Rinzela!

1, 2. I tshamela muni legi a malanza ya Jehova ma gi kombisako zikhatini zontlhe?

KALE ni kale a vakhozeli va Jehova va hanya na va rinzela a kutatiseka ka ziprofeto za Jehova. Hi xikombiso, Jeremia i profetile lezaku Juda i wa ta hahlulwa, niku hi zalezo zi nga humelela mandleni ya vaBabuloni hi 607 Mahlweni ka Nguva ya Hina. (Jer. 25:8-11) Isaya, loyi a pimiselweko kuva a profeta lezaku Jehova i wa ta wuyisa matshamela ma nene, i te ngalo: “Va katekile vontlhe va mu rinzelako.” (Isa. 30:18) Mika, loyi yenawu a profetileko xungetano hi vanhu va kale va Nungungulu, i lo ti mahela xiboho lexi: “Mina nzi ta cuwuka ka Jehova.” (Mika 7:7) Hi mazanazana ya malembe, a malanza ya Nungungulu ma hanyile kambe na ma rinzela a kutatiseka ka ziprofeto zi wulawulako hi Messia, kutani Kristu. — Luka 3:15; 1 Ped. 1:10-12.a

² A malanza ya Nungungulu masikwini ya hina wonawu ma hanya na ma rinzela, hakuva ku na ni ziprofeto zi wulawulako hi Messia za ha tatisekako. Hi ku tirisa Mufumo wa wuMessia, lokuloku Jehova i ta fuvisa a kuxaniseka ka vanhu hi ku lovisa a vakubiha ni ku tlhatlhisa vanhu vakwe ka tiko legi go ndlengandlenga gi nga ntanwini wa Satani. (1 Joh. 5:19) Hikwalaho, ngha hi simama ku rinzela na hi tiyiseka lezaku a kugumesa ka tiko legi ku kari ku tshinela hi xihatla.

3. Xiwutiso muni xi nga vukako loku hi hi ni malembe na hi rinzela a kugumesa?

³ Kota malanza ya Jehova, hi xuva ku wona kuranza ka Nungungulu na ‘ku mahiwa le tilweni, ni laha misaveni.’ (Mat. 6:10) Kanilezi, anzhako ka ku rinzela a kugumesa ka tiko legi hi malembe, lezi zi nga ha wonekisako ku khwatsi i pinzukelwa, a vokari va nga ha ti wutisa lezi: ‘Xana ha hi ni zigelo zo zwala za ku simama hi rinzela ke?’ A hi zi woneni.

HIKUYINI HI FANELEKO KU SIMAMA HI RINZELA?

4. Hi xihi a xigelo xo sangula xa kuva hi simama ku rinzela?

⁴ A Biblia a gi siyi kukanakana xungetano hi lezi hi fanele ku maha xikhatini lexi a kuloviswa ka tiko legi ku yako ku tshinela. Jesu i byelile valanzeli vakwe lezaku va ‘rinzela.’ (Mat. 24:42; Luka 21:34-36) Lexo xoce xigelo xa ku simama hi rinzela — hakuva Jesu i te ngha hi maha lezo! A hlengeletano ya Jehova ya hi nyika xikombiso mhakeni leyi. A mabhuku ya yona ma tshama hi ku hi kuca ku ‘langutela a kuta ka siku ga Nungungulu’ ni ku veka kutsumba ka hina xitsumbisweni xa Nungungulu xa misava yiswa. — Gonza 2 Pedro 3:11-13.

5. Hikuyini ku nga ni xilaveko xa hombe xa ku rinzela masikwini ya hina?

⁵ Hambu lezi a kurinzela ku nga laveka ka maKristu ma hanyileko ka 100 wa malembe nzhako, inyamutlha za lisima nguvu ku hunza xikhatini lexo. Hikuyini? Hakuva hi hanya xikhatini xa kuvakona ka Kristu. A xiwoniso xa kuvakona kakwe xi kari xi woneka ku sukela 1914. Niku a xiwoniso lexo, xi patsako kubiha ka ziyimo za tiko ni ntiro wa ku xumayela a Mufumo misaveni yontlhe, xi komba lezaku hi hanya xikhatini xa “kugumesa ka tiko.” (Mat. 24:3, 7-14) Kota lezi a nga kala ku wula lezaku a xikhati lexo xi wa ta leha kala kwihi na ku nga se chikela a kugumesa, hi fanele ku tlhariha nguvu, hi rinzela.

