A wunghana ga wena na Jehova gi tiyile ke?

1. Hikuyini hi faneleko ku tiyisa wunghana ga hina na Jehova?

U MBONI ya Jehova yi ti hendleletileko yi tlhela yi bapatizwa ke? Loku zi hi nghaho, u na ni tshomba ya lisima — ku nga wunghana ga wena na Nungungulu. Kanilezi, a wunghana lego ga vukelwa hi mitshikelelo ya tiko ga Satani, gi tlhela gi vukelwa kambe hi miri wa hina wu nga mbhelelangiko. A maKristu wontlhe ma kumana ni mitshikelelo leyo. Hikwalaho a wunghana ga hina na Jehova gi fanele kuva go tiya nguvu hi laha zi kotekako hi kona.

2. a) Xini wunghana? (Wona tlhamuselo wa lahasi.) b) Hi nga tiyisisa kuyini a wunghana ga hina na Jehova?

² Wa ti wona na u hi ni wunghana ga lisine na Jehova ke? Wa tsakela ku gi tiyisa? A bhuku ga Jakobe 4:8 gi ku byela lezi u nga mahisako zona, giku: ‘Tshinela ka Nungungulu, na yena i ta tshinela ka wena.’ Wona lezaku lezo a zi mahiwi hi munwe wa hina ntsena.a A xikhati lexi hina hi bako mazambo kasi ku tshinela ka Nungungulu, yenawu o tshinela ka hina. Khati ni khati hi tshinelako, yenawu a tshinela, a wunghana ga hina na Jehova go tiya. Kota wuyelo ga kona, a wunghana lego gi maha ga lisine ka hina. Hi sangula kuva ni kutsumba ko fana ni loku Jesu a nga hi nako a xikhati a ngaku: “Loyi a nzi rumileko ngwa [lisine], . . . Mina nza mu tiva.” (Joh. 7:28, 29) Kanilezi, zini khwatsi-khwatsi u nga zi mahako kasi ku tshinela ka Jehova?

3. Xini xi mahako lezaku a kubhulisana na Jehova zi koteka?

³ A ku bhula na Jehova hi kukhanzakanya xipanze xa lisima xa ku tshinela ka yena. U nga bhulisa kuyini na Nungungulu? Ehleketa hi lezi u bhulisako zona ni munghana a hanyako kule. Kuzilava mu tsalelana mapapilo ni ku wulawula hi telefone hi kukhanzakanya. U wulawula na Jehova hi mikhongelo ya wena yo khanzakanya. (Gonza Tisimu 142:2.) U tsika Jehova kambe a wulawula na wena, hi mawulela manwani, a xikhati u lerako a Mhaka yakwe yi tsalilweko u tlhela u ehleketa hi yona. (Gonza Isaya 30:20, 21.) Makunu a hi woneni lezi a kubhulisana ka hina na Jehova ku tiyisisako zona a kubohana ka hina naye, ku maha lezaku wunghana ga hina naye giva ga lisine nguvu.

JEHOVA I WULAWULA NA WENA HI XIGONZO XA BIBLIA

4, 5. Jehova i wulawulisa kuyini na wena wutsumbu hi ku tirisa a Mhaka yakwe? Nyika xikombiso.

⁴ Handle ko kanakana wa kholwa lezaku a Biblia gi na ni mahungu ya Nungungulu ma yako ka vanhu vontlhe. Kanilezi, xana a Biblia ga wula lezi wena wutsumbu u nga tshinelisako zona ka Jehova ke? Ina, ga wula. Hi ndlela muni? A xikhati u lerako ni ku gonza a Biblia hi kukhanzakanya, ehleketa hi lezi u hlamulisako zona ka lezi gi wulako u tlhela u alakanyela lezi u nga zi tirisisako zona ka xiyimo xa wena; hi ku maha lezo, u tsika Jehova a wulawula na wena hi ku tirisa a Mhaka yakwe. Lezo zi maha lezaku uva ni wunghana ga hombe naye. — Maheb. 4:12; Jak. 1:23-25.

