Ndlela Yo Tirisa A Bhuku ‘Liranzo La Nungungulu’ Kasi Ku Fambisa A Zigonzo Za Biblia
1. Hi gihi a kungo ga bhuku ‘Liranzo La Nungungulu’?
1 A hi kutsaka ka hombe loku hi vileko nako ka Gotsovanyano wa Muganga “Hi Rangelwa Hi Moya Wa Nungungulu” hi lezi hi nga amukela a bhuku giswa ‘Tshamani Liranzweni La Nungungulu’! Kota lezi zi tivisilweko, a bhuku legi gi mahelwe a ku hi vuna a ku tiva ni ku ranza a milayo ya Jehova ya mahanyela na ku nga hi ku gonzisa a tigonzo ta Biblia ta xiseketelo. Hi nga ta nyikela a bhuku legi hi muti-ni-muti.
2. Xana a bhuku legi gi ta tirisiswa kuyini, niku na mani?
2 A bhuku legi gi ta tira kota bhuku ga wumbiri gi to gonziwa ni zigonzani za Biblia anzhako ka ku mbheta a bhuku A Biblia Gi Gonzisako. Tshama na u zi tiva lezaku a vanhu a va kombisi kukula ka moya hi ndlela yo fana. A xigonzo xinwe ni xinwani xi fanele ku fambisiwa maringano ni wuzikoti ga xigonzani. Maha zontlhe kasi a timhaka leti ti gonziwako ti zwisisiwa hi kudlunyateka. A kutala ka zikhati, a bhuku legi a gi faneli ku tirisiwa kasi ku sangula a zigonzo za Biblia ni vanhu lava va sinako va gonzile a mabhuku yo hlaya xikhatini xi hunzileko kanilezi na va ngayi mitlhanganweni ya bandla na zi dlunyateka lezaku a va zi lavi a ku zwananisa a wutomi gabye ni zinene za Biblia lezi va gonzisilweko.
3. Zini hi faneleko ku maha loku ku hi lezaku ka xikhati lexi hi fambisa a xigonzo hi bhuku Khozela Nungungulu?
3 Loku ku hi lezaku ka xikhati lexi u fambisa a xigonzo hi bhuku Khozela Nungungulu na u hi ka zipimo zo gumesa, u nga ha boha a ku mbhetisa a bhuku lego u tlhela u kuca a xigonzani lezaku xi lera a bhuku ‘Liranzo La Nungungulu’ xoce. Loku zi nga hi tano, zi ngava chukwana a ku cica mu gonza a bhuku legi ga giswa kusukela kusanguleni. A ku fana ni lezi hi zi mahako ka bhuku A Biblia Gi Gonzisako, a ku kambisisa a timhaka ta xiengetelo ku mahiwa loku zi laveka.
4. Hi fanele ku maha yini loku a xigonzani xa hina xi bapatizwa na xi nga se mbheta a mabhuku A Biblia Gi Gonzisako ni ‘Liranzo La Nungungulu’?
4 Loku a xigonzani xi bapatizwa na xi nga se mbheta a mabhuku lawa ya mambiri, a xigonzo xi fanele ku simama kala mu mbheta a bhuku ‘Liranzo La Nungungulu.’ Hambu loku a xigonzani xi bapatizilwe, u nga ha bika a xikhati, lienzo la kuwuyela, ni xigonzo. A muhuweleli loyi a nga zinwe na wena na a hlengela xigonzweni yenawu a nga ha hlaya a xikhati lexo.
5. Xana gi nga tirisiswa kuyini a bhuku ‘Liranzo La Nungungulu’ kasi ku vuna a vahuweleli lava va nga ha hlengeliko wutirelini hi xikhati xo kari?
5 Loku a xiro xo kari xa Kometi ya Ntiro ya Bandla xi ku kombela lezaku u fambisela a xigonzo xa Biblia a munhu loyi a holileko ntirweni wa kuxumayela, u nga ha byeliwa lezaku u kambisisa a zipimo zo kari ka bhuku ‘Liranzo La Nungungulu.’ A ku na xilaveko xa ku fambisa a zigonzo lezo hi xikhati xo leha nguvu. A hi kusaseka ka xinyikiwo hi nga naxo xa bhuku legi ga giswa, legi gi mahelweko a ku hi vuna a ku tshama “liranzweni la Nungungulu”! — Juda 21.