe kasi a hlamula mikhongelo ya hina.

¹³ A nga tirisa vanhu va nga mu khozeliko. (Mav. 21:1) Ka zvikhati zvin’wani, Jehovha a nga hlamula a mikhongelo ya vanhu vakwe hi ku tirisa vanhu va nga kholwiko. Hi cikombiso, i khumbile a mbilu ya Hosi Artaxerxesi kasi a vhumela ku Nehemiya a tlhela Jerusalema lezvaku a ya vhunetela a ku aketwa ka dhoropa. (Neh. 2:3-6) Ni nyamutlha kambe, hambu lava va nga hiko vakhozeli vakwe Jehovha a nga va tirisa kasi ku hi vhuna loku zvi laveka.

14. Cini ci nga ku tsakisa ka tshango ga Soo Hing? (Wona ni mufota.)

¹⁴ A makabye wo kari wa cisati wa ku hi Soo Hing i zvi wonile khwatsi lezvi Jehovha a nga mu vhunisa zvona hi ku tirisa dhokodhela. A n’wana wakwe i xanisiwa nguvhu hi mababyi ya mapimo. A cikhati a nga kumana ni mhango ya hombe, yena ni nuna wakwe va no kombela ku nyima ku tira kasi va ta mu khatalela. Lezvo zvi no maha ku va cona. Soo Hing i wulile lezvaku i wa ti zwisa ku khwatsi i bhurachi gi kokilweko kala magumo. I no chulula mbilu yakwe ka Jehovha a kombela civhuno. A dhokodhela i no zama tindlela ta ku vhuna yena ni ngango wakwe. Hi kota ya lezvo, va no sangula ku kuma civhuno ca mufumo ni wutshamu ga ginene kasi va hanya kona. Hi ndzhako ka cikhati, Soo Hing i no wula lezvi: “Ka mhaka leyi, hi gi wonile a woko ga Jehovha. Hi lisine yena ‘muzwe wa mikhongelo’.”— Lis. 65:2.

A KU LAVA NI KU KUMA MIHLAMULO YA MIKHONGELO YA HINA ZVI LAVA KUKHOLWA KA JEHOVHA

15. Cini ci vhunileko a makabye wo kari a ku wona ku Jehovha wa hlamula mikhongelo yakwe?

¹⁵ A mikhongelo ya hina a yi hlamuliwi hi tindlela to hlamalisa. Kanilezvi a mihlamulo hi yi kumako hi yaleyi yi lavekako kasi hi simama na hi tsumbekile ka Papayi wa hina wa le tilweni. Hikwalaho, tshama na u longile a ku wona lezvi Jehovha a hlamulisako zvona a mikhongelo ya wena. A makabye wo kari wa cisati wa ku hi Yoko i wa zvi wonisa ku khwatsi Jehovha a nga hlamuli a mikhongelo yakwe, kanilezvi i no gumesa a sangula ku tsala lezvi a nga kari a kombela ka Jehovha. Hi ndzhako ka cikhati, i no cuwuka lomu ka kadherno wakwe a guma a wona lezvaku a kutala ka mikhongelo yakwe Jehovha i hlamulile, a ku patsa ni leyi ya ku yena i wa yi rivakelwe. Hi fanele ku ta na hi ti nyika cikhati hi nyima hi ehleketa hi lezvi Jehovha a hlamulisako zvona mikhongelo ya hina. — Lis. 66:19, 20.

16. Hi nga kombisisa kuyini kukholwa mhakeni ya mukhongelo? (Mahebheru 11:6)

¹⁶ Loku hi khongela ka Jehovha, hi kombisa lezvaku ha kholwa ka yena. Kanilezvi, hi kombisa kukholwa kambe hi ku vhumela ni cihi leci Jehovha a mahako kasi ku hlamula mikhongelo ya hina. (Lera Mahebheru 11:6.) Wona a cikombiso ca Mike ni sati wakwe Chrissy. Va wa hi ni mixuvo yo tira Bheteli. Mike i wula lezvi: “Hi no prenxera petisawu makhati yo tala hi tlhela hi khongela ka Jehovha hi kuphindaphinda xungetano hi mixuvo ya hina, kanilezvi a hi zangi hi vitaniwa.” Mike na Chrissy va no simama va tsumba ku Jehovha wa yi tiva a ndlela ya yi nene ya ku va tirisa ntirweni wakwe. Va no simama ku maha zvontlhe va nga zvi kota, va tira kota maphayona lomu nga hi ni cilaveko ni ku vhunetela ntirweni wa ku aka tiyindlu ta hlengeletano ya Jehovha. Nyamutlha va ka ntiro wa ku endzela mabandla. Mike i wula lezvi: “A hi contlhe cikhati Jehovha a nga hlamula mikhongelo ya hina hi ndlela leyi hi nga yi rindzele, kanilezvi i hlamulile hi tindlela ta ti nene nguvhu a ku hundza ni tihi hi nga ti alakanyela.”

17-18. Hi kuya hi Lisimu 86:6, 7, zvini hi nga tiyisekako ka zvona?

¹⁷ Lera Lisimu 86:6, 7. Dhavhidha, a mutsali wa tisimu, i wa tiyiseka lezvaku Jehovha i ingisele a tlhela a hlamula mikhongelo yakwe. Wenawu u ngava ni kutsumba ko fana. A zvikombiso hi bhulileko hi zvona ka ndzima leyi zvi hi tiyisekisa lezvaku Jehovha a nga hi nyika a wutlhari ni ntamu zvi lavekako kasi hi zvi kota a kutimisela. A nga hi vhuna hi ku tirisa vamakabye va hina kutani vanhu va nga mu khozeliko.

¹⁸ Hambu loku Jehovha a nga hlamuli a mikhongelo ya hina contlhe cikhati hi ndlela leyi hi nga yi rindzele, ha zvi tiva ku i ta hlamula. I ta hi nyika lezvi zvi lavekako hi cikhati leci hakunene zvi lavekako hi cona. Hikwalaho, simama ku khongela u tlhela u kholwa ku Jehovha i ta ku kuzwa. Tiyiseka lezvaku i ta ku khatalela zvezvi niku misaveni yiswa leyi yi tako, i ta ‘xurisa zvontlhe lezvi zvi hanyako’.— Lis. 145:16.