⁵ Hi xikombiso, gonza u tlhela u ehleketa hi magezu ya Jesu yaku: “Mu nga ti vekeli titshomba misaveni.” Loku u alakanya lezaku u sina u rangisa a zilaveko za Mufumo wutomini ga wena, wa mu wona Jehova na a ku dzunza. Hi tlhelo ginwani, loku u wona a xilaveko xa ku olovisa wutomi ga wena u tlhela u rangisa a Mufumo, Jehova i ku kombile nchumu u faneleko ku maha kasi u zi kota ku tshinela ka yena. — Mat. 6:19, 20.

6, 7. a) A xigonzo xa Biblia xi khumbisa kuyini a liranzo la hina ha Jehova ni liranzo lakwe hi hina? b) Hi fanele kuva ni kungo muni a xikhati hi gonzako a Mhaka ya Nungungulu?

⁶ A ku gonza Mitsalo a zi ku kombi ntsena lezi hi faneleko ku chukwatisa. Zi tlhela zi hi vuna ku engetela ku zwisisa a tindlela to saseka ta Jehova, zonake hi engetela ku mu ranza. Niku a xikhati lexi a liranzo la hina ha Nungungulu li kulako, a liranzo lakwe ha hina lonawu lo kula, zonake a kubohana ka hina naye ku tiya. — Gonza 1 Va Le Korinte 8:3.

⁷ Hambulezo, kasi ku tshinela ka Jehova, za lisima kuva hi gonza na hi xi tiva lexi hi gonzelako xona. Johani 17:3 i ngalo: “A wutomi ga pinzukelwa hi kuva va ku tiva, wena Nungungulu wece wa zinene, na Jesu Kristu loyi u mu rumileko.” Hikwalaho, a kungo ga hina a gi faneli kuva ga ku kuma wutivi ntsena, kanilezi gi fanele kuva ku mu tiva khwatsi Jehova kota Munhu. — Gonza Eksodusi 33:13; Tis. 25:4.

8. a) Kukarateka muni hi nga vako nako mayelano ni lezi Jehova a maheleko Hosi Azaria, kota lezi zi tlhamuselweko ka 2 Tihosi 15:1-5? b) A ku tiva Jehova zi susisa kuyini a kukanakana xungetano hi mitiro yakwe ke?

⁸ Laha hi yako hi mu tiva khwatsi Jehova, hi nga ta karateka ku hunza mpimo loku a ka matimu yo kari ya Biblia hi nga zi zwisisi ku hikuyini Jehova a mahileko zilo hi ndlela leyo. Hi xikombiso, u ti zwisa kuyini loku u wona lezi Jehova a mu khomisileko zona Hosi Azaria wa le Juda? (2 Tih. 15:1-5) Hambu lezi ‘a vanhu va nga simamisa va nyikela miphahlelo ni ku hisa tibani lomu matshanwini ma tlakukileko,’ Azaria i lo simama a “maha lezi zi sasekileko mahlweni ka Jehova.” Hambulezo, “Jehova i loba a hosi hi hlokonho leyi a nga babya ha yona kala kufeni kakwe.” Hikuyini? A matimu lawa a ma wuli nchumu hi zona. Xana lezo zi fanele ku hi djudja hloko kutani ku hi maha hi karateka hiku Jehova i tsayisile Azaria na a nga hi na nanzu ke? A hi nga ta maha lezo loku hi ti tiva khwatsi a tindlela ta Jehova. Lezo zi patsa ku tiva lezaku Jehova xontlhe xikhati i “laya hi nongameto.” (Jer. 30:11) A wutivi lego gi tlhela gi hi tiyisekisa lezaku hambu loku hi nga zi tivi ku hikuyini Jehova a mahileko lezo ka Azaria, hi nga tsumba lezaku i lamula hi kululama.

