Ti Longisele Khwatsi Lezaku U Alakanya A Kufa Ka Jesu

Litsako la kuyini ni lungelo ka valanzeli va Kristu a ku ti longisela khwatsi lezaku vava kona ka wusiku ga ku alakanya a kufa ka Jesu Kristu! (Luka 22:19) Hi zihi a zilo zo kongoma lezi hi faneleko ku maha kasi hi ti longisela lezaku hi alakanya a kufa ka Jesu?

◼ Xikhati ni Wutshamu: Vontlhe va fanele ku tiva khwatsi a xikhati ni wutshamu legi a Xialakanyiso xi ta nga mahelwa ka gona. Loku ku hi lezaku a Salawu ya Mufumo yi ta tirisiwa hi mabandla mambiri kutani ku hunza, za lisima a kuva hi chikela hi xikhati hi tlhela hi huma hi ndlela yi nene, kota lezi a xikhati xi salako xikari ka mitlhangano xi nga xi tsongwani. Ku fanele ku mahiwa mizamo ya ku potsa a kutlimbana ka vanhu ko kala xigelo laha nyangweni, matlhelweni ya ruwa legi gi hunzako hi laha Salawu, ni laha ku vekiwako mimova.

◼ Zirambo: Xana a vahuweleli vontlhe va na ni zirambo zo enela, niku xana va zi gonzile? Xana u vuxetile lezi u to nyikelisa zona a xirambo? Himani u to mu nyika a xirambo? Ku fanele ku mahiwa mizamo ya lezaku a zirambo zontlhe zi nyikelwa.

◼ Mafambela: A vatsakeli vo kari zinwe ni vamakabye vo hlaya va nga ha lava xo famba hi xona kutani xivuno xinwani. Malulamiselo muni ma mahiwako kasi ku khatalela a zilaveko zabye?

◼ Zikombiso: Tiyisekani lezaku a zikombiso zi nga hunziswi a gambo na gi nga se pela. Ku fanele ku mahiwa malulamiselo ya ku yisa a zikombiso ka a totilweko munwe ni munwani loyi a tsanzekako kuva kona hi kota ya mababyi. Ku fanele ku kumiwa a lixaka leli li faneleko la xibaba ni vinya zi tlhela zi longiselwa na ka ha hi ni xikhati. — Wona A Sentinela ga 15 ka Fevereiro wa 2003, phajina 14-15, tinzimana 14, 17.

◼ Salawu ya Mufumo: A salawu yi fanele ku basiswa khwatsi na ka ha hi mahlweni. Ngha a mingelo, tikopo, ni meza zinwe ni nguwo ya meza zi faneleko zi nehiwa laha salawu zi tlhela zi vekiwa wutshanwini ga zona na ka ha hi ni xikhati. Loku ku hi lezaku a Xialakanyiso xi ta mahelwa ka wutshamu ginwani, tiyisekani lezaku ku tava ni michini yi faneleko ya pfumawulo kasi vontlhe va ta ngava kona va zi kota kuzwa a mukaneli. A vakombeteli zinwe ni lava va ta nga hunzisa a zikombiso va fanele ku hlawuliwa va tlhela va gonzisiwa na ka ha hi mahlweni xungetano hi mitiro yabye, mamahela ma faneleko lawa va ta nga ma lanzela, ni xilaveko xa ku ambala ni ku ti sasekisa hi ndlela yi faneleko.

Ka ximaho lexi xa lisima nguvu, xi nga Xialakanyiso xa kufa ka Jesu Kristu, hi lava ku ti longisela khwatsi hi munwe munwe ni hi bandla. Hakunene, a makatekwa ya Jehova ma tava hehla ka vontlhe lava va tsakelako hi mbilu yontlhe zontlhe lezi Jehova a zi mahelako vanhu hi ku tirisa a muphahlo wa N’wana wakwe a ranzekako, Jesu Kristu.