Tirela Jehova na ma nga se chikela a masiku ya zikarato

1, 2. (a) Wusungukati muni legi Solomoni a nga pimiselwa ku tsalela vaswa? (b) Hikuyini a wusungukati ga Solomoni gi tirako kambe ka maKristu ma nga kwalomu ka 50 wa malembe ni ku hunza?

HOSI SOLOMONI i lo pimiselwa ku byela vaswa ku ngalo: “Alakanya Muvangi wa wena masikwini ya wuswa ga wena, na ku nga se kuta a masiku ya kubiha.” Zini ‘a masiku lawo ya kubiha’ kutani masiku ya zikarato ke? Solomoni i lo tirisa magezu yo khwatsi i wula zilo zinwani kasi ku tlhamusela a masiku ya zikarato ya wukhosana — mandla yo rurumela, milenge yo goveka, ku mbhela meno, ku nga ha woni, ku nga ha ingisi, wuvu, ni ku famba hi chetengelo. Zi na ni xigelo lezi Solomoni a nga wula lezaku hi fanele ku sangula ku tirela Jehova na ha ha hi vaswa. — Gonza Mutshawuteli 12:1-5.

² A maKristu yo tala ma nga kwalomu ka 50 wa malembe ni ku hunza ma ha hi ni ntamu wo tala. Za koteka ku ngha na ma hi ni wuvu go kari, kanilezi a ma se rerekisa ku khwatsi hi lezi Solomoni a zi tlhamuselisako zona. Xana a maKristu lawo ma nga vuneka hi wusungukati legi gi yiswako ka vaswa, gaku: “Alakanya Muvangi wa wena”? Xana a wusungukati lego gi wula yini?

3. Xana a ku alakanya Muvangi wa hina zi patsa yini?

³ Hambu lezi kuzilava hi tirelako Jehova kuringana malembe yo tala, zi nene a kuta na hi nyima hi alakanyela hi wukulu ga Muvangi wa hina na hi kombisa kubonga. Xana a wutomi a gi hlamalisi? A mamahelwa ya gona yo hlamalisa a ma na ku zwisisiwa hi munhu. Jehova i mahile a zilo zo tala za tixakaxaka kasi hi ti buza hi wutomi. A xikhati lexi hi cuwukisako a zivangwa za Jehova, hi vuxeta a kutsakela ka hina a liranzo lakwe, wutlhari, ni ntamu. (Tis. 143:5) Kanilezi a ku alakanya a Muvangi wa hina zi patsa a ku ehleketa hi lezi hi faneleko ku mu mahela kambe. A xikhati lexi hi ehleketako, handle ko kanakana hi tekela ku ti yimisela a ku kombisa kubonga ka Muvangi wa hina hi ku mu tirela kala laha hi zi kotako na ha ha hanya. — Mutsh. 12:13.

MALUNGELO YO HLAWULEKA YA KU ALAKANYA MUVANGI HAMBU LOKU HI HI VA HOMBE

4. Xiwutiso muni lexi a maKristu yo buva ma faneleko ku ti maha, niku hikuyini?

⁴ Loku u hi ni makume ya malembe kota munhu wo buva a kulileko, u fanele ku ti maha xiwutiso lexi xa lisima: ‘Nzi ta maha yini hi wutomi ga mina ka xikhati lexi, na nza ha hi ni ntanwanyana mirini wa mina ke?’ Kota muKristu a buvileko, u na ni malungelo yaku a vanwani a va nawo. U nga gonzisa lava va ha hiko vaswa lezi u nga zi gonza ka Jehova. U nga tiyisa vanwani hi ku va hlawutela matshango lawa u vileko nawo a xikhati lexi u nga tirela Nungungulu. Hosi Davida i wa khongelela ku maha lezo. I lo tsala aku: “Nungungulu, u nzi gonzisile kusukela wusweni ga mina . . . Nungungulu, u nga nzi tsiki laha na nzi khosahele, nziva ni wuvu; kala nzi leletela hi woko ga wena a ka xizukulwana xi tako, ni ntamu wa wena ka vontlhe lava va ha tako.” — Tis. 71:17, 18.

