Waya mahlweni ni hlengeletano ya Jehova ke?

1. I hlengeletano muni yi nga valeta a Israeli wo hluwuka hi vanhu va vitaniwako hi vito ga Jehova ke? (Wona mufota kusanguleni ka nzima.)

JEHOVA hi yena a nga yimisa a bandla ga wuKristu ka zana ga malembe go sangula ni ku vuxa a wukhozeli ga lisine xikhatini lexi. Kota lezi hi zi wonileko ka nzima yi nga hunza, a hlengeletano leyi yi nga wumbiwa hi valanzeli va Kristu vo sangula yi lo valeta a tiko ga Israeli go hluwuka hi vanhu va vitaniwako hi vito ga Jehova. A hlengeletano leyo ya yiswa, yi ranziwako nguvu hi Nungungulu, yi lo pona kulobyisweni ka Jerusalema hi 70 Nguveni ya Hina. (Luka 21:20, 21) A zilo lezo zi mahekileko zaneni go sangula zi wa komba lezi zi nga wa ta maheka ka malanza ya Jehova ya masiku lawa. Lokuloku, a tiko ga Satani gi ta lobyiswa, kanilezi a hlengeletano ya Nungungulu yi nga ta lobyiswa. (2 Tim. 3:1) Xini xi hi tiyisekisako ke?

2. Zini lezi Jesu a nga wula xungetano hi “kuxaniseka ka hombe,” niku ku ta sangulisa kuyini?

² Xungetano hi kuvakona kakwe ni kugumesa ka tiko, Jesu i te ngalo: “Ku tava kona a kuxaniseka ka hombe, loku ku nga ngha ku nga hi kona hi kusanguleni ka misava kala makunu, cima ku nga ta ku va kona kambe.” (Mat. 24:3, 21) A kuxaniseka loko ku nga tshukangiko ku woniwa, ku ta sangula xikhati lexi Jehova a to lovisa a ‘Babuloni loyi wa hombe,’ a mufumo wa misava yontlhe wa wukhongeli ga mawunwa, hi ku tirisa a mifumo ya politika. (Kuv. 17:3-5, 16) Zini zi to maheka hi kulanzela?

A KUVUKELA KA SATANI KU YISA HAR-MAGEDONI

3. Anzhako ka kuloviswa ka wukhongeli ga mawunwa, xini xi to humelela a malanza ya Jehova?

³ Anzhako ka kuloviswa ka wukhongeli ga mawunwa, Satani ni tiko gakwe i ta vukela a malanza ya Jehova. Hi xikombiso, xungetano hi ‘Goge wa le tikweni ga Magoge,’ a Mitsalo yi wula lezi na ka ha hi mahlweni: “U ta kanziha, u tata kukotisa a bhubhutsa, u fanana ni refu gi fenengetako misava, wena ni mitlawa ya wena yontlhe ni matiko yo tala ma nga zinwe na wena.” Hi kota ya lezi a Timboni ta Jehova ti nga hiko na masochwa ni lezi ti nga vanhu vo rula ka vontlhe laha misaveni, ti ta wonekisa ku khwatsi a ti na muvikeli. Kanilezi loyi a to ti vukela i ta zi wona lezaku i wo ti khohlisa! — Ezek. 38:1, 2, 9-12.

4, 5. Xana Jehova i ta maha yini laha Satani a to zama ku lovisa malanza yakwe?

⁴ Xana Nungungulu i ta maha yini laha Satani a to zama ku lovisa vanhu vakwe? Jehova i ta nghenela mhaka leyi kasi ku va vuna, a kombisa fanelo yakwe kota Hosi ya Hombe Wuakweni Gontlhe. Jehova i wona kuvukelwa ka malanza yakwe khwatsi hi loku ku hi yena a vukelwako. (Gonza Zakaria 2:8.) Hikwalaho, a Dadani wa hina wa le tilweni i ta tekela ku maha xo kari kasi a hi tlhatlhisa. A kutlhatlhiswa loko ku ta chikela magumo ya wona yo hlamalisa hi kulobyiswa ka tiko ga Satani yimpini ya Har–Magedoni, ku nga “kulwa ka siku . . . ga hombe ga Nungungulu wa Ntamu-wontlhe.” — Kuv. 16:14, 16.

