HLOKO YA MHAKA YA KAPA
Nungungulu i ti wonisa kuyini tiyimpi?
U nga xi hlamulisa kuyini xiwutiso lexi? A votala va alakanya lezaku a tiyimpi ta amukeleka ka Nungungulu. Va wula lezaku i rumile malanza yokari yakwe lezaku malwa tiyimpi xikhatini xi hunzileko; niku a matimu ya Biblia ma komba lezo. Hambulezo, a vanwani va wula lezaku Jesu, a N’wana wa Nungungulu, i gonzisile valanzeli vakwe lezaku va ranza valala vabye. (Mateu 5:43, 44) Hikwalaho, va alakanya lezaku hi ndlela yo kari a mawonela ya Nungungulu hi tiyimpi ma cicile, niku inyamutlha a ta ha amukeleki kakwe.
U zi wonisa kuyini? Xana a tiyimpi ta amukeleka ka Nungungulu? Loku zi hi tano, i yima kwihi Nungungulu ka tiyimpi ta nyamutlha? A mihlamulo ya ziwutiso lezi yi nga khumba mawonela ya wena hi tiyimpi. Hi xikombiso, loku u wo tiva lezaku Nungungulu a nga vumeleli a tiyimpi ntsena, kanilezi i tlhela a seketela a ntlawa lowu wenawu u wu seketelako ka yimpi yo kari, kuzilava u wa ta tizwa khwatsi ka ntlawa lowo, hi kutiyiseka lezaku a ntlawa wa nwina wu ta hlula. Hi tlhelo ginwani, u wa ta ti zwisa kuyini loku u wo tiva lezaku Nungungulu i seketela a ntlawa lowu wunwani? Kuzilava u wa ta ehleketa khwatsi hi lomu u faneleko ku yima kona.
Ku na ni mhaka ya hombe yi patsekako. A ku tiva lezi Nungungulu a ti wonisako zona tiyimpi zi nga khumba a mawonela ya wena hi Nungungulu. Loku ku hi lezaku u munwe wa lava va vangelweko zikarato hi tiyimpi, a zi kanakanisi lezaku wa wu lava hlamulo wa xiwutiso lexi: Hi laha a vanwani va wulako ha kona, xana Nungungulu muranzi wa yimpi loyi a kucetelako lezaku kuva ni kuxaniseka ku yelanako ni tiyimpi, kutani loyi a nga khataliko hi kuxaniswa ka lava va nga hiko na nanzu?
U nga ha hlamala nguvu hi ku tiva lezaku a hlamulo wa Biblia wu hambana nguvu ni mawonela lawo. A xinwani kambe, kusukela kale kala nyamutlha, a mawonela ya Nungungulu hi tiyimpi a ma se cica. A hi wone lezi a Biblia gi wulako xungetano hi lezi Nungungulu a nga ti wonisa zona tiyimpi xikhatini xa kale ni ka zana ga malembe go sangula, a xikhati lexi Jesu a nga hi laha misaveni. Lezo zi ta hi vuna ku wona lezi Nungungulu a ti wonisako zona tiyimpi nyamutlha niku xana ti tava xipanze xa wumanziko ga vanhu ke.