HLOKO YA MHAKA YA KAPA | SATANI I KONA HAKUNENE?
Satani I kona hakunene?
Xiphaphiwa xi nga le Madri, Espanha, xi kombisako Satani kota ngelosi yo biha yi wako
“Nzi kulele le El Salvador. Loku nzi nga mu ingisi mamani, i wa nzi byela lezi: ‘Hi loye Diabolus wata a ta ku khoma!’ Mina nzi wa hlamula nziku: ‘Mu tsiki ata!’ Nzi wa kholwa lezaku Nungungulu i kona, kanilezi nzi wa nga kholwi a ku Satani i kona.” — ROGELIO.
Wa yima na jaha Rogelio? Ka mawonela lawa ma lanzelako, hi wahi lawa ma zwisisekako ka wena?
Satani a nga kona; ova mufananiso wa kubiha ntsena.
Satani i kona, kanilezi a nga na mhaka ni vanhu.
Satani i ngelosi ya ntamu yi nga ni kucetelo wa hombe xikari ka vanhu.
Wontlhe a mawonela lawa ku na ni lava va ma seketelako, kuzilava vanhu vo tala nguvu. Hambulezo, za lisima a ku tiva lezaku hi wahi mawonela lawa ma nga ya lisine. Hakuva loku Satani a nga hi kona, lava va kholwako lezaku i kona, va khohlisilwe. Loku Satani a hi kona kanilezi na a nga hi na mhaka ni vanhu, makunu a vanhu vo tala vo ti wonela va tlhela va chava mahala. Kanilezi, loku Satani a hi kona, lezo na a hi mukhohlisi ni mukanganyisi, makunu xigevenga a ku hunza lezi a vanhu va mu alakanyisako zona.
Zezi a hi kambisiseni lezi a Biblia gi hlamulisako zona a ziwutiso lezi za zinharu: Xini kutani hi mani Satani — mufananiso wa kubiha kutani i ngelosi ya ntamu? Loku Satani a hi kona, xana a nga ku mahela za kubiha? Loku ku hi lezaku a nga ku mahela, u nga ti vikelisa kuyini?