U nga ti vekeli mimbhingano — U nga alakanyi lezaku u nga ta zi kota
1. Hikuyini a vokari va tsikako ku sangula zigonzo za Biblia?
1 Xana wa tsika ku sangula zigonzo za Biblia hi ku nga tsumbi lezaku u ta zi kota ku zi fambisa? A malanza yo tsumbeka ya kaleloko, yo kota Mosi na Jeremia, ma wa tshuka ma tizwa na ma nga ringanelwi hi ziavelo za wona. (Ekso. 3:10, 11; 4:10; Jer. 1:4-6) Hikwalaho, a zi sanguli hi wena. Hi nga ma hlulisa kuyini a maalakanyo lawo?
2. Hikuyini hi nga faneliko ku tsakiswa hi ntiro wa ku xumayela hi muti ni muti ntsena, na hi tsikela vanwani a ntiro wa ku fambisa zigonzo za Biblia?
2 Hi fanele ku alakanya lezaku Jehova a nga tshuki a hi kombela ku maha nchumu lowu hi nga zi kotiko ku wu maha. (Tis. 103:14) Hikwalaho, a ntiro lowu hi nyikilweko wa ku “maha vapizani,” hi ku “va gonzisa,” a hi wo kala hi nga wu koti. (Mat. 28:19, 20) Jehova i nyika hontlheni a lungelo legi, a nga nyiki ntsena lava vo tlhariha nguvu xikari ka hina. (1 Kor. 1:26, 27) Hikwalaho, a hi faneli ku tsakiswa hi ntiro wa ku xumayela hi muti ni muti ntsena, hi tsikela vanwani a ntiro wa ku fambisa zigonzo za Biblia.
3. Jehova i hi hlomisisa kuyini lezaku hi ringanelwa hi ntiro wa ku gonzisa a Biblia?
3 Jehova wa hi maha hi ringanelwa: Jehova hi yena a hi mahako hi ringanelwa hi ku maha vapizani. (2 Kor. 3:5) I tirisa hlengeletano yakwe lezaku a hi gonzisa lisine la Biblia leli hambu vanhu va gonzileko nguvu va nga li tiviko. (1 Kor. 2:7, 8) I tsalisile a tlhatlhambutelo wa magonzisela ya Mugonzisi wa Hombe, Jesu, kasi hi ma pimanyisa, niku wa hi nyika gonziselelo yo khanzakanya hi ku tirisa a bandla. Tlhatakumbiri, Jehova a nga hi tsikeli ntiro aku hi fanele ku ti lavela hi hoce a zilo za ku gonzisa hi zona. I hi nyika zitiro zo kota a bhuku A Biblia Gi Gonzisako, legi gi tlhamuselako a lisine hi ndlela yo zwala ni yo olova ku yi zwisisa. A ku fambisa xigonzo xa Biblia zi nga olova nguvu ku hunza lezi hi zi alakanyako.
4. Hikuyini hi zi kotako ku tsumba lezaku Jehova i ta hi vuna?
4 Mosi na Jeremia va zi kotile ku tatisa ziavelo zabye hi ku vuniwa hi Jehova. (Ekso. 4:11, 12; Jer. 1:7, 8) Hinawu ha zi kota ku kombela Jehova lezaku a hi vuna. A ku hunza lezo, a xikhati lexi hi fambisako zigonzo za Biblia, ho gonzisa vanhu a lisine xungetano hi Jehova, lezi zi nga zilo zi tsakisako Nungungulu. (1 Joh. 3:22) Hikwalaho, ngha hi ti karatela ku hlengela ntirweni wa ku fambisa zigonzo za Biblia, wu nga wona a xipanze xo tsakisa nguvu ni xo bhinzula nguvu xa wutireli ga hina.