⁵ Xungetano hi Har–Magedoni, a xiprofeto xa Biblia xi ngalo: “Jehova i ni zunga ni matiko, i ta lamula nyama yontlhe; i ta nyikela a vabihileko ka supado, ku wula Jehova. Jehova wa tiyimpi i ngalo: A khombo gi taya ka tiko ginwe ni ginwani, a xingulu xi chavisekako xi ta huma le magemetamusi ya misava. Lava va delweko hi Jehova va ta mbambamela misaveni kusukela mbhirini kala ka yinwani mbhiri ya misava; va nga ta rilelwa, hambu ku hlengeletiwa, hambu ku lahliwa, va ta maha koho misaveni.” (Jer. 25:31-33) A Har–Magedoni yi ta lovisa a tiko legi ga kubiha. A tiko ga Satani gi ta loviselwa magumo, kanilezi a xipanze xa laha misaveni xa hlengeletano ya Jehova xi ta pona.

LEXI XI MAHAKO A HLENGELETANO YA JEHOVA YI ANZA NYAMUTLHA

6, 7. a) Xana lava va wumbako “xidlemo xa tsanza-vahlayi” vata hi kwihi? b) Kuanza muni ku wonekako ka malembe lawa?

⁶ A hlengeletano ya Nungungulu ya pona ku loviswa yi tlhela yi anza hakuva a vanhu va yona va amukelekako ka Jehova. A Biblia ga hi tiyisa giku: “A mahlo ya [Jehova] ma cuwuka a valulamileko, ni tindleve [takwe] ti kangatele mikombelo yabye.” (1 Ped. 3:12) A valulamileko va patsa “xidlemo xa tsanza-vahlayi” xi “humako kuxanisekeni ka hombe.” (Kuv. 7:9, 14) A vanhu lavo va ponako a hi “xidlemo” ntsena, kanilezi “xidlemo xa tsanza-vahlayi” — ku nga vanhu va talela ga cima. U tava xikari ka lava va to pona “kuxanisekeni ka hombe” ke?

⁷ Xana lava va wumbako xidlemo xa tsanza-vahlayi vata hi kwihi? Hi kuya hi lezi Jesu a nga profeta, a vanhu lavo va tlhanganyisilwe zinwe kota xipanze xa xiwoniso xa kuvakona kakwe. I te ngalo: “A ivangeli leyi ya mufumo yi ta kanelwa misaveni yontlhe, kasi yiva wukustumunyu ka matiko wontlhe; hi kona ku ta nga chikela a kugumesa.” (Mat. 24:14) Masikwini lawa yo gumesa, lowu hi wona ntiro wa hombe ka yontlhe wa hlengeletano ya Nungungulu. Hi kota ya ntiro wa kuxumayela ni kugonzisa wu mahiwako hi Timboni ta Jehova misaveni yontlhe, a vanhu va timiliyoni va kari va gonza ku khozela Nungungulu ‘hi moya ni lisine.’ (Joh. 4:23, 24) Hi xikombiso, ka khume ga malembe ma ha hi ku hunzako — kusukela ka lembe ga ntiro ga 2003 kala 2012 — ku bapatizilwe a xipimo xa 2.707.000 wa vanhu kota xikombiso xa kutihendleleta kabye ka Nungungulu. Misaveni yontlhe, ku na ni xipimo xo hunza 7.900.000 wa Timboni ka xikhati lexi, niku ku na ni timiliyoni to tala ti ti patsako nato, nguvunguvu xikhatini xa Xialakanyiso xa lembe ni lembe. A hi ti dzunzi hi mitsengo, hakuva hi Nungungulu a kulisako. (1 Kor. 3:5-7) Hambulezo, za woneka lezaku a xidlemo xa tsanza-vahlayi xa kula niku xi simama ku kula lembe ni lembe!

8. Xini xi mahako kuva ni kuanza ko hlamalisa hlengeletanweni ya Jehova masikwini ya hina ke?

⁸ Ku na ni kuanza ko hlamalisa ka ntsengo wa malanza ya Nungungulu hakuva Jehova wutsumbu wa vuna Timboni takwe. (Gonza Isaya 43:10-12.) A kuanza loku ku wa sina ku profetilwe hi magezu lawa: “Loyi tsongwani i ta enzeleka ava khume ga mazana, ni loyi wa tsongwani nguvu i tava . . . tiko ga ntamu. Mina Jehova nzi ta zi hatlisisa zikhatini za zona.” (Isa. 60:22) Ka xikhati xo kari, a misalela yi totilweko yi wa fana ni “loyi tsongwani,” kanilezi a ntsengo wabye wu lo anza a xikhati lexi a vaIsraeli vanwani va moya va nga nehiwa ka hlengeletano ya Nungungulu. (Gal. 6:16) Hi kota ya lezi Jehova a ma katekisako hi kufamba ka malembe, a kuanza ka ha simama hi lezi ka ha hlengeletwako a xidlemo xa tsanza-vahlayi.

