Kwadru Ga Ziwutiso

◼ Hi wahi a mabhuku mambiri lawa ma faneleko ku gonziwa ni zigonzani za hina za Biblia?

A bhuku A Biblia Gi Gonzisako hi gona xitiro-tshinya xa hina kusanguleni ni kufambiseni ka zigonzo za Biblia. Hambu lezi zi kalako zi nga bihangi a ku tirisa bhuku ginwani, kutani xitlukana xinwani xi faneleko lezaku ku sangulwa a xigonzo xa Biblia, ku fanele ku mahiwa mizamo ya ku zi cica hi xihatla hi laha zi kotekako ha kona kasi ku gonziwa a bhuku A Biblia Gi Gonzisako. Ku na ni mabhinzu yo hlamalisa ma kumiwako hi ku tirisa a bhuku A Biblia Gi Gonzisako kusanguleni ka zigonzo za Biblia.

Hi xikhati xalexo ku mbhetiwako ku gonziwa a bhuku A Biblia Gi Gonzisako na xigonzani xi kari xiya mahlweni, a bhuku Khozela Nungungulu gi fanele ku gonziwa hi kulanzela. (Kol. 2:7) A phajina 2 gi tlhamusela a kungo ga bhuku lego hi ndlela leyi: “A Biblia gi kuca vontlhe lava va ranzako Nungungulu lezaku va ‘pima . . . [a] kuleha ni kueta’ ka zinene zakwe za lisima. (Va Le Efesusi 3:18) A bhuku legi gi longiselelwe lezo. Hi rinzela lezaku gona gi ta ku vuna a ku kula hi tlhelo ga moya ni lezaku u longiselelwa khwatsi a ku famba ndleleni yo hlongana leyi yi yisako wutomini ka misava yiswa yo lulama ya Nungungulu.”

Loku a xigonzani xi ringanelwa hi kubapatizwa na xi nga se mbheta wontlhe mabhuku ya mambiri, a xigonzo xi fanele ku simama kala ku mbhetiwa a bhuku ga wumbiri hambu loku a xigonzani xa Biblia xi bapatizilwe. A mufambisi wa xigonzo i fanele ku simama a hlaya xikhati, maenzo yo wuyela, ni xigonzo xa Biblia. A muhuweleli loyi a fambako ni nwinyi wa xigonzo yenawu a nga ha hlaya xikhati lexo.