9. Mahungu muni ma hi kombako a zigelo zi mahileko Jehova aba Azaria hi hlokonho?

⁹ Hambulezo, mhakeni leyi hi kuma mitlhamuselo yo engeteleka ka bhuku ginwani ga Biblia. Hosi Azaria i wa tiviwa kambe kota Hosi Uzzia. (2 Tih. 15:7, 32) Ka matimu yo fana, ma nga ka 2 Kronekele 26:3-5, 16-21, hi kuma ku hambu lezi Uzzia a nga maha kusaseka mahlweni ka Jehova hi xikhati xo kari, hi kufamba ka xikhati “a mbilu yakwe yi lo ti kukumukisa kala a huma zineneni.” I lo zama ku maha mitiro ya wupristi leyi yi nga kala yi nga mu lumbi hambu lezi a nga hi hosi. A 81 wa vapristi va lo mu yela va ya zama ku mu kawuka. I hlamulisile kuyini? Uzzia i lo kombisa a wuhombe ga matshanza yakwe. I lo “zangarela vapristi” lavo. Handle ko kanakana, Jehova i wa hi ni xigelo xa ku muba hi hlokonho!

10. Hikuyini hi nga faneliko ku lava mitlhamuselo ya ni xihi lexi Jehova a mahako, niku hi nga tiyisisa kuyini a kutsumba ka hina lezaku a tindlela ta Jehova ti lulamile?

¹⁰ Xigonzo muni xa lisima hi xi kumako ka mhaka leyi? Loku a Mhaka ya Nungungulu yi wa nga hi na mitlhamuselo yinwani, a ku khwatsi hi lezi zi tshamisileko zona ka matimu yo sangula, u wa ta byekelela ku kanakanela a kululama ka Nungungulu ke? Kutani u wa ta ti byela lezaku a Biblia gi na ni matimu yo enela kasi ku hi tiyisekisa lezaku Jehova xontlhe xikhati i maha kululama, niku hi lisine hi yena a tshinya ga ku tiva lezi zi nga zi nene ni lezi zi bihileko? (Deut. 32:4) Laha hi yako hi mu tiva khwatsi Jehova kota Munhu, a liranzo la hina ni kuzwisisa ka hina a tindlela takwe zi ta kula nguvu laha ka kuza hi nga ha lavi ku tlhamuselwa ni xihi xilo lexi a mahako. Tiyiseka lezaku a kuzwisisa loko ku ta kula hi kuya hi mizamo leyi u yi mahako kasi ku gonza ni ku ehleketa hi lezi Nungungulu a wulawulisako zona na hina hi ku tirisa a Mhaka yakwe. (Tis. 77:12, 13) Lezo zi ta tiyisa a wunghana ga wena na Jehova, zi gi maha giva ga lisine.

U WULAWULA NA JEHOVA HI MUKHONGELO

11-13. U zi tivisa kuyini lezaku Jehova wa ingisela mikhongelo? (Wona mufota kusanguleni ka nzima.)

¹¹ A xikhati hi khongelako, ho tshinela ka Jehova. Ha mu dumisa, hi mu bonga, hi tlhela hi kombela a wurangeli gakwe. (Tis. 32:8) Kanilezi, kasi a kuzwanana ka wena na Jehova kuva ka lisine, u fanele ku tiyiseka lezaku wa ingisela a mikhongelo.

¹² A vokari va kholwa lezaku a mukhongelo wu mahela ku pepisa hloko ntsena. Va wula lezaku loku u alakanya ku a mukhongelo wa wena wu hlamulilwe, hi lezaku u vekile kupima ka xikarato lexo, u hlota tindlela to xi lulamisa. Ahandle ka mabhinzu lawo, u nga zi tivisa kuyini lezaku a mikhongelo ya wena yo huma mbilwini ya zwiwa hi Jehova ke?

¹³ Ehleketa hi lezi: Na a nga seva munhu wa nyama, Jesu wutsumbu i zi wonile lezi Jehova a nga hlamulisa zona a mikhongelo ya malanza Yakwe. Wutirelini gakwe ga laha misaveni, Jesu i lo tirisa mukhongelo kota ndlela yo bhula ni Dadani wakwe wa le tilweni, a mu byela lezi a ti zwisako zona. Xana na a mahile lezo — a kala a mbheta wusiku gontlhe na a khongela — loku i wa alakanya lezaku Jehova a nga muzwi ke? (Luka 6:12; 22:40-46) Na a gonzisile vapizani vakwe a ku khongela loku ku wo khwatsi i wa alakanya lezaku a mukhongelo wo tirela ku susa zikarato hlokweni ntsena ke? Zi te dlunya lezaku Jesu i wa zi tiva ku a mukhongelo i ndlela ya lisine ya ku wulawula na Jehova. Ka khati go kari, Jesu i te ngalo: “Dadani, nza ku bonga hilezi u nzi zwile. Nza zi tiva lezaku wa nzizwa xikhati xontlhe.” Hinawu hi nga tiyiseka lezaku Jehova ‘wazwa mikhongelo.’ — Joh. 11:41, 42; Tis. 65:2.

