“Wa chachazela lava va mu lavako”

Xana Jehova wa zi nyika lisima lezi a vakhozeli vakwe va mahako kasi ku mu tsakisa? A vokari va ngaku, ‘Ahihi,’ na va alakanya lezaku Nungungulu a nga na mhaka na hina. Lezo, kuphazama ka hombe nguvu xungetano hi Nungungulu. A Biblia, a Mhaka yakwe, gi mbheta kukanakana kontlhe. Gi hi tiyisa lezaku Jehova wa ku nyika lisima a kutikarata ka vakhozeli vakwe vo tsumbeka. Wona magezu ya mupostoli Paule ma nga ka Maheberu 11:6.

Zini zi lavekako kasi ku tsakisa Jehova? Paule i te ngalo: “Ahandle ka kukholwa a zi koteki ku mu tsakisa [khwatsi Nungungulu].” Wona lezaku Paule a nga wulangi lezaku za karata ku tsakisa Nungungulu loku hi nga kholwi. Kanilezi, Paule i wula lezaku a zi koteki. Hi magezu manwani, a kukholwa i nchumu wa lisima nguvu kasi ku tsakisa Nungungulu.

Kukholwa muni ku xalalisako Jehova ke? A kukholwa ka hina ku fanele ku patsa zilo zimbiri. Xo sangula, hi fanele ‘ku kholwa lezaku i kona.’ A maBiblia manwani me ngalo, hi fanele “ku kholwa lezaku yena ngwa lisine.” Hi nga mu tsakisisa kuyini Nungungulu na hi kanakana lezaku i kona ke? Kanilezi, a kukholwa ka lisine ku patsa zinwani kambe hakuva hambu madimoni ma kholwa lezaku Jehova i kona. (Jakobe 2:19) A kukholwa lezaku Nungungulu i kona zi fanele ku hi kuca ku zi kombisa hi mitiro, zi wulako ku kombisa a kukholwa ka hina hi kuva ni mahanyela ma mu tsakisako. — Jakobe 2:20, 26.

Xa wumbiri, hi fanele “ku kholwa lezaku” Nungungulu “wa chachazela.” A munhu a nga ni kukholwa ka lisine a nga kanakani lezaku a kutikarata loku a ku mahako kasi ku hanya hi ndlela yi tsakisako Nungungulu a hi ka mahala. (1 Va Le Korinte 15:58) Hi nga mu tsakisisa kuyini Jehova na hi kanakana lezaku wa zi lava niku i na ni ntamu wa ku hi chachazela ke? (Jakobe 1:17; 1 Pedro 5:7) Loyi a wonako Nungungulu kota loyi a nga khataliko hi hina, a nga bongiko, na a nga hi na wuhana, a nga mu tivi a Nungungulu loyi a Biblia gi wulawulako hi yena.

Hi mani loyi a chachazelwako hi Jehova ke? Paule i ngalo hi “lava va mu lavako.” A bhuku go kari ga ku vuna vahunzuluseli va Biblia gi wula lezaku a gezu ga xiGreki legi gi hunzuluselweko ku “va mu lavako” a gi wuli “ku famba u lavetela” kanilezi gi wula ku ta “khozela” Nungungulu. A bhuku ginwani gi tlhamusela lezaku a gezu legi ga xiGreki gi tsalilwe hi ndlela yi kombako kuhiseka ni kutikarata. Kunene, Jehova i chachazela lava a kukholwa kabye ku va kucako ku mu khozela hi liranzo li humako mbilwini. — Mateu 22:37.

Xana Jehova i va chachazelisa kuyini a vakhozeli vakwe vo tsumbeka? I tsumbisile nchachazelo wo saseka nguvu lowu wu kombako a kueta ka liranzo ni wuhana gakwe — ku nga wutomi ga pinzukelwa Paradiseni kwalaha misaveni. (Kuvululelwa 21:3, 4) Hambu zalezi, lava va hlotako Jehova hi mbilu yontlhe va kuma makatekwa yo tala. Hi ku vuniwa hi moya wakwe wa ku basa ni wutlhari gi kumekako ka Mhaka yakwe, va hanya wutomi go nanziha. — Tisimu 144:15; Mateu 5:3.

Jehova i Nungungulu a nga ni kubonga loyi a nyikako lisima a ntiro lowu a vakhozeli vakwe vo hiseka va wu mahako. Xana lezo za ku kuca ku tshinela ka yena? Loku zi hi tano, hikuyini u nga gonziko zinwani u tiva lezi u nga ku kumisako zona a kukholwa loku Jehova a to ku chachazela ke?