Kutiyisana
1. Malungelo muni yo hlawuleka ma nyikiwako hi kuenza ka vawoneleli va fambafambako?
1 Mupostoli Paule i tsalele a bandla ga le Roma aku: “Hakuva nza navela ku mu wona, kasi nza fela ku mu nyika a xinyikiwo xo kari xa ka moya, lezaku mu fela ku tiyiswa. Hi lezaku, loku nzi hi xikari ka nwina nzi fela ku tsakiswa zinwe na nwina hi kukholwa loku ku nga kona ka hina hontlhe, a ka nwina ni ka mina.” (Rom. 1:11, 12) Masikwini ya hina a kuenza ka vawoneleli va fambafambako ku nyika a malungelo yo fana ni lawo ya kutiyisana.
2. Hikuyini a kuenza ka muwoneleli wa xipanze ku tivisiwako na ka ha hi mahlweni?
2 A Bandla: A kuenza ka muwoneleli wa xipanze ku ranga ku tivisiwa na ka ha sele xipimo xa tihweti tinharu. Lezo zi hi nyika a xikhati xa ku ti lulamisela na ka ha hi mahlweni kasi hi vuneka khwatsi. (Efe. 5:15, 16) Loku ku hi lezaku wa tira, kuzilava u nga ha kombela a xikhati kasi u seketela a ntiro wa simu nzeni ka viki. A vo kari va ti longisela lezaku va nghenela ntiro wa wuphayona ga kuvunetela nzeni ka hweti ya lienzo. Loku ku hi lezaku u longile a kuenza, xana u nga zi kota ku cica a longoloko wa wena lezaku u va kona ka viki lego?
3. Zini lezi hina wutsumbu hi faneleko ku zi maha nzeni ka lienzo lezaku hi tiyisiwa?
3 A khungo go sangula ga lienzo la muwoneleli wa xipanze ku tiyisa ni ku gonzisa munwe ni munwani lomu ntirweni wa simu. Xana u nga kombela a ku tira naye kutani ni sati wakwe loku ku hi lezaku i chadile? A muwoneleli wa xipanze wa tsakiswa hi ku tira ni vahuweleli vo hambanahambana, a kupatsa ni lava va nga ni wutivi gi tsongwani kutani lava va lavako kuva ni wuzikoti go engeteleka wutirelini. Vontlhe va nga vuneka hi zingheniso zakwe va tlhela va tirisa ni wahi mawonela lawa a nga ma nyikako hi ndlela yi nene. (1 Kor. 4:16, 17) A ku mu ramba lezaku mu taga zinwe zi ta vula a malungelo yo engeteleka ya kutiyisana. (Maheb. 13:2) Kota lezi a tikanelo takwe ti zwananiswako ni zilaveko za bandla, ingisela khwatsi.
4. Xana hi nga mu tiyisisa kuyini a muwoneleli wa hina wa xipanze?
4 A Muwoneleli Wa Xipanze: Mupostoli Paule i wa nga hambani ni vamakabye lava a nga va tirela hakuva yenawu i yimisene ni zikarato niku i wa lava kutiyiswa. (2 Kor. 11:26-28) A xikhati lexi a bandla ga le Roma gi nga tiva lezaku Paule, loyi a nga hi khumbi, hi kugumesa i wa ya le ka vona, a vo kari va loya le mutini wa Apiu kasi ku ya tlhangana naye — pfhuka wa 74 wa tikilometro! “Laha Paule a nga va wona i lo bonga Nungungulu, a tiya-hlana.” (Miti. 28:15) Na wenawu u nga zi kota ku tiyisa a muwoneleli wa wena wa xipanze. Mu ‘dzunze hi kuengetelweko’ hi ku seketela hi kuhiseka a lienzo lakwe. (1 Tim. 5:17) Mu tivise u tlhela u kombisa a kubonga ka wena ku humako mbilwini hi kota ya kutikarata kakwe ha wena. Yena ni sati wakwe va ta nengela nguvu hi ku wona a kukholwa ka wena, liranzo, ni kutimisela ka wena. — 2 Tes. 1:3, 4.
5. Hikuyini hontlheni hi lava kutiyiswa inyamutlha?
5 ‘Zikhatini lezi za zikarato,’ himani xikari ka hina loyi a nga laviko ku tiyiswa? (2 Tim. 3:1) Ti yimisele zalezi a ku hlengela nguvu ka viki go hlawuleka ga ntiro zinwe ni muwoneleli wa xipanze. Hontlheni — vawoneleli va fambafambako ni vahuweleli — ha zi kota ku hlengela ka kutiyisana ko tsakisa. Hi ndlela leyi hinawu hi ta ‘tiyisetana, hi akana.’ — 1 Tes. 5:11.