LEZI JEHOVA A ZI LAVAKO KA HINA

9. Zini hi faneleko ku maha kasi hi ti buza hi zitsumbiso zo tsakisa zi nga Mhakeni ya Nungungulu?

⁹ Kani hi maKristu ma totilweko, kani hi ziro za xidlemo xa tsanza-vahlayi, hina hontlhe ha zi kota ku ti buza hi wumanziko go saseka nguvu gi tsumbisilweko Mhakeni ya Nungungulu. Hambulezo, kasi hi ti buza hi zilo lezo, hi fanele ku ingisa zileletelo za Jehova. (Isa. 48:17, 18) Ehleketa hi vaIsraeli lava va nga hanya hi Nayo wa Mosi. A kungo ga Nayo ku wa hi ku vikela vanhu va ka Israeli hi ku va nyika milayo yi nene yi nga hi ni zileletelo xungetano hi kuhlengelwa ka masango, mamahela ya mabhinzu, mahlayisela ya vanana, ku khoma ni ku tirisana khwatsi ni vanhu-kulobye, ni zinwani. (Ekso. 20:14; Levi 19:18, 35-37; Deut. 6:6-9) A ku lanzela zileletelo za Jehova hinawu za hi vuna timhakeni leto — niku a ku maha kuranza kakwe a zi hi karateli ne ni kutsongwani. (Gonza 1 Johani 5:3.) Kunene, kota lezi a vaIsraeli va nga vikelwa hi Nayo, na hinawu, a ku lanzela milayo ya Jehova Nungungulu ni matshinya ya milayo ya Biblia a zi hi vikeli ntsena, kanilezi zi tlhela zi hi nyika “wutomi kukholweni.” — Tit. 1:13.

10. Hikuyini hi faneleko ku ti vekela xikhati xa ku gonza Biblia ni ku maha Wukhozeli ga Ngango viki ni viki?

¹⁰ A xipanze xa laha misaveni xa hlengeletano ya Jehova xiya mahlweni hi tindlela to tsalangana. Hi xikombiso, a kuzwisisa ka hina a lisine la Biblia kuya ku dlunyateka. Zi fanele kuva tano hakuva “a ndlela ya valulamileko yi kotisa kuwonekela ka mixo, loku ku enzelekako kala a hlikanhi wu mbhelela.” (Mav. 4:18) Kanilezi hi nga ha ti wutisa lezi: ‘Xana a nzi sali nzhako ka zilo za kale na kuzwisisa ka hina a lisine la Biblia ku chukwatisilwe? Mukhuwo wa mina a ku gonza Biblia siku ni siku ke? Xana nza gonza a mabhuku ya hina wontlhe kala nzi mbheta? Mina ni ngango wa mina ha maha a Wukhozeli ga Ngango viki ni viki ke?’ A kutala ka hina ha vumela lezaku a ku maha zilo lezi a zi karati nguvu. Ka zikhati zo tala, lexi xi lavekako ku ti vekela xikhati xa ku maha zilo lezo. Hakunene za lisima nguvu a kuva ni wutivi go mbhelela ga Biblia, ku gi tirisa ni ku kula hi tlhelo ga moya — nguvunguvu ka xikhati lexi a kuxaniseka ka hombe ku yako ku tshinela!

11. Xana a mibuzo ya kale ni mitlhangano ya hina ya bandla, mitlhangano ya hombe, ni migotsovanyano xikhatini lexi yi vuna hi tindlela muni?

