Longoloko Wuswa Wa Mitlhangano Ya Bandla
1, 2. Kucica muni ka mitlhangano loku ku ta nga maheka kusukela Janeiro wa 2009?
1 Ka viki ga 21-27 ka Abril wa 2008, a vamakabye misaveni yontlhe va zwile a xitiviso xo tsakisa nguvu. “Kusukela 1 ka Janeiro wa 2009, a Xigonzo xa Bhuku xa Bandla xi ta mahiwa xikhati xinwe ni Xikola xa Wutireli ga Nungungulu zinwe ni Mutlhangano wa Ntiro. A vito ga Xigonzo xa Bhuku xa Bandla gi ta ciciwa giva Xigonzo xa Biblia xa Bandla.”
2 Longoloko Wa Mitlhangano Ya Viki Ni Viki: A xikhati xontlhe xa mitlhangano leyi, a ku patsa tisimu ni mikhongelo, xi tava hora ni 45 wa timeneti. A mutlhangano wu ta sangula hi lisimu ni mukhongelo (5 men.), ku lanzela a Xigonzo xa Biblia xa Bandla (25 men.). A Xikola xa Wutireli ga Nungungulu (30 men.) xi ta tekela ku lanzela. Anzhako ka xona ku lanzela lisimu (5 men.) la ku sangula a Mutlhangano wa Ntiro (35 men.). A mutlhangano wu gumesa hi lisimu ni mukhongelo (5 men.). Kasi ku mu vuna a ku longisela a mitlhangano leyi, ku ta humesiwa a longoloko wa Xigonzo xa Biblia xa Bandla, Xikola xa Wutireli ga Nungungulu, ni Mutlhangano wa Ntiro ka Wutireli Ga Hina Ga Mufumo hweti ni hweti.
3. Xana a Xigonzo xa Biblia xa Bandla xi ta fambisiswa kuyini?
3 Xigonzo Xa Biblia Xa Bandla: A mutlhangano lowu wu ta fambisiwa a ku fana ni Xigonzo xa A Sentinela. Ku nga tava ni xilaveko xa ku sangula hi ku vuxeta a timhaka ta viki gi hunzileko. A wutshanwini ga lezo, wu fanele kuva ni xingheniso xo koma ntsena. Lezo zi ta siya xikhati xo enela kasi vontlhe lava va nga kona va nyika mihlamulo yo koma. A muwoneleli loyi a rangelako bandla i ta wonelela a kuxaxametwa ka madota lawa ma to cicacicana kufambiseni ka mutlhangano lowu viki ni viki.
4. Xana a Mutlhangano wa Ntiro wu ta cica kuya chikela kwihi?
4 Mutlhangano Wa Ntiro: A Mutlhangano wa Ntiro wu nga ta cica kanilezi ku ta komiswa a zipanze za wona. Hi tolovelo a zitiviso zi ta mahiwa hi ntlhanu wa timeneti. A xikhati lexi xi fanele ku enela kasi ku nyika zitiviso za lisima ni ku gonza mapapilo yo kari ya ravi. A zitiviso zo kota malulamiselo ya ntiro wa simu, milongoloko ya kubasisa, mibiko ya timali, ni mapapilo yo phindaphinda ya ravi a zi na xilaveko xo gonziwa laha xiluvelweni, kanilezi zi ta namekiwa ka kwadru ga zitiviso kasi zi gonziwa hi vamakabye. Lava va avelweko zipanze ka longoloko va fanele ku zi longisela khwatsi va tlhela va khomelela nguvu ka xikhati ni zileletelo zi nyikilweko.
5. Ku tava wihi a longoloko wa mitlhangano ya bandla nzeni ka viki ga lienzo la muwoneleli wa xipanze?
5 Lienzo La Muwoneleli Wa Xipanze: A longoloko wa viki ni viki wa muwoneleli wa xipanze wu nga ta ciciwa. Hi Mambiri ku ta fambisiwa a Xikola xa Wutireli ga Nungungulu ni Mutlhangano wa Ntiro, zi lanzelwa hi lisimu. Hi kulanzela, a muwoneleli wa xipanze i ta veka kanelo wa 30 wa timeneti. Kota lezi zi mahiswako zona zalezi ka viki ga lienzo lakwe, ku ta vekiwa a siku ginwani kasi ku maha a Xigonzo xa Biblia xa Bandla xi to lanzelwa hi lisimu ni kanelo wa ntiro wa muwoneleli wa xipanze. A mutlhangano wu ta gumesa hi lisimu ni mukhongelo.
6. Hi wihi a ntiro wa muwoneleli wa ntlawa?
6 Mitlhangano Ya Ntiro Wa Simu: A vawoneleli va mitlawa va ta yimiswa hi hubye ya madota kasi va wonelela a mitlawa ya ntiro wa simu ni ku risa a ziro za mitlawa leyo. Loku ku laveka a nanza ga wutireli lezaku gi maha ntiro lowo, gona gi fanele ku vitanwa “nanza ga ntlawa.”
7. Zini hi nga zi rinzelako ka longoloko wa hina wa wuswa wa mitlhangano ya bandla?
7 Kota lezi zi kombisilweko laha, hi tava ni xikhati xa ku ti buza hi mahungu ma gonzisako ni ku aka. Lezi zi ta hi vuna a kuva vaxumayeli ni vagonzisi vo humelela, va longiselweko a wutireli go bhinzula nguvu. — Efe. 4:13, 14; 2 Tim. 3:17.
8. Xana a ku longisela na ka ha hi mahlweni zi ta hi vunisa kuyini hina wutsumbu zinwe ni vanwani?
8 A ku longisela mitlhangano leyi na ka ha hi mahlweni zi ta hi vuna a ku yisa khwatsi kupima ka timhaka ti to dlunyatiswa nzeni ka mutlhangano munwe ni munwani. Hontlheni hi tava ni lungelo ga ku nyika mihlamulo, kasi hi tiyisana. (Rom. 1:11, 12; Maheb. 10:24) A kungo ga hina gi fanele kuva ku maha lezaku a ‘kuya mahlweni ka hina ku woneka’ hi ‘ku khoma a mhaka ya zinene hi kululama.’ — 1 Tim. 4:15; 2 Tim. 2:15, Tradução do Novo Mundo.
9. Hi kwihi a kutiyimisela ka hina, niku hikuyini?
9 Ha tsaka nguvu hi kota ya kucica loku ka hombe ka mitlhangano ya hina ya bandla. Ngha hontlheni hi lanzela a wurangeli legi a “nanza gi tsumbekileko ni go tlhariha” gi hi nyikako hi tlhela hi simama kusuhani ni Murisi wa hina wa Hombe a xikhati lexi a hi longiselako kasi ku yimisana ni “kuxaniseka” ka hombe loku ku nga kusuhani. — Mat. 24:21, 45; Maheb. 13:20, 21; Kuv. 7:14.