MAHANYELA YA WUKRISTU
Pawule a “bonga Nungungulu, a tiya hlana”
Laha a bandla ga le Roma gi ngazwa lezvaku Pawule wata, a vamakabye vo kari va no famba 64 kilometro va mu khinga. A lirandzo lelo li mu khumbisile kuyini Pawule? “Laha Pawule a nga va wona, i no bonga Nungungulu, a tiya hlana.” (Mit 28:15) Hambu lezvi Pawule a nga tiviwa na a tiyisa mabandla lawa a nga ma endzela, ka khati legi laha a nga hi paxweni hi yena a nga tiyisiwa. — 2Ko 13:10.
Inyamutlha a vawoneleli va cipandze va famba hi bandla ni bandla va tiyisa vamakabye. A ku fana ni vontlhe vanhu va Jehovha, a vawoneleli va cipandze vonawu va karala, va karateka va tlhela va mbhela ntamu. Ka khati gi tako a muwoneleli wa cipandze ni sati wakwe va to endzela bandla ga n’wina, zvini u nga mahako kasi u va tiyisa, ina, kasi mu “tiyisana hi kukholwa”? — Rom 1:11, 12.
Seketela mitlhangano ya ntiro wa simu. A muwoneleli wa cipandze wa tiyisiwa loku a vahuweleli va ti karata kasi va vhuneka khwatsi hi vhiki go hlawuleka. (1Te 1:2, 3; 2:20) U nga teka wuphayona go vhunetela ka hweti leyi a muwoneleli wa cipandze a endzelako bandla ga wena. U nga ti nyikela kasi ku chumayela kutani ku famba zvin’we muya fambisa cigondzo ca wena ca Bhibhiliya ni muwoneleli wa cipandze kutani ni sati wakwe? Va tsaka nguvhu hi ku tira ni vahuweleli vo hambanahambana, a ku patsa ni vahuweleli vaswa kutani lava va alakanyako ku ava zvi koti ku chumayela khwatsi.
Va amukele. U nga va nyika zvakuga kutani ka ku va etlela kona? Lezvo zvi komba muwoneleli wa cipandze ni sati lezvaku wa va randza. A va rindzeli zvilo zva hombe. — Luk 10:38-42.
Ingisela u tlhela u tirisa wurangeli gakwe ni wusungukati gakwe. Hi ndlela ya lirandzo, a muwoneleli wa cipandze wa hi vhuna ku wona lezvi hi nga chukwatisako zvona a ntiro wa hina ka Jehovha. Ka zvikhati zvin’wani, a nga hi nyika wusungukati ga ntamu. (1Ko 5:1-5) Wa tsaka loku hi ingisa hi tlhela hi ti koramisa. — Mah 13:17.
Kombisa kubonga. Byela muwoneleli wa cipandze ni sati wakwe lezvi u nga vhunekisa zvona hi kutikarata kabye. U nga va byela hi kukongoma kutani kutsala cipapilwana. — Kol 3:15.