Ti Karatele Ku Xumayela A Vavanuna
1. Xilaveko muni xa xihatla xi nga kona kukhataleleni ka zilo za Mufumo?
1 Laha a ntiro wa Mufumo wu yako wu anza masikwini lawa yo gumesa, ku na ni xilaveko xa xihatla xa vavanuna va buvileko hi tlhelo ga moya lezaku va wu rangela. (Mar. 4:30-32; Miti. 20:28; 1 Tim. 3:1-13) Hambulezo, a ka zipanze zo kari a vavanuna lava va vumelako a mahungu ya Mufumo vatsongwani. Ka midawuko yo kari, a vavanuna va tsikela a vasati vabye a wutihlamuleli ga zilo za moya kutani ku gonzisa a vana vabye a zilo zi fambelanako ni wukhongeli. Xana hi nga va kucisa kuyini a vavanuna vo tala lezaku va chela kota hi xilaveko xabye xa moya va tlhela va patsana na hina wukhozelini ga lisine?
2. Give gihi a wuyelo gi nene ga kutikarata ka Paule na Pedro a ku xumayela a vavanuna?
2 Lavetela A Vavanuna: Loku a wanuna a amukela zinene, hi tolovelo i kucetela vanwani laha ngangweni lezaku va patsana naye wukhozelini gi basileko. Hi xikombiso, a xikhati lexi va nga hi paxweni hi kota ya kuxumayela, Paule na Silasi va lo nyika wukustumunyu a murinzeli wa paxo. A wanuna loye zinwe ni ngango wakwe wontlhe va lo bapatizwa. (Miti. 16:25-34) Kota wuyelo ga kuxumayela ka Paule le Korinte, “Krispusi a nga hi murangeli wa sinagoga i lo kholwa ka Hosi, zinwe ni yindlu yakwe yontlhe.” (Miti. 18:8) Pedro i lo tiriswa hi Jehova lezaku a nyika wukustumunyu ka Korneliu, loyi a nga hi nduna ya butho a tlhamuselwako kota “munhu a pinyamileko kukhongeleni, loyi a nga chava Nungungulu.” Korneliu, zinwe ni maxaka yakwe ni vanghana vakwe va hombe, i lo bapatizwa. — Miti. 10:1-48.
3. Hi ku pimanyisa Filipu, hi vamani a “vafumeli” lava u zi kotako a ku va nyika wukustumunyu?
3 A kuxumayela a vavanuna va nga “vafumeli” ku nga maha lezaku a mahungu yo saseka ma chikelela a vanhu lava zi nga wa ta hi karatela hi tindlela tinwani. (1 Tim. 2:1, 2) Hi xikombiso, a ngelosi ya Jehova yi lo khongotela Filipu lezaku a wulawula ni “nduna ya hombe” leyi yi nga wonelela a titshomba tontlhe ta muzinza wa vaEtiopia. Filipu i lozwa a wanuna loye na a “gonza bhuku ga muprofeti Isaya” zonake a mu tlhamusela a mahungu yo saseka xungetano hi Jesu. A muEtiopia loye i lo maha mupizani niku kuzilava i hangalasile a mahungu yo saseka ndleleni ya kuya kaya. Za koteka kambe ku ngha a nyikile wukustumunyu ka muzinza ni ka lava va nga tira laha wuhosini, ku nga vanhu lava zi nga wa ta ngha zi karatile nguvu lezaku vazwa a mahungu yo saseka hi tindlela tinwani. — Miti. 8:26-39.
4. Xana hi nga nyikisa kuyini a vavanuna a malungelo yo engeteleka ya lezaku vazwa a mahungu yo saseka?
4 Bhulisana Ni Vavanuna Vo Tala: Kota lezi hi tolovelo a vavanuna va nga mitirweni yabye ni hlikanhi, xana u nga zi kota a ku cica a longoloko wa wena lezaku u mbheta xikhati xo engeteleka wutirelini ni gambo, kumbheleni ka viki, kutani hi tiferiado? A ku tira hi kukhanzakanya lomu mabazarini ni lomu zitolo zi ta ku nyika a malungelo yo engeteleka ya ku nyika wukustumunyu ka vavanuna lava zi karatako a ku va kuma kaya. A vamakabye va xinuna va zi kota kambe a ku maha mizamo yo hlawuleka ya ku xumayela hi xitshuketi a vatiri-kulobye va xinuna. Wutirelini ga muti-ni-muti, nguvunguvu xipanzeni xi tiriwako hi kukhanzakanya, ka zikhati zo kari a vamakabye va xinuna va nga ha kombela a ku wulawula ni hloko ya ngango.
5. Xini a faneleko ku maha a makabye wa xisati loku a kuma a wanuna a tsakelako a mahungu ya Mufumo?
5 Loku a makabye wa xisati a kuma wanuna a tsakelako zinene, a nga faneli ku mu tlhelela na a hi yece. I fanele ku famba ni nuna wakwe kutani muhuweleli munwani. A xikhati lexi a munhu loye wa mutsakeli a yako mahlweni a gonza, i chukwana a ku cica xigonzo lezaku xiva xa makabye wa xinuna a buvileko.