5. Xana a maKristu ma kulileko ma nga va gonzisisa kuyini vanwani lezi ma zi gonzileko?

⁵ U nga gi tivekisisa kuyini a wutlhari legi u gi hlengeletileko ka malembe yo tala? Xana a wu nge rambi a malanza ya Nungungulu ma ha hiko vaswa mutini wa wena lezaku mu ta bhula hi zilo zi akako? A wu nge va rambi lezaku mu famba zinwe ntirweni wa simu u tlhela u va komba litsako u li kumako hi ku tirela Jehova ke? Elihu wa xikhatini lexo i te ngalo: “A masiku ma ta wulawula, ni wunyingi ga malembe gi wa ta hi gonzisa wutlhari.” (Joba 32:7) Mupostoli Paule i lo khongotela a vavasati va maKristu va buvileko lezaku va kuca vanwani hi magezu ni mitiro. I lo tsala lezi: ‘A vavasati va kale a vave vagonzisi va lezi za zi nene.’ — Tit. 2:3.

EHLEKETA HI WUTLHARI LEGI U NGA NAGO GA KU VUNA VANWANI

6. Hikuyini a maKristu lawa ma hlengeletileko wutlhari hi makume ya malembe ma nga faneliko ku kanyisa a wutlhari gabye?

⁶ Loku u hi muKristu a buvileko, u na ni wutlhari go tala. Ehleketa hi lezi u zi zwisisako zalezi lezi u nga kala u nga zi tivi ka 30 kutani 40 wa malembe ma hunzileko. Wa zi kota ku tirisa matshinya ya milayo ya Biblia hi wutlhari wutomini ga wena. Handle ko kanakana, u na ni wutlhari ga ku khumba timbilu ta vanwani hi lisine la Biblia. Loku u hi dota, wa yi tiva ndlela ya ku vuna vamakabye lava va hambukako. (Gal. 6:1) Kuzilava u gonzile a ndlela ya ku wonelela a mitiro ya bandla, zipanze za mitiro mitlhanganweni ya hombe, kutani kuakiweni ka tiSalawu ta Mufumo. Za koteka ku ngha u tiva ndlela ya ku khongotela vadokodela lezaku va tirisa a tindlela ta machumela ma nga tirisiko nkhata. Hambu loku u gonzile a lisine zalezi u na ni wutlhari ga lisima wutomini legi. Hi xikombiso, loku u wundlile vana, u fanele ku ngha u kumile a wutlhari ginyingi ntirweni lowo. A maKristu ma kulileko xibuka xa ntamu xa ku tiyisa hlana vanhu va Jehova hi kugonzisa kabye, ku rangela, ni ku tiyisa vamakabye vabye va xinuna ni va xisati. — Gonza Joba 12:12.

7. A maKristu ma kulileko ma nga nyika gonziselelo muni ya lisima ka vaswa ke?

⁷ U nga gi tirisisa kuyini a wutlhari ga wena hi kumbhelela? Kuzilava u nga komba vaswa a ndlela yo sangula ni ku fambisa a zigonzo za Biblia. Loku u hi makabye wa xisati, xana a wu nge nyiki mawonela ka timbelekana ya lezaku ti nga siyi nzhako a mitiro ya moya a xikhati lexi ti hlayisako a vanana vabye ke? Loku u hi makabye wa xinuna, xana a wu nge gonzisi a majaha a ku veka tikanelo hi kuhiseka ni kuva vaxumayeli vo buva va mahungu yo saseka ke? Xana u nga va komba lezi u vuxelisako zona a vamakabye va xinuna ni va xisati va khosaheleko kasi ku va tiyisa hi tlhelo ga moya? Hambu u nga ha hi na ntamu mirini wa wena a ku fana ni kale, u vululekelwe hi nyangwa ya hombe ya ku gonzisa lava va ha hiko vaswa. A Mhaka ya Nungungulu yi ngalo: “A wudzunzo ga majaha hi ntamu wabye; ni wumbhuri ga zikhosana hi hloko ya wuvu.” — Mav. 20:29.

