Gonzisa Vanwani Lezaku Va Ranza Jehova
1. Xini xi tshinetako a vo kari ka Jehova?
1 Xana wa alakanya a khati go sangula u ngazwa hi Jehova? Xini xi nga ku kokela ka yena? A vanhu vo tala va timbilu ti nene va ta ku byela lezaku lexi xi va tshinetileko kusuhani ni Muvangi wa hina ku gonza a matshamela yakwe ma nga hiko na kuecanyiswa, nguvunguvu a tipswalo takwe ni liranzo. — 1 Joh. 4:8.
2, 3. Xana hi nga gi tirisisa kuyini a bhuku A Biblia Gi Gonzisako kasi hi vuna a zigonzani za Biblia lezaku zi kula hi liranzo ha Jehova?
2 “Loyi Hi Yena Nungungulu Wa Hina”: A bhuku A Biblia Gi Gonzisako gi khanyisa a liranzo la Jehova ni xilaveko xa kuva a munhu ni munhu ava ni kuzwanana naye. Xana hi nga gi tirisisa kuyini a bhuku legi kasi ku gonzisa vanwani lezaku va kula liranzweni labye ha Nungungulu? A xikhati lexi hi yisako kupima ka mhaka yiswa, hi nga ha maha a ziwutiso zi tlhotlhako maalakanyo, zo kota lezi: “Xana a mhaka leyi yi kombisa yini ha Jehova?” kutani “Xana a mhaka leyi yi zi kombisisa kuyini lezaku Jehova hi yena Dadani wa mu nene nguvu loyi a vanhu vontlhe va nga wa ta mu lava?” A ku gonzisa hi ndlela leyi zi nga vuna a xigonzani lezaku xi sangula a kuzwanana ka pinzukelwa na Jehova.
3 Loku hi vuna a zigonzani za Biblia a ku wona lezi a lungelo ga ku kuma wutivi ga Nungungulu munwe wa zinene loyi a hanyako gi nga ga hombe ha zona, zona zi ta tiva lezaku “loyi hi yena Nungungulu wa hina,” kota kuwula ka Isaya. (Isa. 25:9) A xikhati lexi hi tlhamuselako a Mhaka ya Nungungulu, hi fanele ku khanyisa lezi a vanhu va to katekisiswa zona hi kutatiseka ka makungo ya Jehova hi ku tirisa a mufumo wakwe wu nga mandleni ya Kristu Jesu. — Isa. 9:6, 7.
4, 5. Zi wula yini a ku ranza Jehova?
4 Xikombiso Xa Liranzo Ha Jehova: Ha zi tiva lezaku a ku ranza Jehova hi mbilu ya hina yontlhe, muhefemulo wa hina wontlhe, ni kupima ka hina kontlhe zi patsa zo tala a ku hunza kuva ni kutizwa ntsena xungetano hi Nungungulu. Hi fanele ku ti zwananisa ni maalakanyo yakwe hi tlhela hi khomelela ka wona. (Tis. 97:10) A ku ranza Nungungulu ku kombiswa hi ku ingisa a milayo yakwe yontlhe ni ku simama “mahanyeleni wontlhe yo basa ni wukhongeli,” hambu loku hi yimisana ni minzhingo ni kukanetwa. — 2 Ped. 3:11; 2 Joh. 6.
5 A ku maha kuranza ka Nungungulu hi ku mu ranza za tsakisa. (Tis. 40:8) A xigonzani xa Biblia xi fanele ku zwisisa lezaku a milayo yontlhe ya Nungungulu yi mahelwe ku vuna a malanza Yakwe kala kupinzuka. (Deut. 10:12, 13) Hi ku hanya hi kuzwanana ni wurangeli ga Jehova, a munhu i kombisa a kubonga nguvu a mitiro Yakwe yontlhe yo hlamalisa. Vuna a xigonzani xa Biblia a ku zwisisa lezaku a ku famba tindleleni to lulama ta Jehova zi ta xi vikela ka kukarateka ni kubayisa ka mbilu.
6. Hi wahi makatekwa lawa a munhu a zi kotako ku ma kuma hi ku ranza Jehova?
6 Makatekwa Ka Lava Va Ranzako Nungungulu: Jehova wa khatalela nguvu a va kutikoramisa lava va mu ranzako, niku i va tivisa a “zilo zi etileko za Nungungulu.” (1 Kor. 2:9, 10) Na va hi ni wutivi lego ga makungo ya Jehova, va zi kota kuva ni mawonela yo dlunyateka ya wumanziko ni kutsumba ko tiya. (Jer. 29:11) Lava va ranzako Jehova va maha zipotiyelo za wunene gakwe ga hombe. (Ekso. 20:6) Va nyika nguvu lisima a kutsumba ka wutomi ga pinzukelwa hi kota ya liranzo la hombe la Nungungulu ka vona. — Joh. 3:16.
7. U ti zwisa kuyini hi ku gonzisa vanwani lezaku va ranza Jehova?
7 Loku hi tiva zo tala xungetano hi Dadani wa hina wa le tilweni, hi tava ni zo tala za ku gonzisa vanwani. (Mat. 13:52) Hakunene i lungelo ga hombe a ku gonzisa vanwani, nguvunguvu a vana va hina, a ku ranza Jehova! (Deut. 6:5-7) Ngha hina, zinwe ni zigonzani za hina za Biblia, hi simama ku hangalasa a wudumo a xikhati lexi hi wonako a ‘wunene ga hombe ga Jehova.’ — Tis. 145:7.