Hi xaxametilwe kasi hi maha kuranza ka Jehova

MISAVENI yontlhe ku na ni tihlengeletano to tala ta wukhongeli, ta politika, ta mabhinzu, ni ta vanhu ti nga ni matshamela yo hambanahambana, makungo, mawonela, ni tifilozofia. Kanilezi, ku na ni hlengeletano yinwe yo hambana ni tontlhe leto. A Mhaka ya Nungungulu yi komba hi kudlunyatekileko lezaku a hlengeletano leyo hi leyi ya Timboni ta Jehova.

² Lexi xi tsakisako hi lezaku u ti patsile ni hlengeletano ya Jehova. U tivile a kuranza ka Nungungulu, niku wa ku maha. (Tis. 143:10; Rom. 12:2) U muhuweleli wo hiseka, a tirako ni hlengeletano ya liranzo ya vamakabye misaveni yontlhe. (2 Kor. 6:4; 1 Ped. 2:17; 5:9) Kota lezi zi tsumbisilweko ka Mhaka ya Nungungulu, a ku maha kuranza ka Nungungulu zi ku nehela makatekwa yo tala ni kuxalala ka hombe. (Mav. 10:22; Mar. 10:30) Loku u maha kuranza ka Jehova hi kutsumbeka zalezi, wo ti longiselela a wumanziko go tsakisa. — 1 Tim. 6:18, 19; 1 Joh. 2:17.

³ A Muvangi wa hina wa Hombe i na ni hlengeletano yo hlawuleka ya misava yontlhe yi rangelwako hi yena. Lezo zi wula ku hi Jehova a yi rangelako, loyi a nga Hloko ya zilo zontlhe. Ha mu tsumba hi kumbhelela. Hi yena Mulamuli wa hina, Munyiki wa hina wa nayo, ni Hosi ya hina. (Isa. 33:22) Lezi a nga Nungungulu wa ku xaxameta, i mahile malulamiselo ya lezaku hi ‘tirisana naye’ kumaheni ka kungo gakwe. — 2 Kor. 6:1, 2.

⁴ Laha a kugumesa ka tiko legi go biha ku yako ku tshinela nguvu, hina a hi tlheleli nzhako kanilezi hiya mahlweni na hi rangelwa hi Hosi ya hina yi yimisilweko, Jesu Kristu. (Isa. 55:4; Kuv. 6:2; 11:15) Jesu wutsumbu i wulile lezaku a valanzeli vakwe va wa ta maha mitiro ya hombe nguvu yo hunza leyi yena a yi mahileko a xikhati lexi a nga hi laha misaveni. (Joh. 14:12) Zi wa tava tano hakuva a valanzeli va Jesu va wa ta tala va tlhela vava ni xikhati xo leha xa ku xumayela ka matshamu yo tala. Va wa ta kanela a mahungu yo saseka ya Mufumo wa Nungungulu kala magemeta-musi ya misava. — Mat. 24:14; 28:19, 20; Miti. 1:8.

⁵ Lezo zi kari zi tatiseka, kota lezi zi kombiswako ka Anuários das Testemunhas de Jeová. Hambulezo, kota lezi Jesu a wulileko, a ntiro wa ku xumayela a mahungu yo saseka wu ta gumesa ka xikhati xi yimisilweko hi Jehova. A zikombiso zontlhe za wuprofeti zi nga Mhakeni ya Nungungulu zi komba lezaku a siku ga Jehova ga hombe ni go tshisa gi laha kusuhani. — Joe. 2:31; Zef. 1:14-18; 2:2, 3; 1 Ped. 4:7.

⁶ Laha hi yako hi zi zwisisa khwatsi lezi Jehova a zi lavako xikhatini lexi xo gumesa, hi fanele ku engetela a mizamo ya hina ya ku maha a kuranza kakwe. Lezo zi lava lezaku hi zi tiva khwatsi lezi a hlengeletano ya Nungungulu yi tirisako zona hi tlhela hi tirisana khwatsi nayo. A matirela ya hlengeletano ma seketelwe ka matshinya ya milayo ya Biblia, a ku patsa ni milayo, zileletelo, ni tigonzo ti kumekako Mhakeni yi pimisilweko hi Nungungulu. — Tis. 19:7-9.

⁷ Loku a vanhu va Jehova va lanzela a wurangeli legi gi seketelwako ka Biblia, va hanya ni ku tira zinwe hi kurula ni kuzwanana. (Tis. 133:1; Isa. 60:17; Rom. 14:19) Xini xi tiyisako a kubohana loku hi nga nako ni vamakabye va hina misaveni yontlhe? Liranzo. Hi kuciwa hi liranzo ka zontlhe hi mahako. (Joh. 13:34, 35; Kol. 3:14) Hi ku tirisa a mahela legi gi amukelwako hi Nungungulu, hi famba zinwe ni xipanze xa hlengeletano ya Jehova ya le tilweni.