14, 15. a) Hi vunekisa kuyini hi ku wulawula hi zilo zo kongoma mikhongelweni ya hina? b) A mikhongelo ya makabye wo kari wa xisati yi mu vunisile kuyini ku tiyisa wunghana gakwe na Jehova?

¹⁴ Loku u wula zilo zo kongoma mikhongelweni ya wena, zi ta ku olovela nguvu ku zwisisa mihlamulo ya Jehova, hambu loku yi hi yo fihlala. A mikhongelo yi hlamulilweko yi ta maha lezaku Jehova ava wa lisine ka wena. Tlhatakumbiri, laha u bikelako Jehova a kukarateka ka wena ka hombe, i ta tshinela nguvu ka wena.

¹⁵ Wona xikombiso xa Katia.b I wa nga xalali hi ntiro wa simu, hambu lezi a nga famba hi kukhanzakanya. I ngalo: “Nzi wa nga wu ranzi ntiro wa simu. Nzi wa nga wu ranzi futsi. A xikhati nzi nga kuma peceni ntirweni wa mina wa ku ti hanyisa, a dota go kari gi lo kombisa kutsumba ka lezaku nzi ta teka wuphayona ga xikhati xontlhe; i lo tlhela a nzi nyika ni phepha ga kona ga xikombelo. Nzi lo boha ku phayona, kanilezi nzi lo tlhela nzi sangula ku khongela ka Jehova siku ni siku kasi a nzi maha nzi ranza ntiro wa simu.” Xana Jehova i hlamulile a mikhongelo yakwe? Katia i ngalo: “Legi i lembe ga wunharu na nzi tira kota phayona. Lezi nzi mbhetako xikhati xo tala wutirelini nzi tlhela nzi gonza ka vanwani vamakabye, a wutlhari ga mina ga ku nyika wukustumunyu gi loya gi engetela hi kutsongwani-kutsongwani. Inyamutlha, nzi wu ranza nguvu ntiro wa simu. A ku hunza lezo, a wunghana ga mina na Jehova gi tiyile nguvu ku hunza kale.” Kunene, a mikhongelo ya Katia yi mu vunile ku maha lezaku a wunghana gakwe na Jehova giva ga lisine.

MAHA XIPANZE XA WENA

16, 17. a) Zini hi faneleko ku maha kasi a wunghana ga hina na Jehova gi simama ku hanya gi tlhela gi kula ke? b) Xikarato muni xa hombe hi to wulawula hi xona ka nzima yi lanzelako?

¹⁶ A ku wumba wunghana go tiya na Jehova a wu zi mahi hi siku ginwe — zi lava wutomi gontlhe. Hi fanele ku ti karatela ku tshinela ka Nungungulu loku hi lava lezaku yenawu a tshinela ka hina. Hikwalaho ngha hi maha zontlhe hi zi kotako kasi ku simama hi bhulisana naye hi kukhanzakanya hi ku tirisa xigonzo xa Biblia ni mukhongelo. Hi ku maha lezo, a wunghana ga hina na Jehova legi gi yako gi tiya gi ta hi vuna ku hlula zikarato.

¹⁷ Kanilezi, ku nga ha vuka xikarato xa hombe loku a zikarato zo kari zi nga hunzi hambu loku hi khongela hi kutikisa. Ka zikhati lezo, a kutsumba loku hi nga nako hi Jehova ku nga sangula ku titimela. Hi nga ha sangula ku ti wutisa lezaku Jehova wa ingisela mikhongelo ya mina hakunene, kutani lezaku wa hi wona kota vanghana vakwe ke. Hi nga yimisanisa kuyini ni ziyimo lezo na hi tsumba lezaku a wunghana ga hina na Nungungulu ga lisine ke? A nzima yi lanzelako yi ta wulawula hi xikarato lexo.