6. Hikuyini hi nga rinzelako lezaku a ziyimo za tiko zi engetela ku biha laha hi yako hi tshinela magumo ke?

⁶ Hi nga ha ti wutisa lezi: Xana a xikhati xa “kugumesa ka tiko” a hi xinwani xa ha tako laha a ziyimo zi to biha nguvu? Kunene, a Biblia gi komba lezaku a wubihi gi ta kula nguvu “masikwini yo gumesa.” (2 Tim. 3:1, 13; Mat. 24:21; Kuv. 12:12) Hikwalaho za koteka ku a ziyimo zi engetela ku biha ku hunza lezi zi tshamisileko zona zalezi.

7. Mateu 24:37-39 i komba yini xungetano hi ziyimo za masiku yo gumesa?

⁷ Kanilezi u rinzela ku a zilo zi biha ku chikela kwihi na ku nga se chikela a ‘kuxaniseka ka hombe’? (Kuv. 7:14) Hi xikombiso, u rinzela lezaku kuva ni yimpi matikweni wontlhe, munhu munwe ni munwani a vumala zakuga, ku tlhela ku babyiwa mingangweni yontlhe ke? Ka ziyimo lezo, hambu lava vo ranza ku kanakana va ngaza va kurumeteka ku vumela lezaku a ziprofeto za Biblia za tatiseka. Kanilezi, Jesu i te ngalo a kutala ka vanhu va wa nga ta chela kota hi kuvakona kakwe. Va ta simama ku ti mahela mitiro yabye ya siku ni siku, va dzuka na va nga ha hi na xo maha. (Gonza Mateu 24:37-39.) Hi ndlela leyo, a Mitsalo yi komba lezaku a zilo masikwini yo gumesa zi wa nga ta biha nguvu laha ka kuza vanhu va kurumeteka ku kholwa lezaku a kugumesa ku tshinele. — Luka 17:20; 2 Ped. 3:3, 4.

8. Zini zi wonekako ka lava va ingisako a xileletelo xa Jesu xa kuva va ‘rinzela’?

⁸ Hi tlhelo ginwani, kasi a xiwoniso lexi xi tatisa a kungo ga xona, ku wa ta laveka lezaku a kutatiseka ka xona ku dlunyateka khwatsi ka lava va ingisako a wusungukati ga Jesu ga ku ‘rinzela.’ (Mat. 24:27, 42) Niku hi zalezo zi humelelako kusukela 1914. A matshamela yo hambanahambana ya xiwoniso lexo ma kari ma tatiseka kusukela ka lembe lego. Zi te dlunya lezaku nyamutlha hi hanya xikhatini xa “kugumesa ka tiko” — xi nga xikhatanyana lexi xi fambako kala kulovisweni ka tiko legi.

9. Zigelo muni zi hi mahako hi rinzela a kugumesa ka tiko legi?

⁹ Makunu hikuyini a maKristu ma faneleko ku rinzela? Hi simama ku rinzela hi ku ingisa Jesu Kristu. Ha xi wona kambe a xiwoniso xa kuvakona kakwe. A kurinzela ka hina a hi ka makholwa-hava, ya ku kholwa ni xihi xi zwalako lomu tindleveni , kanilezi ku seketelwa ka zikombiso zo dlunyateka za Mitsalo lezi zi hi kucako ku rinzela, hi tlhariha, hi tlhela hi langutela a kugumesa ka tiko legi.

KALA RINI?

10, 11. a) Jesu i kucile valanzeli vakwe lezaku va tshama va longile ka yini? b) Zini lezi Jesu a nga byela vapizani vakwe lezaku va maha loku a kurinzela kabye ku tshuka ku hlwela nguvu ku hunza lezi va nga zi alakanya? (Wona mufota kusanguleni ka nzima.)

¹⁰ A votala xikari ka hina va na ni makume ya malembe na va tlharihile hi tlhelo ga moya. Kanilezi hi nga vumeli ku a malembe lawo ma mbheta ntamu a kurinzela ka hina. Hi fanele ku tshama hi longile ku wona a kuta ka Jesu kota Mulamuli kasi ku ta fuvisa a tiko legi. Alakanya lezaku Jesu i kucile valanzeli vakwe aku: “Tlharihani, mu rinzela ni ku khongela; hakuva a mu zi tivi lezaku xi tava xikhati muni. Ku khwatsi hi loku munhu a enzela matikweni, a siya yindlu yakwe na a nyikile ntamu ka malanza yakwe, ka ginwe ni ginwani a ntiro wa gona, a laya ni mulaveleli a ku rinzela. Hikwalaho rinzelani, hakuva a mu zi tivi lezaku i tata rini a nwinyi wa yindlu; kutani hi laha gambyeni, kutani xikari ka wusiku, kutani kubeni ka nkuku, kutani ni mixo; a nga chikela hi xitshuketi, a mu kuma na mu etlele. Lezi nzi wulako ka nwina, nzi wula ka vontlhe, nziku: Rinzelani!” — Mar. 13:33-37.

