A Kutsumba Ko Tiya Ka Vafileko

A WASATI wo kari wa 25 wa malembe i tsalile lezi: “Hi 1981 a mamani wa mina wa ku nzi wundla i lofa hi kota ya câncro. A kufa kakwe ku nzi khumbile nguvu mina ni makabye wa mina hi nga pswaliwangiko zinwe. Nzi wa hi ni 17 wa malembe niku a makabye wa mina i wa hi ni 11. Nzi mu xuvile nguvu. Kota lezi nzi nga gonzisilwe lezaku yena i wa hi tilweni, makunu, nzi wa lava a ku ti sunga lezaku nzi yava zinwe naye. Yena i wa hi munghana wa mina wa hombe.”

Zi woneka na zi nga lulamangi lezaku a kufa ku fanele kuva ni ntamu wa ku ku tekela a munhu loyi u mu ranzako. Niku a xikhati lexi lezo zi humelelako, a maalakanyo ya lezaku u nga ta ha tshuka u zi kota a ku wulawula, ku hleka naye, kutani a ku angarela a munhu loyi u nga mu ranza, zi nga karata nguvu a ku yimisana ni maalakanyo lawo. A kubayisa loko a ku miyetiwi khwatsi hi ku byeliwa lezaku a ranzekako wa wena i le hehla tilweni.

Kanilezi, a Biblia gi na ni kutsumba ko hambana nguvu ni loko. Kota lezi hi nga zi wona kusanguleni, a Mitsalo yi komba lezaku za koteka a ku tlhela uva zinwe ni a ranzekako wa wena loyi a fileko xikhatini xa ha tako xi nga laha kusuhani, na ku nga hi tilweni gi nga tiviwiko kanilezi kwalaha misaveni, ka matshamela ya kurula ni ya kululama. Niku ka xikhati lexo a vanhu va ta zi kota a ku ti buza hi kuhanya ko mbhelela, niku cima va nga ta hafa kambe. Kanilezi a vanwani va nga haku ‘Lawo maalakanyo ya zilo zi nga kotekiko!’

Zini zi lavekako kasi ku ku kholwisa lezaku a kutsumba loko ka lisine? Kasi ku kholwa a xitsumbiso xo kari, u wa ta lava ku tiyiseka lezaku loyi a mahako a xitsumbiso lexo munhu loyi a zi lavako na a zi kota a ku xi tatisa kambe. Makunu, himani loyi a tsumbisako lezaku a vafileko va ta tlhela va hanya ke?

Kusanguleni ka ximumu xa 31 Nguveni ya Hina, Jesu Kristu i lo tsumbisa hi kutiyiseka ka hombe: “Khwatsi hilezi Dadani a vuxako a vafileko a va hanyisa, hizalezo kambe a N’wana wa va hanyisa lava a zi ranzako. Mu nga hlamali hi lexi, hakuva xikhati xa hata, laha vontlhe va nga le zilahleni va ta ngazwa a gezu gakwe, va huma.” (Johani 5:21, 28, 29) Ina, Jesu Kristu i lo tsumbisa lezaku a vanhu va timiliyoni lava zalezi va fileko va ta tlhela va hanya misaveni leyi va tlhela vava ni lungelo ga ku tshama ka yona kala kupinzuka ka matshamela ya kurula, ni ya paradise. (Luka 23:43; Johani 3:16; 17:3; ringanisa Tisimu 37:29 ni Mateu 5:5.) Kota lezi Jesu a mahileko a xitsumbiso, zi tiyile lezaku yena wa zi lava a ku xi tatisa. Kanilezi xana wa zi kota a ku maha lezo?

Na ku nga se tlhangana malembe mambiri anzhako ka kuva a mahile a xitsumbiso lexo, Jesu i lo kombisa hi ndlela ya ntamu lezaku yena wa zi lava niku wa zi kota a ku vuxa vafileko.

“Lazaru, Huma!”

Xi vile ximaho xi khumbako mbilu. Lazaru i wa babya nguvu. A vamakabye vakwe va vambiri, Maria na Marta, va lo rumela gezu ka Jesu, loyi a nga hi le tlhatuko wa Congo wa Jordani, vaku: “Hosi, wangabye, loyi u mu ranzako wa babya.” (Johani 11:3) Va wa zi tiva lezaku Jesu i wa mu ranza Lazaru. Xana Jesu i wa nga ta zi lava a ku ta wona a munghana wakwe a babyako? Lexi xi hlamalisako hi lezaku wutshanwini ga kuya Betania zalezo, Jesu i lo tshama kwalaho a nga hi kona kuringana masiku mambiri ma nga lanzela. — Johani 11:5, 6.

