Hikuyini hi faneleko ku khatala hi Mufumo wa Nungungulu?

A vanhu vo tala misaveni yontlhe va rinzela lezaku a Mufumo wa Nungungulu hi wona wu to va nehela za zi nene. Va lanzela a xikombiso xi vekilweko hi Jesu, loyi a nga gonzisa vapizani vakwe lezaku va khongela vaku: “A wute mufumo wa wena. Kuranza ka wena a ku mahiwe misaveni.” — Mateu 6:10

Lexi xi hlamalisako hi lezaku laha a vanhu vo tala va khatalako nguvu hi Mufumo wa Nungungulu, a tichechi to tala a ti cheli nguvu kota hi wona. Mhakeni leyi, H. G. Wells, a mutsali wa matimu, i hlamalile nguvu loku a wona kuhambana ku nga kona xikari ka lezi Jesu a nga wu nyikisa zona lisima a Mufumo wa Nungungulu ni lezi a tichechi to tala ta wuKristu ti nga wu nyikisiko zona lisima.

A kuhambana ni tichechi leto, a Timboni ta Jehova ti vuvumisa nguvu a Mufumo wa Nungungulu. Ehleketa hi lezi: A revista-tshinya ga hina galegi u lerako zezi gi humesiwa hi 220 wa tirimi. Hweti ni hweti, ku gandliwa xipimo xa 46 wa timiliyoni ta revista legi, hi ndlela leyo gi maha gona revista gi nyikelwako nguvu misaveni. Hi wahi mahungu-tshinya ya revista legi? Wona a hloko ya mhaka yontlhe ya gona: A Murinzeli I huwelela a Mufumo wa Jehova.a

Hikuyini a Timboni ta Jehova ti ti karatako nguvu kasi ku huwelela a Mufumo wa Nungungulu? A xinwe xa zigelo, hi lezaku hi kholwa ku a Mufumo wa Nungungulu i mhaka-tshinya ya bhuku ga lisima ku hunza wontlhe ma nga kona laha misaveni — a Biblia. Tlhatakumbiri, hi kholwa lezaku a Mufumo wa Nungungulu hi wona ntsena wu to mbheta zikarato lezi a vanhu va kumanako nazo inyamutlha.

Na ti yisa kupima ka Mufumo wa Nungungulu, a Timboni ta Jehova ti ti karatela ku lanzela a xikombiso xa Jesu. A xikhati lexi a nga hi laha misaveni, a Mufumo wa Nungungulu ku wa hi wona nchumu wa lisima wutomini gakwe ni hloko ya mhaka-tshinya kuxumayeleni kakwe. (Luka 4:43) Hikuyini a Mufumo wu nga hi wa lisima nguvu ka Jesu? Wena ke, wu nga ku vunisa kuyini? Ha ku ramba lezaku u kambisisa a mihlamulo ya Biblia, hi laha yi tlhamuselwako ha kona ka tinzima ti lanzelako.