¹¹ Anzhako ka ku wona lezaku a kuvakona ka Jesu ku sangulile hi 1914, a valanzeli va Jesu va lo tekela ku ti longisela hi ku tiva lezaku a kugumesa ku nga chikela ni ka xihi xikhati. Va lo maha lezo hi ku engetela ku hiseka ntirweni wa ku xumayela a mufumo. Jesu i lo komba lezaku a nga tshuka a hlwela ku chikela — “kubeni ka nkuku, kutani ni mixo.” Loku lezo zi maheka, a valanzeli vakwe va wa fanele ku maha yini? I te ngalo: “Rinzelani!” Hikwalaho a ku rinzela malembe yo tala xi wa nga tava xigelo xa kuva hi ti byela lezaku a kugumesa ka ha hi kule kutani ku ku susa tihlokweni ta hina.

12. Zini lezi Habakuka a nga wutisa Jehova, niku i hlamulisile kuyini?

¹² Ehleketa hi muprofeti Habakuka, loyi a rumilweko ku profeta a kuloviswa ka Jerusalema. A xikhati lexi a nga sangula hi xona ku tira, ku wa sina ku zwala zitlharihiso hi malembe xungetano hi kuloviswa ka doropa lego. A xiyimo xi wa bihile nguvu laha ka kuza ‘a vakubiha va ranzela valulamileko, ni kululama ku byeketwa.’ Hikwalaho, a zi hlamalisi kuva Habakuka a wutisile aku: “Jehova, nzi ta rila kala rini [na nzi kombela xivuno]?” Wutshanwini ga ku hlamula xiwutiso lexo hi kukongoma, Jehova i lo tiyisa muprofeti wakwe wo tsumbeka lezaku a kuloviswa loko ku profetilweko ku wa “nga ta tindeka.” — Gonza Habakuka 1:1-4; 2:3.

13. Maalakanyo muni zi nga koteka kuva Habakuka ava nawo, niku hikuyini gi nga wa tava wupumbu?

¹³ Hi nga alakanyela loku Habakuka i wa no mbhela ntamu, a ti byela lezi: ‘Ka hunza malembe na nzizwa mahungu ya kuloviswa ka Jerusalema. Loku ga ha hi kule ni kuloviswa ke? Zo khwatsi a zi na hloko ku simama nzi profeta a ku khwatsi gi to tekela ku loviswa zalezi. Va ta profeta vanwani.’ Loku Habakuka i wa no gayela maalakanyo lawo, na a luzile a thomo legi a nga hi nago mahlweni ka Jehova — niku kuzilava na a luzile a wutomi gakwe a xikhati lexi Jerusalema a nga loviswa hi vaBabuloni!

14. Hikuyini gi nga tiyisekako lezaku loku hi rinzela, hi nga ta ti laya ke?

¹⁴ Misaveni yiswa, hi tava ni xigelo xa ku ehleketa hi kuva zontlhe lezi zi nga profetilwe xungetano hi kugumesa ka tiko zi tatisekile. A ku ehleketa hi lezi a zilo zi nga mahekisa zona zi ta engetela ku tiyisa a kutsumba ka hina ka Jehova ni ka zitsumbiso lezi za ha tako. (Gonza Joxua 23:14.) Handle ko kanakana hi ta bonga hi kuva Nungungulu, loyi a ‘yimisileko a zikhati ni tinguva hi ntamu wakwe,’ a hi kucile ku hanya na hi tiva lezaku “a kugumelwa ka zontlhe ku tshinele.” — Miti. 1:7; 1 Ped. 4:7.

A KU RINZELA A HI KU KONDLA MAWOKO!

15, 16. Hikuyini a ku xumayela hi kuhiseka yi nga yona ndlela ya hombe ya ku komba lezaku ha xi tiva a xikhati lexi hi hanyako ka xona?