Lazaru i file xikhatanyana nzhako ka kurumelwa ka gezu xungetano hi kubabya kakwe. Jesu i zi tivile a xikhati lexi Lazaru a ngafa, niku yena i wa xuva ku maha xo kari xungetano hi kufa loko. Loku hi kugumesa Jesu a chikele le Betania, ku wa hunza mune wa masiku a munghana wakwe wa ku ranzeka na a file. (Johani 11:17, 39) Xana Jesu i wa ta vuxa munhu loyi ku nga hunza xikhati xo leha xo kota lexo na a file?

Laha a ngazwa lezaku Jesu i wata, Marta, a wasati wa zigingi, i lo huma handle a tsutsuma a mu khinga. (Ringanisa Luka 10:38-42.) Hi ku khumbeka hi kubayiseka kakwe, Jesu i lo tiyisa: “A makabye wa wena i ta vuka.” A xikhati lexi a nga kombisa a kukholwa kakwe kuvukeni ka vafileko ka xikhati xi tako, Jesu i lo mu byela hi kudlunyatekileko: “Mina nzi kuvuka ni wutomi; loyi a kholwako ka mina, hambu loku a file, i ta hanya.” — Johani 11:20-25.

Na a chikele xilahleni, Jesu i lo laya lezaku a ribye legi gi nga valile a nomu wa mhako gi susiwa. Zonake, anzhako ka ku khongela hi gezu go zwala, i lo vitana aku: “Lazaru, huma!” — Johani 11:38-43.

A mahlo ya vanhu vontlhe ma wa cuwuka mhakweni. Zonake, hi lomu munyameni, ku lo huma a munhu. I wa bohilwe mikonzo ni mandla hi miceka, ni nghohe yakwe yi wa fenengetilwe hi lesu. Makunu Jesu i lo laya aku: “Mu tlhatlheni, mu mu tsika a famba.” A miceka yo gumesa yi lowa lahasi. Ina, ku wa hi Lazaru, a wanuna loyi ku nga hunza mune wa masiku na a file! — Johani 11:44.

Zi Mahekile Hakunene?

A tlhatlhambuto wa kuvuxiwa ka Lazaru wu kumeka lomu ka Ivangeli ya Johani kota matimu ya lisine. A mitlhamuselo ya kuvuxiwa loko matimu yo hanya khwatsi laha ka ku a yi ngevi tsheketo ntsena. A ku kanakanela a kuva ku mahekile zi fana ni ku kanakanela a zihlamaliso zontlhe za lomu ka Biblia, a ku patsa ni kuvuka ka Jesu Kristu wutsumbu. Niku a ku ala a kuvuka ka Jesu zi fana ni ku ala a kukholwa kontlhe ka wuKristu. — 1 Va Le Korinte 15:13-15.

Hi lisine, loku u vumela a kuvakona ka Nungungulu, a wu faneli ku kanakanela a kukholwa ka kuvuka ka vafileko. Kasi ku kombisa: A munhu wa zi kota ku gravara ka vidiyu a kuranza kakwe ko gumesa ni magezu yakwe ya xifungo xa ku nyikela titshomba ka varanzekako vakwe, zonake anzhako ka kuva a file, hakunene a maxaka yakwe ni vanghana va zi kota a ku mu wona ni ku muzwa na a tlhamusela lezi a tshomba yakwe yi faneleko ku tirisiswa zona. Ka zana ga malembe nzhako, a nchumu lowo wu wa nga alakanyeki. Niku a ka vanhu vo kari lava zalezi va hanyako ka matshamu ya le kule nguvu ya misava, a wutivi lego go anza ga ku gravara a zilo hi vidiyu a gi zwisiseki laha ka ku kala zi ku khwatsi xirewukiso. Loku a matshinya ya milayo ya siensia lawa ma yimisilweko hi Muvangi ma zi kota ku tiriswa hi vanhu lezaku va vuxa a mufananiso wo woneka ni wo zwala wa munhu loye, xana a Muvangi a nge zi koti ku maha za ku hunza lezo? Makunu, xana a zi olovi a ku alakanya lezaku Loyi a vangileko wutomi wa zi kota a ku tlhela a gi vanga luswa?

A xihlamaliso xa kuvuxiwa ka Lazaru xi engetele a kukholwa ka hina ka Jesu ni ka kuvuka ka vafileko. (Johani 11:41, 42; 12:9-11, 17-19) Kota lezi ku khumbako mbilu, kona ku komba kambe a kuranza ni kuxuva ka Jehova ni N’wana wakwe lezaku va vuxa vafileko.

