Wa Zi Kota Kuva Mugonzisi!
1. I lungelo muni go hlawuleka legi a vahuweleli vontlhe va Mufumo va nga nago?
1 A ginwe ga matshamela ma tsakisako nguvu wutirelini ku gonzisa munhu a zinene. A ku wona a munhu loye na a vumela a mahungu ya Mufumo ni ku mu vuna a ku tshinela ka Hosi ya Hombe wuakweni gontlhe i lungelo gi faneleko ku nyikiwa lisima. (Jak. 4:8) A ku gonzisa munhu loyi a nga ni ndlala ya zinene ni ku mu wona na a sangula ku cica a wumunhu gakwe, kucuwukeka, ni mahanyela hi ndlela yi wonekako zi fanele kuva kungo ga vahuweleli vontlhe va Mufumo. — Mat. 28:19, 20.
2. Hikuyini a vo kari va nga ha tsikako ku fambisa a xigonzo xa Biblia, niku xini xi to va vuna a ku hlula xikarato lexi?
2 Khegela Ka Jehova: Xikhatini xi hunzileko, a malanza yo tsumbeka ma wa tizwa na ma nga ringanelwi a ku tatisa xiavelo xa wona. A ku khegela ka Jehova ku vunile Mosi, Jeremia, Amosi, ni vanhu vanwani vo toloveleka a ku hlula a kukanakana kabye wutsumbu kutani kungatiyiseki zonake va tatisa a ntiro wa lisima. (Ekso. 4:10-12; Jer. 1:6, 7; Am. 7:14, 15) Mupostoli Paule yenawu i lo “tiya-hlana.” Hi ndlela muni? Yena i te ngalo, hi lo tiya hlana “ka Nungungulu wa hina.” (1 Tes. 2:2) Ina, hontlheni ha zi kota ku tsumba lezaku Jehova i ta hi nyika xivuno, wutlhari, ni ntamu lowu hi wu lavako kasi hi kota ku fambisa a zigonzo za Biblia zi pswalako mihanzu. — Isa. 41:10; 1 Kor. 1:26, 27; 1 Ped. 4:11.
3, 4. I gonziselelo muni yi nga kona kasi ku hi vuna a ku gonzisa a Mhaka ya Nungungulu?
3 Vumela Ku Gonzisiwa: A Mugonzisi wa hina wa Hombe, Jehova Nungungulu, i gonzisa hi ku tirisa a longoloko wo khanzakanya wa gonziselelo ya moya lezaku hi fela ku mbhelela kota vagonzisi. (Isa. 54:13; 2 Tim. 3:16, 17) Vumela a gonziselelo leyo hi ku lonzowota a xikhati xontlhe lezaku u engetela a kuzwisisa ka wena a Mitsalo ni ku chukwatisa a wuzikoti ga wena ga ku gonzisa a zinene za Biblia. Hambu lezi lego gi nga gona nguvunguvu a kungo ga Xikola xa Wutireli ga Nungungulu ni Mutlhangano wa Ntiro, a mitlhangano yontlhe ya bandla ya hi longisela a ku gonzisa a Mhaka ya Nungungulu.
4 Ti karatele ku gonza a tindlela to olova to gonzisa hambu zinene za moya zi etileko. A bhuku Escola do Ministério, phajina 227, ga tlhamusela: ‘U fanele ku ranga hi wena u zwisisa khwatsi a mhaka leyi u ta nga wulawula ha yona kasi u zi kota ku tlhamusela vanwani hi ndlela yo zwisiseka.’ A ku hlamula lomu mitlhanganweni zi hi vuna ku khoma a timhaka-tshinya lezaku hi ti tirisa xikhatini xi tako. Hikwalaho, ti longisele khwatsi kasi a kutiyiseka ka wena hi wuzikoti ga wena ga ku gonzisa ku kula.
5. Hi yihi gonziselelo yinwani leyi hi nga nayo lomu bandleni kasi ku hi vuna ku kula kota vagonzisi?
5 Kusanguleni, a vatireli va wuKristu handle ko kanakana va wa gonza munwe ka munwani loku va hi zinwe ntirweni wa ku maha vapizani. (Luka 10:1) Loku zi koteka, famba zinwe ni vahuweleli vo buva, a ku patsa maphayona, madota, ni vawoneleli va fambafambako, ntirweni wa ku fambisa zigonzo za Biblia. Wona lezi va yi tirisisako zona a mifananiso yo olova ni zivuno zinwani za ku gonzisa zi nga ka mabhuku ya hina ya ku fambisa hi wona a zigonzo kasi ku tlhamusela a zinene za Mitsalo. Va kombele lezaku va ku nyika a mawonela ya lezi u nga chukwatisisako zona a magonzisela ya wena. (Mav. 1:5; 27:17) Nyika lisima a gonziselelo leyo yontlhe hakuva yita hi ka Nungungulu. — 2 Kor. 3:5.
6. Xini lexi nguvunguvu xi lavekako kasi kuva mugonzisi wa Mhaka ya Nungungulu?
6 Khegela ka Jehova u tlhela u susa xivuno ka gonziselelo leyi a yi nyikako. Kombela Jehova lezaku a ku vuna ku kula kota mugonzisi. (Tis. 25:4, 5) Wenawu wa zi kota kuzwa litsako la ku vuna wo kari lezaku ava mugonzisi wa Mhaka ya Nungungulu a ku fana na wena!