¹⁵ A hlengeletano ya Jehova yi ta simama ku hi alakanyisa lezaku hi fanele ku tirela Jehova hi xihatla. A zikhumbuxeto lezo a zi mahelwi ku hi kuca ku tshama hi khomekile ntsena ntirweni wa Nungungulu, kanilezi zi mahelwa ku hi vuna ku simama hi zi wona a xiwoniso xa kuvakona ka Jesu xi kari xi tatiseka. Hi yihi a ndlela ya hombe ya ku komba lezaku ha ma tiva a masiku hi hanyako ka wona? Ku rangisa a Mufumo wa Nungungulu ni kululama kakwe hi ku xumayela a mahungu yo saseka hi kuhiseka! — Mat. 6:33; Mar. 13:10.

¹⁶ A makabye wo kari wa xisati i lo wula lezi: “Hi ku xumayela a mahungu yo saseka ya Mufumo wa Nungungulu, hi . . . nga ponisa wutomi ga vanhu ka khombo lego gi tako.” Wa yi tiva a mhaka leyi ya ku ponisa, hakuva yena ni nuna wakwe va ponile ka ginwe ga makhombo ya hombe ya lomu matini — ku nga ku mbombomela ka xitimela xa mati xo chanza Wilhelm Gustloff hi 1945. Hambu ka khombo lego ga hombe, i kona a nga hi ni mawonela ya hava xungetano hi lezi hakunene xi nga xa lisima. A makabye loyi i alakanya wasati wo kari a vanga guwa aku: “A mimala ya mina! A mimala ya mina! A tiphera ta mina! A tiphera ta mina tontlhe ti le hasi lomu ka xikwarutwana lexiya. Nzi luzile zontlhe!” A kuhambana ni wasati loye, a vanhu vo tala va nga xuva ku vuna vanwani va lo veka wutomi gabye mhangweni kasi ku ponisa vanhu va nga wele ka mati lawo ya bimbi yo titimela nguvu laha ko tlhela ma maha maribye. A ku fana ni vaenzi lavo va liranzo, hi maha zontlhe hi zi kotako kasi ku vuna vanhu. Hi tshama na hi alakanya a xihatla xa ntiro wa kuxumayela hi tlhela hi vuna vanwani na ka hi ni xikhati lezaku va pona a khombo ga misava yontlhe legi gi tako.

17. Zigelo muni hi nga nazo za ku kholwa lezaku a kugumesa ku ta chikela ni ka xihi xikhati?

¹⁷ A zimaho lezi zi humelelako tikweni zi komba ziku dlunya lezaku a ziprofeto za Biblia zi kari zi tatiseka niku a kugumesa ka tiko legi go biha ku laha kusuhani. Hikwalaho, a hi faneli ku alakanya lezaku ka ha laveka xikhati xo leha kasi a tiko gi chikela ka xiyimo lexi a “khume ga timhonzo” ni “xihari” za Kuvululelwa 17:16 zi to vukela Babuloni loyi wa Hombe, wu nga mufumo wa misava yontlhe wa wukhongeli ga mawunwa. Hi nga rivali lezaku hi Nungungulu a to zi veka “timbilwini tabye” a kuva va maha lezo — niku lezi zi nga humelela hi xihatla ni ka xihi xikhati! (Kuv. 17:17) A kugumesa ka tiko ga kona gontlhe a ku le kule. Hi xigelo xo zwala, hi fanele ku ingisa a xitlharihiso xa Jesu xaku; ‘Ti woneleni, kasi a timbilu ta nwina ti nga binziwi hi limito ni kupopiwa, ni kukaratekela za loku kuhanya, a siku lego gi nga dzuka gi mu chikelela hi xitshuketi kota wugungu.” (Luka 21:34, 35; Kuv. 16:15) Ngha hi ti yimisela ku tirela Jehova hi xihatla, na hi tsumba lezaku wa va vuna “lava va mu langutelako.” — Isa. 64:4.

18. Xiwutiso muni xi to hlamuliwa ka nzima yi lanzelako?

¹⁸ A xikhati lexi hi rinzelako a kugumesa ka tiko legi go biha, ngha hi ingisa magezu ma pimisilweko ya mupizani Juda yaku: “Varanzekako, ti akeni kukholweni ka nwina loku ku basileko, mu khongela hi Moya wa ku Basa; mu ti hlayisa liranzweni la Nungungulu, na mu cuwukela a wuxinji ga Hosi ya hina Jesu Kristu legi gi yisako kuhanyeni ka pinzukelwa.” (Juda 20, 21) Kanilezi hi nga kombisa kuyini lezaku hi hanya na hi rinzela a misava yiswa ya Nungungulu hi mahlo yo pswhuka? A mhaka leyi hi ta wulawula hi yona ka nzima yi lanzelako.