KU TIRA LAHA KU NGA NI XILAVEKO XA HOMBE

8. Zini lezi mupostoli Paule a nga maha na a hi munhu a kulileko?

⁸ Mupostoli Paule i tirisile wutlhari gakwe hi kumbhelela ntirweni wa Nungungulu na a hi munhu a kulileko. Kala ka xikhati lexi a nga tlhatlhiswa paxweni le Roma kwalomu ka 61 Nguveni ya Hina, i wa timisele malembe yo tala ntirweni wo binza wa wurumiwa niku ka xikhati lexo i wa hi Roma kasi ku xumayela. (2 Kor. 11:23-27) Handle ko kanakana, a vamakabye lava va nga hi doropeni lego ga hombe va wa li wona a lisima la lezaku a simama ku va vuna. Kanilezi Paule i lo wona lezaku ku wa hi ni xilaveko xa hombe xo hunza lexo matikweni manwani. Na a hi na Timote zinwe na Titusi, Paule i lo simamisa ni ntiro wakwe wa wurumiwa aya Efesusi, hi nzhako aya Kreta, niku kuzilava i zile aya Makedonia. (1 Tim. 1:3; Tit. 1:5) A hi zi tivi lezaku i zile aya Espanya, kanilezi i wa xuva kuya seyo. — Rom. 15:24, 28.

9. Hi rini laha kuzilava Pedro a nga rura aya tira lomu ku nga hi ni xilaveko xa hombe? (Wona mufota kusanguleni ka nzima.)

⁹ Mupostoli Pedro kuzilava i wa hunzile ka 50 wa malembe a xikhati lexi a nga rurela lomu ku nga hi ni xilaveko xa hombe. Hikuyini hi wulako lezo? Loku ku hi lezaku i wa hi wa tanga yinwe na Jesu kutani ku ngha a hi nhonzo, i wa tava kwalomu ka 50 wa malembe a xikhati lexi a nga tlhangana ni vapostoli vanwani le Jerusalema hi 49 Nguveni ya Hina. (Miti. 15:7) Ka xikhati xo kari anzhako ka mutlhangano lowo, i lo ya hanya Babuloni kasi kuya xumayela a vaJuda vo tala ka wutshamu lego. (Gal. 2:9) I wa hanya seyo a xikhati lexi a nga tsala papilo gakwe go ranga gi pimisilweko kwalomu ka 62 Nguveni ya Hina. (1 Ped. 5:13) A ku hanya tikweni gimbe zi wa nga olovi, kanilezi Pedro a nga vumelangi lezaku a kuva munhu a kulileko zi mu tekela litsako la ku tirela Jehova hi xikhati xontlhe.

10, 11. Hlawutela a tshango xungetano hi wokari loyi hambu lezi a nga hi munhu wa hombe, a rurileko a ya tira laha ku nga hi xilaveko xa hombe.

¹⁰ Inyamutlha, a maKristu yo tala ma nga ka 50 wa malembe ni ku hunza ma wona lezaku a ziyimo zabye zi cicile niku zalezi ma zi kota ku tirela Jehova hi tindlela tiswa. A vokari va rurele lomu ku nga ni xilaveko xa hombe. Hi xikombiso, Robert i tsala lezi: “Mina ni sati wa mina hi wa hi kwalomu ka 55 wa malembe a xikhati lexi hi nga wona lezaku hi vululekelwe hi nyangwa ya hombe ya ntiro. A n’wana wa hina wa munwe ntsena i wa humile muti, hi wa nga hi na vapswali vo khosahala va lavako ku hlayisiwa, ni lezaku hi wa amukele a tshombanyana yo kari. Nzi lo maha tikonta nzi wona lezaku loku hi xavisa yindlu ya hina hi wa ta kuma mali yo hakhela a koponi leyi yi nga aka hi tlhela hi salelwa hi yoga kala nzi sangula ku hola mali ya mina ya peceni. Hi lozwa lezaku le Bolívia ku na ni vanhu vo tala va vumelako ku gonza Biblia ni lezaku a ku hanya seyo a zi duri nguvu. Hikwalaho hi lo rura. A ku tolovela muti wa hina wa wuswa zi wa nga olovi. Zontlhe zilo zi wa hambene nguvu ni lezi hi nga zi tolovele le Amerika wa le Nwalungu. Kanilezi a kutikarata ka hina ku chachazelwe.”

¹¹ Robert i engeta aku: “A wutomi ga hina gontlhe ka xikhati lexi gi talele ka mitiro ya bandla. A vanhu vo kari hi gonzileko navo Biblia va bapatizilwe. A ngango wo kari hi gonzileko nawo wu hanya wusiwaneni ga hombe ka xidoropana xi kumekako kule ni laha hi nga kona. Kanilezi, viki ni viki, a ziro za ngango lowu zi famba pfhuka lowo wo leha ziya doropeni kasi ku ya maha mitlhangano. Kunene, litsako la hombe ka hina a ku wona ngango lowu na wu kula hi tlhelo ga moya. A xinwani kambe xi hi tsakisako nguvu hi lezi a mufana wabye wa nhonzo a nga teka wuphayona.”

