ZIWUTISO ZA VAGONZI

Hikuyini Jesu a nga rila mahlweni ka ku vuxa Lazaru hi ka vafileko, kota lezi zi kombisiwako ka Johani 11:35 ke?

Loku hi felwa hi xaka kutani munghana wa hina, a mihloti yo tekela ku halaka hakuva hi ta mu xuva. Hambu lezi a nga mu ranza Lazaru, Jesu a nga rilangi hi lezi Lazaru a ngafa. Kanilezi i lo rila hi kuzwela wusiwana a maxaka ni vanghana va Lazaru, kota lezi zi kombiwako hi mongo wa matimu ya Johani. — Joh. 11:36.

Ka khati go sangula legi Jesu a ngazwa ku Lazaru wa babya a nga tsutsumelangi a kuya mutini wa Lazaru lezaku a ya mu chuma. A matimu ma bika lawa: “Hambu lezi [Jesu] a nga zwile lezaku [Lazaru] wa babya, i lo tshama masiku mambiri laha a nga hi kona.” (Joh. 11:6) Hikuyini Jesu a nga hlwela? I wa hi ni kungo. I te ngalo: “Legi wubabyi a gi yisi kufeni, kanilezi gi yisa wudzunziweni ga Nungungulu; kasi a N’wana wa Nungungulu a fela ku dumiswa ha gona.” (Joh. 11:4) A kungo ga Jesu ku wa hi ku tirisa a kufa ka Lazaru kasi ku dumiswa Nungungulu. Hi ndlela muni? Jesu i wa lava ku maha xihlamaliso hi ku vuxa a munghana wakwe wo ranzeka hi xilahleni.

Laha a nga kari a wulawula ni vapizani vakwe hi ximaho lexi, Jesu i lo fananisa kufa ni ku etlela. Hi xigelo lexo, i lo va byela lezaku “Lazaru, a xaka ga hina, i etlele; kanilezi nza famba, nzi ya mu vuxa.” (Joh. 11:11) Ka Jesu, a ku vuxa Lazaru hi ka vafileko zi wa fana ni loku a mupswali a vuxa a nwanana wakwe a etleleko. Hikwalaho, Jesu i wa nga hi na xigelo xa ku xaniseka mbilwini yakwe hi kota ya kufa ka Lazaru.

Makunu, xini xi nga maha Jesu a rila ke? A hlamulo wa xiwutiso lexi hi wu kuma ka mongo wa mhaka kambe. A xikhati lexi Jesu a nga kumana na Maria, a makabye wa Lazaru, zinwe ni vanhu vanwani na va rila, Jesu “i lo keta moyeni, a karateka.” Laha a nga wona kubayiseka kabye, Jesu i lo karateka laha ka kuza a “keta moyeni.” Lexo hi xona xi mahileko “Jesu a rila.” A ku wona vanghana vakwe na va hi hlomulweni wa hombe zi mahile Jesu a karateka nguvu moyeni. — Joh. 11:33, 35.

A matimu lawa ma komba lezaku Jesu i na ni ntamu wa ku vuxa maxaka ni vanghana va hina hi ka vafileko ni ku va nyika lihanyo li nene misaveni yiswa leyi yi tako. Ma hi vuna ku wona kambe lezaku Jesu wa va zwela wusiwana lava va felweko hi maxaka yabye. A xinwani hi xi gonzako ka matimu lawa hi lezaku hi fanele ku zwela wusiwana lava va bayisekileko hi ku felwa hi maxaka ni vanghana vabye.

Jesu i wa zi tiva lezaku i wa ta vuxa Lazaru hi ka vafileko. Hambulezo, i lo rila na a susumetiwa hi liranzo la hombe leli a nga hi nalo hi vanghana vakwe ni ku va zwela wusiwana. Hi kufanana, a ku va zwela wusiwana vanwani zi nga hi susumeta ku “rila ni lava va rilako.” (Rom. 12:15) Loku munhu a kombisa kubayiseka hi ndlela leyo a zi wuli lezaku a nga kholwi ku a vafileko va ta vuka. Hi nga wona ke, a xikombiso xi nyikilweko hi Jesu xa ku zwela wusiwana lava va felweko hi ku rila hambu lezi a nga lava ku vuxa Lazaru.