¹¹ A hlengeletano ya Jehova yo hi mahela lezi za zi nene nguvu a xikhati lexi yi hi kucako a ku ingisa wusungukati ga mupostoli Paule gaku: “Ngha hi khatalelana kasi ha susumetana liranzweni ni mitirweni yo saseka; na hi nga tsiki a tinkhozo ta hina khwatsi hi mukhuwo wa vanwani kanilezi hi khongotelana; nguvunguvu kota lezi mu wonako lezaku a Siku gi tshinela kusuhani.” (Maheb. 10:24, 25) A mibuzo ya lembe ni lembe ni mitlhangano yinwani kasi ku khozela yi wa aka a vaIsraeli hi tlhelo ga moya. Tlhatakumbiri, a zimaho zo kota Mubuzo wo hlawuleka wa Mixaxa masikwini ya Nehemia zi wa hi xikhati xa kutsakisa. (Ekso. 23:15, 16; Neh. 8:9-18) Hi kuma xivuno xo fana mitlhanganweni ya hina ya bandla, mitlhanganweni ya hombe, ni migotsovanyanweni. Ngha hi lonzowota khwatsi a malulamiselo lawa kasi hi tiya hi tlhelo ga moya ni kuva ni litsako. — Tit. 2:2.

12. Hi fanele ku ti zwisa kuyini hi ntiro wa ku xumayela a Mufumo?

¹² Kota vanhu va hlengelako ni hlengeletano ya Nungungulu, ha ti buza hi kuva ni xiavelo ntirweni wo basa wa ku bika mahungu yo saseka ya Nungungulu. (Rom. 15:16) A kuva ni xipanze ntirweni lowu wo basa zi hi maha “zitiri-kulobye” na Jehova, a nga ‘Loyi a basileko.’ (1 Kor. 3:9; 1 Ped. 1:15) A ku xumayela mahungu yo saseka zi basisa vito go basa ga Jehova. Handle ko kanakana, i lungelo ga hombe a ku nyikiwa ntiro wa ku bika a ‘ivangeli ya kungangamela ya Nungungulu wo tsaka.’ — 1 Tim. 1:11.

13. A lihanyo li nene la moya ni wutomi ha goce zi khegele ka yini?

¹³ Nungungulu i lava lezaku hiva ni lihanyo li nene la moya hi ku namarela ka yena ni ku seketela a hlengeletano yakwe mitirweni ya yona yo tsalangana. Mosi i lo byela vaIsraeli aku: “Nza vitana a tilo ni misava a kuva vakustumunyu va mina, lezaku mina nzi vekile mahlweni ka nwina a wutomi ni kufa, a zikatekiso ni makhombo. Hikwalaho hlawula wutomi kasi wa fela ku hanya, wena ni pswalo wa wena; u ranza Jehova Nungungulu wa wena, u ingisa a gezu gakwe, u namarela ka yena; hakuva yena mbutomi ga wena ni kuanza ka masiku ya wena, kasi wena wa fela ku tshama ka tiko legi Jehova a hlambanyileko ka vararu va wena, Abrahama, na Isaka, na Jakobe, a ku va nyika gona.” (Deut. 30:19, 20) A wutomi ga hina gi khegela ka ku maha kuranza ka Jehova, ku mu ranza, ku ingisa a gezu gakwe, ni ku namarela ka yena.

14. Xana a makabye wo kari i ti zwisile kuyini xungetano hi xipanze xo woneka xa hlengeletano ya Nungungulu ke?

¹⁴ Makabye Pryce Hughes, loyi a nga namarela ka Nungungulu ni ku simama a famba ni hlengeletano Yakwe, i tsalile lezi: “Nza bonga nguvu hi kota ya lezi nzi hanyako na nzi tiva makungo ya Jehova kusukela xikhatanyana mahlweni ka 1914 . . . Ka mina, a ku na nchumu wa lisima a ku hunza ku tshama kusuhani ni hlengeletano ya Jehova yi wonekako. Lezi nzi nga kumana nazo kusanguleni zi nzi gonzisile lezaku a ku tsumba maalakanyo ya vanhu wupumbu. Zalezi nzi nga tiva lezo, nzi lo ti yimisela a ku simama nzi famba ni hlengeletano leyi yo tsumbeka. Xana yi ngava kona yinwani ndlela ya ku kuma thomo mahlweni ka Jehova ahandle ka ku simama hlengeletanweni yakwe ke?”

U NGA SALI NZHAKO NI HLENGELETANO YA NUNGUNGULU

15. Nyika xikombiso xa lomu Mitsalweni xi kombako lezi hi faneleko ku ku wonisa zona a kuchukwatiswa ka mazwisisela ya hina a Biblia.

