Hi fanele ku maha mikhongelo ya hina yiya ka Jesu?

A MUKAMBISISI wo kari i wutisile a xipimo xa 800 wa vaswa va lomu ka tichechi to hunza 12 wa tona lezaku va kholwa ku Jesu wa hlamula a mikhongelo ke. A 60 wa tipursento ni ku hunza va wulile lezaku va kholwa lezo hi kumbhelela. Kanilezi, a muswa munwe i lo vinya a vito ga Jesu a tsala ku “Nungungulu.”

Wena ke, u zi wonisa kuyini? Hi fanele ku yisa mikombelo ya hina ka Jesu kutani ka Nungungulu?a Kasi ku kuma a hlamulo wa kona, a kuranga a hi woneni lezi Jesu a nga gonzisa a vapizani vakwe lezaku va mahisa zona mikhongelo.

HIMANI LOYI JESU A NGA HI GONZISA KUVA HI YISA A MIKHONGELO YA HINA KA YENA?

Jesu i hi gonzisile a tlhela a hi komba loyi hi faneleko ku yisa mikhongelo ya hina ka yena.

LEZI A ZI GONZISILEKO: A xikhati lexi a munwe wa vapizani va Jesu a nga mu kombela a ku: “Hosi, hi gonzise ku khongela;” Jesu i lo mu hlamula lezi: “Laha mu khongelako wulani, muku: Dada.” (Luka 11:1, 2) Ahandle ka lezo, ka Kanelo yakwe ya le Xitsungeni, Jesu i kucile vaingiseli vakwe lezaku va khongela. I te ngalo: ‘Khongelani ka Raru wa nwina.’ I lo tlhela a va tiyisekisa aku: ‘A Raru wa nwina wa zi tiva lezi mu zi vumalako, na mu nga se mu kombela.’ (Mateu 6:6, 8) Ka wusiku gakwe go gumesa kota munhu wa nyama, Jesu i byelile vaingiseli vakwe ku ngalo: “Zontlhe lezi mu ta nga kombela ka Dadani hi vito ga mina i ta mu nyika zona.” (Johani 16:23) Hi ndlela leyo, Jesu i lo hi gonzisa ku yisa mikhongelo ya hina ka loyi a nga Dadani wakwe tlhelo Dadani wa hina kambe — Jehova Nungungulu. — Johani 20:17.

XIKOMBISO XAKWE: Jesu i khongelisile zalezi a nga gonzisa vapizani vakwe a kuva va khongelisa zona. I te ngalo: “Nza ku bonga, Dadani, Hosi ya tilo ni misava.” (Luka 10:21) Ka khati ginwani, “Jesu i lo tlakusa a mahlo yakwe, aku: Dadani, nza ku bonga hilezi u nzi zwile.” (Johani 11:41) Niku a xikhati lexi a nga kari afa, Jesu i lo khongela aku: “Dada, nza nyikela moya wa mina mandleni ya wena.” (Luka 23:46) Hi kuva a yisile a mikhongelo yakwe ka Dadani wakwe wa le tilweni — a “Hosi ya tilo ni misava” — Jesu i lo hi nyika xikombiso lexi hi faneleko ku xi lanzela. (Mateu 11:25; 26:41, 42; 1 Johani 2:6) Xana a vapizani vo sangula va Jesu, hi zalezo va nga zi zwisisisa zona a zileletelo zakwe?

XANA A MAKRISTU YO SANGULA MA WA YISA MIKHONGELO YABYE KA MANI?

Loku ku hunzile maviki matsongwani Jesu na a tlhelele tilweni, a vapizani vakwe va wa kari va chaviselwa ni ku xanisiwa hi valala vabye. (Mitiro 4:18) Hi xigelo lexo, va lo maha mikhongelo. Kanilezi, va wa khongela ka mani? “Va lo tlakusa magezu yabye ka Nungungulu hi mbilu yinwe,” va kombela lezaku a va vuna ku simama ‘hi vito ga Jesu, a nanza gakwe gi basileko.’ (Mitiro 4:24, 30) Hikwalaho, a vapizani va Jesu va lanzele a zileletelo zakwe xungetano hi mukhongelo. Va wa yisa mikhongelo yabye ka Nungungulu, na ku nga hi ka Jesu.

Loku ku hunzile malembe yo kari, mupostoli Paule i lo tlhamusela lezi yena ni vanghana vakwe va nga mahisa zona a mikhongelo. Laha a nga tsalela maKristu-kulobye, i te ngalo: “Hina ha mu bonga Nungungulu a Dadani wa Hosi ya hina Jesu Kristu na hi mu khongelela xontlhe xikhati.” (Va Le Kolosi 1:3) Paule kambe i lo tsalela a makholwa-kulobye xungetano hi lezaku ‘xontlhe xikhati i wa mu bonga Nungungulu a Dadani wa hina hi kota ya zilo zontlhe, a vitweni ga Hosi ya hina Jesu Kristu.’ (Va Le Efesusi 5:20) Ka magezu lawa, hi wona lezaku Paule i i lo kuca vanwani lezaku va khongela ka ‘Nungungulu tlhelo Dadani wakwe hi kota ya zilo zontlhe’ — kanilezi, hi vito ga Jesu. — Va Le Kolosi 3:17.

A ku fana ni maKristu yo sangula, hi nga kombisa a liranzo la hina ha Jesu hi ku ingisa a wusungukati gakwe mhakeni ya mukhongelo. (Johani 14:15) Laha hi mahako mikhongelo ya hina ka Dadani wa hina wa le tilweni — na hi yi yisa ka yena ntsena — a magezu ya Tisimu 116:1, 2 ma tava ni lisima nguvu ka hina. Me ngalo: ‘Nzi ranza Jehova, hakuva i zwile a gezu ga mina nzi ta khongela ka yena a masiku wontlhe ya kuhanya ka mina.’b