‘Nungungulu I Tava Ni Lixuve’

Lezi Jesu a nga khumbisiwa zona hi kufa ka Lazaru zi komba a kuzwela wusiwana ka hombe loku a N’wana wa Nungungulu a nga nako. A kuva a khumbekile nguvu ximahweni lexo zi komba hi kudlunyatekileko lezaku yena wa xuva nguvu a ku vuxa vafileko. Ha gonza: “Maria na a chikele laha a nga hi kona Jesu, a mu wona, i lowa mikonzweni yakwe, aku ka yena: Hosi, loku u wa hi kona laha, a makabye wa mina ngha a nga fangi. Laha Jesu a nga mu wona na kari a rila, va rila kambe ni vaJuda lava va nga tile naye, i lo keta moyeni, a karateka, aku ngalo: Mu mu lahlile kwihi? Vaku kakwe: Hosi, ngona u ta wona. Jesu a rila. A vaJuda vaku ngalo: Mangabye, lezi a nga mu ranzisa zona!” — Johani 11:32-36.

A kuzwela wusiwana ka Jesu loku ku humako mbilwini ku kombisiwa laha hi magezu lawa ya manharu: “i lo keta,” “a karateka,” ni “a rila.” A magezu ya lirimi lo sangula lawa ma tirisilweko kutsaleni ka ximaho lexi xi khumbako mbilu ma komba lezaku Jesu i wa khumbekile nguvu hi kufa ka munghana wakwe wo ranzeka Lazaru ni kulanguteka ka nghohe ya makabye wa Lazaru loyi a nga kari a rila laha ka kuza a mahlo ya Jesu ma tala hi mihloti.a

Lezi zi nga sina zi tiveka nguvu hi lezaku Jesu i wa vuxile vanhu vanwani va vambiri mahlweni ka lezo. Niku i wa xuva hi mbilu yontlhe a ku maha lezo ha Lazaru. (Johani 11:11, 23, 25) Hambulezo, yena “i lo rila.” Kutanike, Jesu, a nga vuxi vanhu hi lezi a nga ni ntamu ntsena. A kuzwela wusiwana ni kukhumbeka kakwe ko eta ximahweni lexi ku komba hi kudlunyatekileko a mixuvo yakwe ya hombe ya ku fuvisa a zikarato zi vangiwako hi kufa.

Kota lezi Jesu ‘a nga tekelela Jehova Nungungulu wutsumbu,’ hi kufaneleko a hi rinzeli lezaku a Dadani wa hina wa le tilweni i ta maha zilo za zi tsongwani ka lezi yena a zi mahileko. (Maheberu 1:3) Na a wulawula hi kuranza ka Jehova xungetano hi ku vuxa vafileko, a wanuna wo tsumbeka Joba i te ngalo: ‘Loku a munhu afa wa tlhela a hanya kambe? . . . U ta vitana, mina nzi ku hlamula. U tava ni lixuve hi ntiro wa mandla ya wena.’ (Joba 14:14, 15, NM) A gezu ga lirimi lo sangula legi laha gi hunzuluselweko “u tava ni lixuve” gi komba a kuxuva ni kunavela ka mbilu yontlhe ka Nungungulu. (Genesisi 31:30; Tisimu 84:2) Zi laha kubaseni lezaku Jehova i longile ku vuxa vafileko hi kuxuva ka hombe nguvu.

Xana hi nga zi kota a ku kholwa a xitsumbiso xa kuvuka ka vafileko hakunene? Ina, a ku na kukanakana ka lezaku Jehova ni N’wana wakwe va zi ranza niku va zi kota a ku zi tatisa. Xana lezo zi wula yini ka wena? Zi wula lezaku u na ni kutsumba ka ku tlhela u tlhangana ni varanzekako va wena lava va fileko kwalaha misaveni ka matshamela ya ma nene a ku hunza lawa ma nga kona zalezi!

Jehova Nungungulu, loyi a vangileko vanhu a tlhela a va veka sinwini hi liranzo, i tsumbisile lezaku i ta aketa a Paradise misaveni leyi hasi ka wufumeli ga Mufumo Wakwe wa le tilweni wu nga mandleni ya Jesu Kristu loyi a tlakusilweko. (Genesisi 2:7-9; Mateu 6:10; Luka 23:42, 43) Ka Paradise lego gi aketilweko, a ngango wa vanhu wu ta ti buza hi kuhanya ko kala ku nga mbheli, ku nga hava mababyi ni tinghumbe tontlhe. (Kuvululelwa 21:1-4; ringanisa Joba 33:25; Isaya 35:5-7.) Ku ta ngha ku fuvisilwe kambe a livengo, kuvengana ka vanhu va mihlowo yo hambana, kuholovisana ka tixaka, ni wuxololi gontlhe xungetano hi mali. Lezo zi ta maheka nzeni ka misava yi basisilweko, leyi Jehova Nungungulu hi ku tirisa Jesu Kristu a ta nga vuxela ka yona vafileko.

