HLOKO YA MHAKA YA KAPA | SATANI I KONA HAKUNENE?
Hi fanele ku mu chava Satani?
A monóxido de carbono ya daya niku a yi woneki — a ku fana na Satani
Za karata ku wu wona. A wu na muvala, a wu na masema, la’va dawako hi wona, va dawa na va nga zi tivi. Kuzilava ku hunza a khihlanya ga lava va fako hi venene misaveni yontlhe, va dawa hi moya wo kari wu vitwako monóxido de carbono. Hambulezo, a ku na xilaveko xo karateka nguvu. Ku na ni tindlela ta ku wu pola ni ku ti vikela a moya lowu. A vanhu vo tala va veka michini ya ku va tlharihisa loku va tshuka va nghenelwa hi moya lowo, zonake va tshama va ingisela a xitlharihiso.
A ku fana ni monóxido de carbono, Satani a nga woneki, niku za karata nguvu lezaku a vanhu va mu pola, lezo na a hi ni mhango ya hombe. Kanilezi Nungungulu wa hi vuna. Loku u lonzowota khwatsi a zinyikiwo zi lanzelako lezi Nungungulu a hi nyikako a wu nga xigelo xa ku chava Satani.
Ku ti hlawulela ha hoce. A bhuku ga Jakobe 4:7 gi hi byela lezi: “Alani Satani, zonake i ta suka ka nwina.” Hambu lezi Satani a nga ni ntamu, a nge ku kurumeti a ku maha zilo lezi u nga zi laviko. U na ni lungelo ga ku hlawula. A bhuku ga 1 Pedro 5:9 gi ngalo: “Mu kaneteni [Satani] hi kutiya kukholweni ka nwina.” Alakanya lezaku Satani i tsikile Jesu loku a tiyile a ala ziringo zakwe za zinharu. (Mateu 4:11) Hi kufanana wenawu u nga hlawula ku ala a ku kucetelwa hi Satani.
Wunghana na Nungungulu. A bhuku ga Jakobe 4:8 gi hi kuca a ku ‘tshinela ka Nungungulu.’ Jehova wutsumbu i ku ramba lezaku uva ni wunghana ga hombe naye. U nga zi mahisa kuyini? A ndlela ya yi nene ya ku sangula wunghana lego ku ti karatela ku mu tiva hi ku gonza a Biblia. (Johani 17:3) Lezi u to gonza xungetano hi Jehova zi ta ku kuca ku mu ranza, niku a liranzo lelo, li ta ku kuca ku maha a kuranza kakwe. (1 Johani 5:3) Laha u tshinelako ka Dadani wa wena wa le tilweni, zini lezi yena a to maha? Jakobe iya mahlweni aku: ‘Nungungulu i ta tshinela ka wena.’
Jehova i nyika zilo za moya kasi zi ku vikela
Xitsumbiso xa ku vikela. Mavingu 18:10 i ngalo: “A vito ga Jehova i khokhola go tiya; loyi a lulamileko wa chavela ka gona a pona.” Lezo a zi wuli lezaku a vito ga Nungungulu gova xitshungulu xo kari, kanilezi zi wula lezaku lava va kombisako xichawo hi vito ga Nungungulu va nga tsutsumela ka yena ni ka xihi xikhati lezaku va ya vikelwa.
Xikombiso xi vunako. A bhuku ga Mitiro 19:19 gi hi gonzisa zokari xungetano hi vokari va nga ha hi ku maha maKristu le Efesusi, lezi zi vunako ku ti vikela ka Satani: Gi ngalo: “Ni vanyingi lava va tirileko za wutumbe, va lo neha mabhuku yabye, va ta ma hisa mahlweni ka vontlhe; va lo hlaya a ntsengo wa wona, va kuma 50.000 wa macheleni.”a A maKristu lawo ma lo hisa zontlhe lezi zi nga yelana ni wungoma, na va nga khatali hi kudura ka zona. A xikombiso lexo xi nga hi vuna nguvu inyamutlha. A tiko legi hi hanyako ka gona gi tele hi wungoma ni zilo za wudimoni. Hambu a zilo kutani zimaho za wungoma, lezi zi wonekisako ku khwatsi a zi na mhango, zi nga hi vitanisela madimoni. Za lisima lezaku u ngavi ni zilo lezo wutomini ga wena, hambu loku zi karata. — Deuteronome 18:10-12.
Rogelio, loyi a kumbukilweko ka nzima yo sangula, i hanyile 50 wa malembe na a nga kholwi lezaku Satani i kona. Hambulezo, i lo gumesa a ehleketisisa khwatsi hi mawonela yakwe. Hikuyini? I ngalo: “Nzi lo kuma Biblia hi khati go sangula wutomini ga mina. A wutivi nzi gi kumileko lomu Mitsalweni gi nzi kholwisile lezaku Satani i kona. A wutivi galego hi gona gi nzi vikelako lezaku nzi nga weli ka kucetelo wakwe.”
“A wutivi nzi gi kumileko lomu Mitsalweni gi nzi kholwisile lezaku Satani i kona. A wutivi galego hi gona gi nzi vikelako lezaku nzi nga weli ka kucetelo wakwe.”
Wa zi lava ku hanya xikhatini lexi Satani a to ngha a nga ha hi kona? U nga hanya xikhatini lexo. A Biblia gi wula lezaku ku tava ni xikhati lexi Satani, loyi a khohlisako vanhu vo tala, a to ‘hoxiwa tiveni ga nzilo ni solufa.’ (Kuvululelwa 20:10) Hi lisine, a nzilo wa lisine ni solufa a zi nge hisi a xivangwa xa moya xi nga wonekiko, kutani ngelosi. Hikwalaho, a tiva ga nzilo gi yimela a kuloviswa ka pinzukelwa. Satani i ta lovela magumo. Lexo xi tava xikhati xa litsako la hombe ka lava va ranzako Nungungulu!
Lezo na zi nga se maheka, simama ku gonza xungetano hi Jehova ni tindlela takwe hi laha zi kotekako ha kona.b Hi nga alakanya ku hanya ka xikhati lexo hi to hefu hiku: “Satani a nga ha hi kona!”
a Loku ku hi lezaku a macheleni ya siliva lawa ku wulawuliwako hi wona laha, ku wa hi denario ga le Roma, a ntsengo wa wona wontlhe wu wa ta fana ni kupatsa muholo wa siku ginwe wa 50.000 wa vatiri — ku nga mali ya talela ga cima!
b Kasi ku kuma manwani mahungu ma wulawulako hi Satani ni mawonela ya Nungungulu xungetano hi wungoma, wona a xipimo 10 xa bhuku Zini Lezi A Biblia Gi Zi Gonzisako Hakunene? Kombela a revista legi ka ni yihi Mboni ya Jehova.