Zi Mahe Kungo Ga Wena A Ku Fambisa Xigonzo Xa Biblia
1 “Tlakusani a mahlo ya nwina, mu cuwuka masimu, lezaku ma te xwe a kuva ma tshovelwa.” (Joh. 4:35) A magezu lawo ma wulilweko hi Jesu Kristu hakunene ma yelana ni lezi a vatireli va nga maKristu va yimisanako nazo inyamutlha.
2 A vanhu va timbilu ti nene lava va xuvako nguvu a ku gonzisiwa tindlela ta Jehova va ha kumiwa. Lezo zi woneka hi ka hlayo ya vapizani vaswa lava va bapatizwako lembe ni lembe. Loku hakunene u xuva ku fambisa a xigonzo xa Biblia, zini lezi u nga ha mahako?
3 Ti Vekele Kungo: Xo ranga, ti vekele kungo ga ku sangula ni ku fambisa a xigonzo xa Biblia xo khanzakanya. Tshama na u alakanya a kungo ga wena a xikhati lexi u yako wutirelini ga simu. Kota lezi a ntiro wa hina wa wuKristu wu patsako ku gonzisa, zinwe ni ku xumayela, hontlheni hi fanele ku ti karatela ku hlengela nguvu ntirweni wa ku fambisa zigonzo za Biblia. — Mat. 24:14; 28:19, 20.
4 Tinwani Timhaka U Faneleko Ku Ti Alakanya: A mukhongelo wu humako mbilwini xilaveko ka vahuweleli va Mufumo. A zikhati zo kari hi kuma vanhu lava va sinako va khongelele a ku zwisisa a Biblia. Hakunene xikatekiso xa hombe a ku tirisiwa hi Jehova kulaveni ni kugonziseni ka vanhu lavo! — Hag. 2:7; Miti. 10:1, 2.
5 A makabye wo kari wa xisati i khongelele kuva ni xigonzo xa Biblia a guma a veka kubaseni a zitlukana Gostaria de aprender mais a respeito da Bíblia? laha a tirako kona. A xikhati lexi a wasati wo kari a nga teka xinwe xa zitlukana lezo, a xi lera xontlhe, a tlhela a sangula ku tsala makhero yakwe ka xona, a makabye loye i lo wulawula naye zonake a zi kota ku sangula xigonzo xa Biblia.
6 A vahuweleli-kuloni lava va humelelako kusanguleni ni kufambiseni ka zigonzo za Biblia va zi kota ku ku vuna lezaku u chikelela a kungo ga wena ga ku fambisa a xigonzo xa Biblia. Khongela ka Nungungulu xungetano hi mizamo ya wena ya ku hlota a xigonzo xa Biblia u tlhela u lonzowota a zivuno zontlhe lezi zi nga kona kasi u chikelela a kungo lego. Kuzilava lokuloku u tava ni litsako la ku fambisa a xigonzo xa Biblia.