Loko hi kona a kutsumba loku a nga nako a wasati loyi a kumbukilweko kusanguleni ka xipanze lexi. Malembe yo tala anzhako ka kufa ka mamani wakwe, a Timboni ta Jehova ti mu vunile a ku gonza a Biblia hi kueta. Yena wa alakanya: “Anzhako ka kuva nzi gonzile xungetano hi kutsumba ka kuvuka ka vafileko, nzi lo rila. Zi nzi tsakisile nguvu a ku tiva lezaku nzi ta tlhela nzi wona mamani wa mina.”

Loku a mbilu ya wena hi kufanana yi vilela a ku wona a varanzekako va wena kambe, a Timboni ta Jehova ti ta tsaka nguvu hi ku ku vuna a ku gonza lezi u nga zi kotisako zona a ku maha lezaku a kutsumba loku kuva ka wena. Hikuyini u nga ti laveteliko le Salawu ya Mufumo yi nga kusuhani na wena, kutani a ku ti tsalela hi ku tirisa a xaxameto wu nga ka phajina 32.

[Tlhamuselo wa lahasi]

Ziwutiso Zo Alakanyisisa Ha Zona

A xikhati lexi a munghana wakwe Lazaru a ngafa, xana Jesu i kombisisile kuyini lezaku Yena i wa zi ranza niku i wa zi kota a ku vuxa a vafileko?

Hikuyini hi zi kotako a ku vumela a tlhatlhambuto wa Biblia wa kuvuxiwa ka Lazaru kota matimu ya lisine?

Xana a tlhatlhambuto wu nga lomu ka bhuku ga Johani xipimo 11 wu kombisa kuyini a kuxuva ka hombe ka Jesu ka ku mbheta a zikarato zi vangilweko hi kufa?

Zini zi kombako lezaku Jehova Nungungulu i longile a ku vuxa vafileko hi kuxuva ka hombe nguvu?

[Kwadru ka phajina 28]

Mitsalo Leyi Yi Chavelelako

Na ma kari ma tlhamusela lezi ma yimisanisileko zona ni kubayiseka ka wona, a maKristu yo tsumbeka hi kuphindaphinda ma wula lezi: “Khwatsi nzi ku byela a mutsalo wa mina wa lomu ka Biblia lowu nzi wu ranzako nguvu.” Loku u hi kubayisekeni, kuzilava a yo kari ya mitsalo leyi yi nga ku vuna kambe.

“A bongiwe . . . a Dadani wa wuxinji ni Nungungulu wa kuchavelela kontlhe; loyi a hi chavelelako kuxanisekeni ka hina kontlhe.” — 2 Va Le Korinte 1:3, 4.

“U vulula canja ga wena, u xurisa zontlhe lezi zi hanyako.” — Tisimu 145:16.

“[Nungungulu] i vekile a siku legi a ta nga lamula ha gona tiko hi kululama hi munhu loyi a mu yimisileko; hi ka kona i nyikile a xitsumbiso ka vanhu vontlhe, hilezi a nga mu vuxa hi ka vafileko.” — Mitiro 17:31.

“Hi mina wutsumbu nzi mu chavelelako.” — Isaya 51:12.

“Khwatsi hi munhu a tangaliswako hi mamani wakwe, hizalezo mina nzi ta mu tangalisa.” — Isaya 66:13.

“Loku hi kuchavelelwa ka mina hlomulweni, lezaku a mhaka ya wena yi nzi hanyisile. Jehova, nzi alakanya a zilayelo za wena za kale, nzi tangaliswa. Nza kombela lezaku nzi tangaliswa hi wuxinji ga wena, kota lezi u tsumbisileko a nanza ga wena.” — Tisimu 119:50, 52, 76.

“Xikhati xa hata, laha vontlhe va nga le zilahleni va ta ngazwa a gezu gakwe, va huma; lava va mahileko kusaseka, va vuka a kuya wutomini.” — Johani 5:28, 29.

[Mufota ka phajina26]

A kuzwela wusiwana ka Jesu a xikhati lexi a nga vuxa Lazaru ku kombile a kuxuva kakwe ka hombe ka ku fuvisa zikarato zi vangilweko hi kufa

[Mufota ka phajina31]

A kuvuka ka vafileko, ku seketelwako muphahlweni wu tirulako wa Kristu Jesu, ku ta nehela kutsaka a matiko wontlhe