6. Hi nga mu pimanyisisa kuyini mupostoli Paule kasi ku “kuma vanyingi”?
6 Hlawula Timhaka Ti Tsakisako A Vavanuna: Mupostoli Paule i wa chela kota hi vaingiseli vakwe a tlhela a zwananisa a timhaka takwe kasi a fela ku “kuma vanyingi.” (1 Kor. 9:19-23) Hi kufanana, hi fanele ku tiva a timhaka leti ti talako ku tsakisa a vavanuna lava hi nga ha kumanako navo, hi tlhela hi longisela tona. Hi xikombiso, a vavanuna va tolovela ku khatala nguvu hi zikarato za timali, mufumo wu nene, ni ndlela yo wonelela a kutshamiseka ka mingango yabye. Va nga ha khatala kambe hi kungo ga wutomi, wumanziko ga misava, niku hikuyini Nungungulu a vumelelako a kuxaniseka. A mahungu ya hina ya Mufumo ma ta amukelwa khwatsi loku hi kombisa wutlhari lego zinghenisweni za hina. — Mav. 16:23.
7. Xana a bandla gontlhe gi ngava kucetelo wu nene ka vanuna va nga hiko makholwa lava va tako mitlhanganweni hi ndlela muni?
7 Ti Karatele Ku Vuna A Vanuna Va Nga Hiko Makholwa: Hambu lezi a mahanyela ma nene ya vamakabye va hina va xisati va maKristu ma tolovelako kuva kucetelo wa ntamu nguvu ka vanuna vabye va nga kholwiko, a ziro za bandla zonawu zi ngava ni kucetelo wu nene. (1 Ped. 3:1-4) Loku a munghana wa wukati a nga hiko mukholwa ata zinwe ni sati wakwe mitlhanganweni, a kuamukelwa hi matsenya loku a ku kumako laha bandleni ku tava wukustumunyu ga ntamu. A kuta kakwe laha mitlhanganweni ku komba lezaku i na ni kutsakela ko kari hi zinene, niku a nga ha vumela a xigonzo xa Biblia.
8. Xana a vamakabye va xinuna va nga ti karatelisa kuyini a ku vuna a vanuna va nga hiko makholwa lava va kombisileko a kutsakela ko kari hi zinene?
8 Hi tlhelo ginwani, a vanuna vo kari va kombisa a kutsakela kutsongwani hi zilo za moya ka masiku yo ranga kanilezi hi kugumesa va nga ha vumela ku bhula hi Biblia ni makabye loyi va ti zwako na va tlhatlhekile naye. A vamakabye va xinuna ka bandla go kari va mahile mizamo yo hlawuleka ka masiku lawa va nga tshuka va enzela a ngango wu nga hambanile hi tlhelo ga wukhongeli kasi ku bhulisana ni nuna a nga kholwiko xungetano hi zilo va nga mu tiva na a khatala hi zona. Lezo zi gumesile hi ku va yisa ka mabhulo ya moya, niku zalezi i bapatizilwe. Ka ginwani tshango, a makabye wa xinuna i lo vuna a nuna wo kari wa munghana a ku aka a libhiyo la muti wakwe. Hi ku kombisa a kukhatala hi ndlela leyi, ku sangulilwe a xigonzo xa Biblia. (Gal. 6:10; Fil. 2:4) Loku u hi makabye wa xinuna wa muKristu, hikuyini u nga tshineleliko a munwe kutani a vanuna vo tala va nga hiko makholwa?
9. I wuyelo muni gi nga kumiwako hi ku gonzisa a vavanuna va maKristu?
9 Va Gonziseni Lezaku Vava Xivuno Xikhatini Xi Tako: A vavanuna lava va amukelako a mahungu ya Mufumo va tlhela va ti karatela ku chikelela a malungelo ntirweni wa Jehova va nga ha gumesa hi kuva “zinyikiwo ka vanhu,” ku nga madota ya maKristu lawa ma tirisako a wuzikoti ni ntamu wa wona kasi ku vuna a bandla ga vanhu va Jehova. (Efe. 4:8; Tis. 68:18) A vavanuna lavo va risa a bandla hi kuziranza ni matsenya. (1 Ped. 5:2, 3) Vona wutsumbu makatekwa ya hombe nguvu ka hlengeletano yontlhe ya vamakabye.
10. Xana a mizamo ya Ananiasi ya ku vuna Paule yi vunisile kuyini a vanhu vo tala?
10 Hi xikombiso, Saule i lo maha “mupostoli wa vamatiko,” hambu lezi a nga vile muxanisi wa maKristu. (Rom. 11:13) Mupizani Ananiasi i sangulile hi ku kanakana a ku ya xumayela Saule hi kota ya lezo. Hambulezo, Ananiasi i lanzele a wurangeli ga Hosi zonake aya wulawula ni munhu loyi a gumesileko hi kuva mupostoli Paule. Hi kufamba ka malembe, a wutireli ga Paule gi vunile a vanhu va makume ya mazana lava va mu zwileko na a xumayela zinwe ni vanhu va timiliyoni lava va simamako ku vuneka hi mapapilo yakwe ma pimisilweko, ma tsalilweko ka Mhaka Ya Nungungulu. — Miti. 9:3-19; 2 Tim. 3:16, 17.
11. Hikuyini hi faneleko ku chukwatisa zontlhe zi lavekako kasi hi nyika wukustumunyu a vavanuna?
11 Hikwalaho, a hi chukwatiseni zontlhe lezi zi lavekako kasi hi kota ku nyika wukustumunyu a vavanuna. Loku hi ti karatela ku tatisa a kungo lego, ha tiyiseka lezaku Jehova i ta katekisa a mizamo ya hina ya ku maha a kuranza kakwe ni ku khatalela khwatsi a zilaveko za Mufumo.