¹⁵ Loku hi lava ku kuma thomo mahlweni ka Jehova ni ku katekisiwa hi yena, hi fanele ku seketela a hlengeletano yakwe ni ku vumela lezi zi ciciwako ka mazwisisela ya hina Mitsalo. Hi nga ehleketa hi mhaka leyi: Anzhako ka kufa ka Jesu ku wa hi ni makume ya mazana ya maKristu ya vaJuda lawa ma nga pinyamele nguvu Nayo zi tlhela zi ma karatela a ku ti tlhatlhisa ka wona. (Miti. 21:17-20) Hambulezo, laha ma nga kuma xivuno xa Paule ka papilo gakwe ka maHeberu, ma lo vumela lezaku ma wa basisilwe ku nga hi hi miphahlelo leyi yi “nyikelwako hi nayo,” kanilezi “hi kunyikelwa ka miri wa Jesu Kristu kanwe ku mbhela.” (Maheb. 10:5-10) Handle ko kanakana, a kutala ka maKristu lawo ya vaJuda ma lo lulamisa a maalakanyo yabye ma tlhela ma kula hi tlhelo ga moya. Hinawu, hi fanele ku gonza hi kuchela-kota hi tlhela hi nga ti nonohisi tihloko a xikhati lexi ku ciciwako zo kari ka mazwisisela ya Mhaka ya Nungungulu kutani ntirweni wo xumayela.

16. (a) Makatekwa muni ma to maha lezaku a wutomi misaveni yiswa gi tsakisa? b) Zini lezi u zi langutelako hi mahlo yo pswhuka misaveni yiswa?

¹⁶ Vontlhe lava va simamako ku tsumba Jehova ni hlengeletano yakwe va kuma makatekwa yakwe xontlhe xikhati. A vatotilweko vo tsumbeka va ta ti buza hi malungelo ya hombe kota zigatshomba-kulobye na Kristu le tilweni. (Rom. 8:16, 17) Loku hi hi ni kutsumba ka ku hanya laha misaveni, a zi to ku nanziha a ku hanya Paradiseni. Kota xipanze xa hlengeletano ya Jehova, hi nga wona litsako hi nga nalo hi ku byela vanwani xungetano hi misava yiswa yi tsumbisiwako hi Nungungulu! (2 Ped. 3:13) A Tisimu 37:11 li ngalo: “Lava va rulako va taga tshomba ya tiko, va ta xalaliswa hi kurula ka hombe.” ‘Va ta aka tiyindlu va tshama ka tona, va tsakela mitiro ya mandla yabye.’ (Isa. 65:21, 22) Ku nga ta hava kona kutsimbeketwa, wusiwana, ge hambu ndlala. (Tis. 72:13-16) Babuloni loyi wa hombe a nga ta ha khohlisa munhu kambe hakuva a nga ta hava kona. (Kuv. 18:8, 21) A vafileko va ta vuxiwa va tlhela va nyikwa a lungelo ga ku hanya kala kupinzuka. (Isa. 25:8; Miti. 24:15) Hi nga wona a zilo lezi zo tsakisa zi rinzelako a vanhu va timiliyoni lava va ti hendleletileko ka Jehova! Kasi a zitsumbiso lezo za Biblia zi tatiseka ka munwe ni munwani wa hina, hi fanele ku simama hi kula hi tlhelo ga moya, hi nga sali nzhako ni hlengeletano ya Nungungulu, hi simama ku tsutsuma nayo.

17. Ma fanele kuva wahi mawonela ya hina xungetano hi wukhozeli ga Jehova ni hlengeletano yakwe?

¹⁷ Kota lezi a kulobyiswa ka tiko legi ku nga kwalaha nyongeni, ngha hi tiya kukholweni hi tlhela hi mu bonga nguvu Nungungulu hi kota ya ku hi mahela malulamiselo ya ku mu khozela. Loko kuve kupima ka Davida, loyi a nga yimbelela aku: “Xilo xinwe nzi kombelako ka Jehova, nzi ta lava lexo: Hi lezaku nzi tshama ndlwini ya Jehova a masiku wontlhe ya kuhanya ka mina, kasi nza wona a kusaseka ka Jehova, nzi languta tempeli yakwe.” (Tis. 27:4) Ngha munwe ni munwani wa hina a namarela ka Nungungulu, a nga hambani ni vanhu vakwe, a tlhela a simama ku tsutsuma ni hlengeletano ya Jehova a nga sali nzhako.