XILAVEKO KA VANHU VA WULAWULAKO TIRIMI TA MATIKO-WUNDLE

12, 13. Hlawutela tshango ga muKristu loyi a nga sangula ku tirela Jehova hi tindlela tiswa anzhako ka ku kuma peceni.

¹² A mabandla ni mitlawa ya tirimi ta matiko-wundle ma nga vuneka nguvu hi xikombiso xa vamakabye va xinuna ni va xisati va kulileko. A xinwani kambe, hi lezaku zi nga tsakisa nguvu ku tira ka xipanze lexo. Hi xikombiso, Brian i ngalo: “Mina ni sati wa mina hi lo sangula ku hanya wutomi go rula a xikhati lexi nzi nga tlhanganyisa a 65 wa malembe, ku nga tanga yo kuma peceni hi kulaya ka mufumo wa Grã-Bretanya. A vana va hina va wa humele miti, niku zi wa hi karatela ku kuma vanhu va tsakelako ku gonza a Biblia. Zonake nzi lo kumana ni jaha ga muChina na gi kambisisa zo kari ka universidade ya lomu xipanzeni xa hina. I lo vumela kuta mitlhanganweni, niku zalezo nzi lo sangula ku gonza naye Biblia. Anzhako ka maviki matsongwani, i lo sangula kuta ni munghana wa muChina. Maviki mambiri nzhako ka lezo, i lota ni wa wunharu, zonake ata ni wa wumune.

¹³ “Ka xikhati lexi a muChina wa wutlhanu a nga kombela a xigonzo xa Biblia, nzi lo alakanya lezi: ‘A kuva nzi hi ni 65 wa malembe a zi wuli lezaku nzi fanele ku humula ku tirela Jehova.’ Hikwalaho, nzi lo wutisa sati wa mina, loyi nzi mu hunzako hi malembe mambiri, lezaku a nga zi lavi ku gonza a xiChina ke. Hi lo gonza lirimi lelo hi ku tirisa makaseti ma gravarilweko. Lezo ku’ve ka khume ga malembe ma hunzileko. A kuxumayela hi lirimi la matiko-wundle zi hi mahile hi ti zwisa ku khwatsi ha hi vaswa. Kala lezi, hi gonzile Biblia ni 112 wa vaChina! A kutala kabye vata mitlhanganweni. A munwe wabye makunu i tira na hina kota phayona.”

TI BUZE HI KU MAHA LEZI U ZI KOTAKO

14. A maKristu ma khosaheleko ma nga tsaka hi ku tiva yini, niku xana a xikombiso xa Paule xi nga ma tiyisisa kuyini hlana?

¹⁴ Hambu lezi a maKristu yo tala ma nga ka 50 wa malembe ma vululekelweko hi nyangwa ya ku maha a zilo ziswa ntirweni wa Jehova, a hi wontlhe ma zi kotako. A vokari vabye a va hanyi khwatsi, niku a vanwani va hlayisa vapswali va khosaheleko kutani vanana va nga faneliko ku siyiwa voce. Wa zi kota ku tsaka hi ku tiva lezaku Jehova wa nyika lisima ni ka xihi u mahako ntirweni wakwe. Hikwalaho, wutshanwini ga ku kwata hi kota ya lezi u nga zi kotiko ku maha, tsaka hi lezi u mahako. Hi nga ehleketa hi xikombiso xa mupostoli Paule. Ku ringana malembe yo kari, i wa tshama na a valelwe laha mutini, a nga ha zi koti ku maha tipfhumba takwe ta wurumiwa. Kanilezi, ni xihi xikhati lexi a vanhu va nga mu enzela, Paule i wa wulawula navo xungetano hi Mitsalo a tlhela a va tiyisa kukholweni. — Miti. 28:16, 30, 31.

15. Hikuyini a maKristu lawa ma khosaheleko ma nyikiwako nguvu lisima?

¹⁵ Jehova wa tsaka kambe hi lezi lava va kulileko va zi kotako ku maha ntirweni wakwe. Hambu lezi Solomoni a kombileko lezaku a masiku ya zikarato zi yelanako ni wukhosana a hi wona ya ma nene kuhanyeni, Jehova wa nyika lisima lezi a maKristu ma khosaheleko ma zi kotako ku maha kasi ku mu dumisa. (Luka 21:2-4) A mabandla ma tsaka hi kota ya xikombiso xo tsumbeka xa malanza ya kale ma nga xikari ka wona.