XIPANZE XA LE TILWENI XA HLENGELETANO YA JEHOVA

⁸ Muprofeti Isaya, na Ezekieli, na Danieli va vile ni miwoniso ya xipanze xa le tilweni xa hlengeletano ya Jehova. (Isa., xip. 6; Ezek., xip. 1; Dan. 7:9, 10) Hi kufanana, mupostoli Johani i vile ni muwoniso wa xipanze lexo xa le tilweni niku i lo hi nyika masemanyana ya xipanze lexo ka bhuku ga Kuvululelwa. I lo wona Jehova na a hi xitshanwini xo ngangamela na a hi ni tingelosi, leti ti nga huwelela tiku: “Basa, Basa, Basa, Hosi Nungungulu, a Nyamintamu, Loyi a nga hi kona, Loyi a nga kona, Loyi a ta ngata.” (Kuv. 4:8) Johani kambe i wonile a “yivana na yi yimile xikari ka xitshamu xa wuhosi,” a Yivana ya Nungungulu, ku nga Jesu Kristu. — Kuv. 5:6, 13, 14; Joh. 1:29.

⁹ A kuva Jehova a tshamile xitshanwini xa wuhosi zi komba lezaku hi yena Hloko ya hlengeletano leyi. Xungetano hi yena ni xikhundla xakwe xo tlakuka, a bhuku ga 1 Kronekele 29:11, 12 gi ngalo: “Ga wena Jehova a wukulu ni ntamu, ni wudumo, ni kubasa, ni wuhosi, hakuva zontlhe lezi zi nga le tilweni ni laha misaveni za wena; a mufumo ngwa wena Jehova, wena loyi u tlakukileko, u hi hosi hehla ka zilo zontlhe! A mufumo ni wudumo zita hi ka wena; wena u fumelako zilo zontlhe; a ntamu ni wunhenha zi le canjeni ga wena; hi wena u zi kotako a ku nyika wukulu ni ntamu ka vontlhe.”

¹⁰ Kota mutiri-kulobye na Jehova, Jesu Kristu i na ni xikhundla xo tlakuka nguvu le tilweni, niku i nyikilwe ntamu wa hombe nguvu. Kunene, Nungungulu “i vekile a zilo zontlhe lahasi ka mikonzo yakwe, a mu yimisa a kuva hloko ya zilo zontlhe lomu bandleni.” (Efe. 1:22) Mupostoli Paule i te ngalo ha Jesu: “Nungungulu i lo mu tlakusa nguvu, a mu nyika vito gi nga hehla ka mavito wontlhe; lezaku hi vito ga Jesu a madzolo ya vontlhe lava va nga le tilweni, ni laha misaveni, ni lahasi ka misava, ma ta mu khizamela, kasi a tirimi tontlhe ti fela ku wulela lezaku Jesu Kristu i Hosi, a dumiswa Nungungulu Dadani.” (Fil. 2:9-11) Hikwalaho, hi nga tsumba hi kumbhelela lezaku Jesu Kristu i rangela hi ndlela yo lulama.

¹¹ Muwonisweni wakwe, muprofeti Danieli i wonile a wakale hi masiku na a hi xitshanwini xakwe xa wuhosi xa le tilweni niku a tingelosi ta ‘mazana ya mazana ti lo mu khozela, ni 10.000 ti wuyetilweko hi 10.000 ti lo yima mahlweni kakwe.’ (Dan. 7:10) A Biblia gi tlhamusela a butho legi ga tingelosi kota “mimoya yi tirako, leyi yi rumiwako a ku tirela lava va ta ngaga a tshomba ya kuhanyiswa.” (Maheb. 1:14) A zivangwa zontlhe lezi zi xaxametilwe ziva ‘zitshamu za wuhosi, tihosi, mifumo ni vafumeli.’ — Kol. 1:16.

