HLOKO YA MHAKA YA KAPA | Ndlela yo kuma litsako ntirweni wa wena
Xana a ku tira hi ku ti karata zi hunzelwe?
Alex i hefu a xikhati lexi a nghenisako a kaxa ginwani lomu ka mova wa koponi ya ku rwalela zibya, leyi a tirako ka yona. I ti wutisa lezi: ‘Hikuyini nza ha tshamako ka koponi leyi, kuveni ni ku kula a nzi kuli ke? Kasi nzi ta humelela rini ntirweni lowu?’ A wutomi ga mina gi wa tava gi nene nguvu loku nzi wa nga tiri!’
A kufana na Alex, a vanhu vo tala inyamutlha a va tsakiswi hi ntiro wo ti karata. Aaron, a nga mulungisi wa michini i ngalo: “A vanhu vo tala va alakanya lezaku a ku maha mitiro ya ‘nyalidede’ zi va susa lisima. A mawonela yabye hi lawa yaku: ‘Nzi ta simama ku tira na nzi lavetela a ntiro wa wu nene.’”
Hikuyini a vanhu vo tala va alakanyako ku a ku maha ntiro wo ti karata zi va susa lisima? Kuzilava va kucetelwa hi zihaxa-mahungu, lezi a zikhati zo tala zi kombisako lezaku a munhu i hanya wutomi go “tshamiseka” hi loku a hi ni zilo zo chanza na a nga tiri hi kutikarata. Matthew, a nga mulungisi wa tiyindlu, i ngalo: “A vanhu va wula lezaku laha u yako u tira nguvu kasi ku kuma za kutihanyisa, u humelela ku tsongwani. Shane loyi a ntiro wakwe ku nga ku hlayisa zilo zo kota mingoma ni zinwani, i na ni mawonela yo fana ni lawa. I ngalo: “A vanhu va lava ku nyikiwa a muholo wa siku gontlhe kuveni lezo a va ha zi lavi a ku tira siku gontlhe.”
Hi tlhelo ginwani, a vanhu vo tala vo humelela va wu ranza a ntiro wo ti karata. “Nzi alakanya lezaku a ntiro wu na ni wuyelo ga gi nene nguvu, nguvunguvu loku wu mahiwa kasi ku tatisa makungo ma vunako,” ku wula Daniel wa 25 wa malembe a nga muaki. Andre a nga ni 23 wa malembe, yenawu i zi wonisa lezo. I ngalo: “Nzi wona lezaku a litsako li yelana ni ku tira. A ku tira kutsongwani a zi nehi litsako la xikhati xo leha — zi neha kukarateka ntsena!”
Xini xi vunileko a vanhu vo fana na Daniel na Andre lezaku vava ni mawonela ma nene hi ntiro wo ti karata? Hi magezu matsongwani, va tirisile a matshinya ya milayo ya Biblia wutomini gabye. Wutshanwini ga ku kuca vanhu lezaku va nga tiri nguvu, a Biblia gi vuvumisa a ku tira hi kutikarata ni ku timisela ntirweni lowo. Kanilezi a Biblia gi maha zo hunza ku hi byela lezaku hi tira. Gi tlhela gi hi komba ndlela ya ku kuma litsako ntirweni wa hina.
Matshinya muni ya milayo ya Biblia lawa ma nga ku vunako ku kuma litsako ntirweni wa wena? Hi kombela lezaku u kambisisa a yo kari ya wona ka nzima yi lanzelako.