16. Malungelo muni lawa Ana wo khosahala kuzilava a nga kala ku ti buza hi wona, kanilezi zini a nga maha kasi ku khozela Nungungulu?

¹⁶ A Biblia gi bika lezaku a wasati wo kari wo khosahala a vitwako Ana i lo simama ku dumisa Jehova hi kutsumbeka kala wukhosaneni gakwe. A xikhati lexi Jesu a nga pswaliwa, Ana i wa hi noni ya 84 wa malembe. Zi wonekisa ku khwatsi a nga ha hanyangi nguvu laha ka kuza ava mulanzeli wa Jesu, a totiwa hi moya wa ku basa, kutani ku ti buza hi ku xumayela mahungu yo saseka ya Mufumo. Hambulezo, lezi Ana a nga zi kota ku maha, i wa xalala hi zona. “I wa nga suki le tempeleni, na a khozela hi ku yila ni mikhongelo a wusiku ni mumu.” (Luka 2:36, 37) Laha a vapristi va nga hisa libani tempeleni mixo ni mixo, gambo ni gambo, Ana i wa hi zinwe ni xidlemo xi tsombeneko tsenzeleni a maha mukhongelo na a nga zwati gezu kuzilava ku ringana khihlanya ga hora. A xikhati lexi a nga wona Jesu na a ha hi nwanana, i lo sangula ku “wulawula hi nwanana ka vontlhe lava va nga cuwukela a kutirulwa ka Jerusalema.” — Luka 2:38.

17. Hi nga ma vunisa kuyini a maKristu ma khosaheleko ni ma babyako lezaku ma seketela a wukhozeli ga lisine?

¹⁷ Inyamutlha, hi fanele ku tshama na hi tlharihela ku vuna maKristu lawa ma khosaheleko kutani ma babyako. A vokari va xuvako nguvu kuya mitlhanganweni ya bandla ni mitlhanganweni ya hombe za va karatela nguvu ku maha lezo. Ka matshamu yo kari, a mabandla ma maha a malulamiselo ya liranzo ya lezaku a vamakabye lava va khosaheleko va ingisela mitlhangano hi telefone. Ka matshamu manwani, a zi koteki. Hambu zi hi tano, a maKristu ma nga zi kotiko kuya mitlhanganweni ma zi kota ku seketela wukhozeli ga lisine. Hi xikombiso, a mikhongelo yabye yi nga maha lezaku a bandla ga wuKristu gi humelela. — Gonza Tisimu 92:13, 14.

18, 19. (a) Hikuyini a maKristu ma khosaheleko kuzilava ma nga zi tiviko ku a xikombiso xabye xa tiyisa vanwani ke? (b) Xana a xileletelo lexi xaku: “Alakanya Muvangi wa wena” xi tira ka mani?

¹⁸ Za koteka ku ngha a maKristu ma khosaheleko ma nga zi tivi lezi a xikombiso xabye xi tiyisisako zona vanwani. Hi xikombiso, hambu lezi Ana a ngaya tempeleni malembe wontlhe lawo hi kutsumbeka, kuzilava i wa nga zi tivi lezaku a xikombiso xakwe xi wa ta simama ku tiyisa vanwani hi mazana ya malembe. A liranzo la Ana ha Jehova li lo tsaliwa lomu ka Biblia. Handle ko kanakana, a liranzo la wena hi Nungungulu li tsalilwe timbilwini ta maKristu-kuloni. A zi hlamalisi lezi a Mhaka ya Nungungulu yi nge ngalo: ‘A hloko ya wuvu xidlodlo xa wudzunzo loku yi kumeka tindleleni ta kululama’! — Mav. 16:31.

¹⁹ Hontlhe hi na ni kugumelwa ka lezi hi zi kotako ku maha ntirweni wa Jehova. Kanilezi ngha hina ha ha hiko ni ntamu hi chela kota ka magezu lawa ma pimisilweko yaku: “Alakanya Muvangi wa wena . . . na ku nga se kuta a masiku ya kubiha.” — Mutsh. 12:1.