¹² Loku hi ti nyika xikhati xa ku tiva zilo lezi za xipanze xa hlengeletano ya Jehova ya le tilweni, hi nga zi kota ku zwisisa a kutizwa ka Isaya ka muwoniso lowu a wonileko “Jehova na tshamile xitshanwini xa hombe xa wuhosi xi tlakukileko,” niku “hehla kakwe ku wa yimile a maserafima.” Isaya i te ngalo: “Khombo ka mina, nzi lovile! Hakuva nzi munhu a nga ni milomu yi nga hlazekangiko, na nzi akile xikari ka vanhu va nga ni milomu yi nga hlazekangiko, hakuva a mahlo ya mina ma wonile a Hosi, Jehova wa tiyimpi.” Kunene, Isaya i lo hlamala nguvu a tlhela a tizwa a nga hi wa nchumu a xikhati a nga zwisisa a wuhombe ga hlengeletano ya Jehova. I wa khumbilwe nguvu hi lezi a nga zi wona, laha kaku loku ku zwele gezu hi le tilweni xungetano hi ntiro wo hlawuleka wa ku huwelela kulamula ka Jehova, Isaya ite: “Hi mina, ruma mina.” — Isa. 6:1-5, 8.

¹³ A ku tiva ni ku tsakela a hlengeletano ya Jehova zi kuca a vanhu Vakwe hi ndlela yo fana. Kota lezi a hlengeletano ya Jehova yi yako mahlweni, hi ti karatela ku famba nayo ni ku kombisa lezaku ha yi tsumba.

A HLENGELETANO YA JEHOVA A YI NYIMI

¹⁴ A xipimo xo ranga xa wuprofeti ga Ezekieli xi kombisa Jehova na a fambisa a kareta ya hombe nguvu ya le tilweni. A kareta leyi yo hlamalisa nguvu yi yimela a xipanze xi nga wonekiko xa hlengeletano ya Jehova. I fambisa kareta leyi hi ndlela ya liranzo, a yi kongomisa ni ku yi tirisa hi kuya hi makungo yakwe. — Tis. 103:20.

¹⁵ A roda ginwe ni ginwani ga kareta leyi gi na ni ginwani gi nga nzeni ka gona — gi hingakanyileko legi ginwani, kanilezi wontlhe ma ringana. Hi ndlela leyo ku nga wuliwa lezaku a maroda ma “famba hi matlhelo ya wona ya mune.” (Ezek. 1:17) A maroda ma nga djika kwalaho ni kwalaho. Hambulezo, a kareta leyi a hi lezaku yo kala yi nga hi na mufambisi kutani muwoneleli wo tlhariha. Jehova a nga tsiki a hlengeletano yakwe yi famba ni ka gihi tlhelo legi yi byekelelako kuya ka gona. Ezekieli 1:20 i wula lezi: “Ni kwihi laha a moya wu nga zi fambisa, zi wa famba.” Hikwalaho, hi Jehova a mahako lezaku a hlengeletano yakwe yi famba ni kwihi laha a moya wu lavako lezaku yiya kona. A xiwutiso hi nga ti mahako hi lexi: ‘Xana nza longoloka ni hlengeletano ya Jehova?’

¹⁶ A ku longoloka ni hlengeletano ya Jehova zi patsa zo tala zo hunza a kuya mitlhanganweni ni ntirweni wa kuxumayela. Kasi hi wula lezaku ha longoloka nayo, a kusangula, hi fanele ku ti karatela ku kula hi tlhelo ga moya. Hi khatalela a zilo lezi “zi nga za lisima nguvu,” hi tlhela hi ti gisa a zakuga za moya lezi hi nyikiwako. (Fil. 1:10, NM; 4:8, 9; Joh. 17:3) Tlhatakumbiri, hi fanele ku alakanya lezaku lomu ku nga ni hlengeletano ku na ni wurangeli ni kutirisana ku nene. Hikwalaho, hi fanele ku xi tirisa khwatsi a xikhati xa hina, ntamu, wutlhari ni titshomba lezaku hi maha a ntiro lowu Jehova a hi nyikileko. Laha hi simamako hi longoloka ni kareta ya Jehova ya le tilweni, a mahanyela ya hina ma ta zwanana ni mahungu lawa hi kanelako.

¹⁷ Hi ku vuniwa hi hlengeletano ya Jehova, hiya mahlweni hi ku maha a kuranza ka Nungungulu. Alakanya lezaku a Mufambisi wa kareta leyi ya le tilweni hi Jehova. Hikwalaho, a ku longoloka nayo zi komba lezaku hi na ni xichawo hi Jehova niku ha gi tsumba a Ribye ga hina. (Tis. 18:31) A Biblia gi tsumbisa lezi: “Jehova i ta nyika ntamu ka vanhu vakwe; Jehova i ta katekisa tiko gakwe a gi nyika kurula.” (Tis. 29:11) Kota lezi hi lumbako a hlengeletano ya Jehova inyamutlha, ha ti buza hi kutiyiswa ni kurula loku a nyikako a vanhu vakwe va xaxametilweko. Handle ko kanakana, hi ta simama ku kuma makatekwa yo tala laha hi yako hi maha kuranza ka Jehova, zezi ni kala kupinzuka.