A Wutireli Ga Hina Xikombiso Xa Liranzo La Hina Hi Nungungulu
1. Xana a ku ranza Jehova ku kucile Jesu a ku maha yini?
1 A liranzo hi lona li nga kuca Jesu lezaku a tatisa a wutireli gakwe. Zontlhe lezi Jesu a nga zi maha wutirelini gakwe zi nyika wukustumunyu go dlunyateka ga liranzo lakwe hi Jehova. Jesu i te ngalo: “Kasi tiko gi fela ku zi tiva lezaku nza mu ranza Dadani, ni lezaku nzi maha lezi Dadani a nzi layileko.” (Joh. 14:31) Kota valanzeli va nkonzo wa Jesu, hinawu hi na ni lungelo ga ku kombisa a liranzo la hina lo eta hi Jehova wutirelini ga hina. — Mat. 22:37; Efe. 5:1, 2.
2. Xana a kuranza Jehova ku khumbisa kuyini a wutireli ga hina?
2 ‘A Vito Ga Wena A Gi Basiswe’: Loku hi hisekela ku lonzowota a lungelo gihi ni gihi lezaku hi bhula ni vanwani xungetano hi Jehova ni malulamiselo yakwe ya Mufumo, hi kombisa a liranzo la hina hi Nungungulu, niku hi ku maha lezo, hi hlengela kubasiseni ka vito gakwe. (Tis. 83:18; Ezek. 36:23; Mat. 6:9, Tradução do Novo Mundo) A ku fana ni wutireli ga Jesu, a wutireli ga hina xikombiso xa simasima xa kuxuva ka hina lezaku a vito ga Jehova gi basiswa ni kuranza kakwe ku maheka. — Mat. 26:39.
3. Xana a liranzo la hina hi Jehova li hi vunisa kuyini a ku hlula zikarato?
3 A Liranzo Li Hi Vuna A Ku Hlula Zikarato: A ku ranza Jehova ku hlula a zihingakanyiso zontlhe. (1 Kor. 13:4, 7) Jesu i yimisene ni ziyimo zo hlaya wutomini lezi zi nga wa ta ngha zi mu tsimbeketile a ku tatisa wutireli gakwe. Hambulezo, loku a kumene ni zikarato, a liranzo lakwe lo eta ni kuxuva kakwe a ku maha a kuranza ka Jehova zi mu nyikile ntamu wa ku hlula. (Mar. 3:21; 1 Ped. 2:18-23) Hinawu hi yimisana ni zikarato zo tala lezi a liranzo la hina hi Nungungulu li zi kotako ku hi vuna a ku zi hlula. Hi ku khomelela khwatsi ka xikombiso xi nyikilweko hi Kristu, hi nga zi kota a ku tatisa wutireli ga hina na hi hi ni kutsumba, na hi nga nyimiswi hi nchumu. Hambu lezi a kukanetwa hi ziro za ngango, mababyi, kukhosahala, kutani kungakhatali ka vanhu laha va yileko zi nga hi khumbako, a zilo lezo a zi hi nyimisi a ku kombisa a liranzo la hina ha Jehova hi ku tatisa khwatsi a wutireli ga hina, hi laha zi kotekako ha kona.
4. I lungelo muni legi a liranzo la hina hi Jehova li hi nyikako?
4 A liranzo li na ni ntamu, niku hi katekile hi kuva ni wuzikoti ga ku kombisa a liranzo la hina la mbilu yontlhe hi Nungungulu wutirelini ga hina. (1 Kor. 13:13) Laha xi tshinelako hi kuhatlisa a xikhati lexi a vito ga Jehova gi ta nga basiselwa magumo, hi khongelela lezaku ‘a liranzo la hina li fela ku anziswa nguvu.’ — Fil. 1:9; Mat. 22:36-38.