Xana U Nga Mu Vunisa Kuyini A Munghana Wa Wukati A Nga Kholwiko?
1. Hikuyini a maKristu ma hanyako mingangweni leyi yi hambeneko hi tlhelo ga wukhongeli ma nga hiko wona woce ma tsakelako ku vuna a vanghana vabye va wukati lezaku va vumela a zinene?
1 Xana ku na ni vahuweleli vo kari bandleni ga nwina va nga ni vanuna kutani vasati va nga kholwiko? Loku zi hi tano, handle ko kanakana a vahuweleli lavo va xuva lezaku a vanghana vabye va wukati vava zinwe navo wukhozelini ga lisine. Kanilezi a hi vona voce va xuvako lezo. A ku fana na Nungungulu, a bandla gontlhe gi xuva lezaku a “vanhu vontlhe va hanyiswa, vava ni kutiva ka zinene.” (1 Tim. 2:4) Xana hi nga va vunisa kuyini a vanghana lavo va wukati va vahuweleli lomu bandleni ga hina?
2. Xana hi nga gi tirisisa kuyini wutlhari kuvuneni ka munghana wa wukati a nga kholwiko?
2 A xo ranga, hi fanele ku ti karatela ku wona zilo hi mawonela ya loyi a nga kholwiko. A kutala ka vanghana va wukati va nga kholwiko va ranza mingango yabye va tlhela va zama kuva vapswali ni vanghana va nene va wukati. Kuzilava va na ni kukholwa ko hambana ni loku ka hina. Ginwani siku va tiva zi tsongwani xungetano hi Timboni ta Jehova, loku ku nga hi lezi va nga byeliwa hi vanghana vabye va nga hiko na mahungu ya lisine kutani va hi vengako. A vokari va bayisekela a xikhati lexi a vanghana vabye va wukati va xi mbhetako wukhozelini, lexi a kale va nga xi mbheta ni mingango yabye. A wutlhari gi ta hi vuna a ku khoma loyi a nga kholwiko hi xichawo ni wunene ni ku potsa a ku karateka nguvu loku hi hi kusuhani naye. — Mav. 16:20-23.
3. Yi ngava yihi a ndlela ya chukwana ya ku koka loyi a nga kholwiko lezaku a vumela a zinene?
3 Kombisa Kukhatala: A ndlela ya chukwana ni yo ranga ya ku vuna a munghana wa wukati lezaku a vumela zinene, zimaho za hina, na ku nga hi ku bhula hi Biblia. (1 Ped. 3:1, 2) A nchumu wa lisima mhakeni leyi ku kombisa kukhatala hi yena. A vamakabye va xisati lomu bandleni va nga ha kombisa kukhatala hi sati a nga kholwiko. A vamakabye va xinuna va maha zalezo ka nuna a nga kholwiko. Hi ndlela muni?
4. Xana hi nga ku kombisisa kuyini a kukhatala ka hina?
4 Loku u nga se bhula ni munghana loye wa wukati, kuzilava u nga maha lezo anzhako ka ku wutisa a nuna kutani sati loyi a nga muKristu. U nga khunguvanyeki loku loyi a nga hiko mukholwa a nga tekeli ku ku hlamula khwatsi. A wunghana ni kukhatala ka hina hi yena ku nga ha mu maha ava ni mawonela ma nene hi Timboni ta Jehova. (Rom. 12:20) A maKristu yo kari ma buvileko ma tolovela ku ramba munhu a nga kholwiko ni ngango wakwe lezaku va ta lalela zinwe, na ma lava lezaku va tolovelana ni ku mbheta a kukanakana kontlhe loku kuzilava a nga nako. Va bhula hi lezi zi mu tsakisako, wutshanwini ga ku kurumeta lezaku a mabhulo ma talela zilweni za moya. Hi nzhako, laha loyi a nga kholwiko a ti zwako na a tlhatlhekile, kuzilava zi nga koteka a ku wulawula hi mhaka yo kari ya lomu Mitsalweni. Kuzilava a nga ha vumela kuya ka wunwe wa mitlhangano ya hina kasi ku wona lezi a sati wakwe a gonzako, nguvunguvu lezi makunu a tivako vokari lomu bandleni. Hambu loku a nga se zi lava kuzwa zinene, hakunene i fanele ku dzunziwa hi lezi a seketelako a munghana wakwe wa wukati.
5. Xana a madota ma nga mu vunisa kuyini loyi a nga kholwiko?
5 Nguvunguvu a madota ma fanele a ku ti karatela ku vuna a vanghana va wukati va nga kholwiko ni ku tshama na ma hlota tindlela ta ku va nyika wukustumunyu. A munhu a nga kholwiko loyi a nga vumeliko ku bhula hi Biblia kuzilava a nga vumela ku chavelelwa hi Mitsalo loku a hi xipitali kutani loku a yimisana ni mababyi ya hombe. Loku a ngango lowu wu hambeneko hi tlhelo ga wukhongeli wu yimisana ni zikarato zo kota kufa ka xiro xa ngango, a madota ma nga ha kombela loyi a nga kholwiko lezaku ava kona a xikhati lexi ma chavelelako ngango.
6. Hikuyini hi faneleko ku ti karatela a ku vuna munghana wa wukati a nga kholwiko?
6 Hi nga alakanya a litsako leli a muKristu wo kari bandleni ga hina a nga wa ta lizwa loku a nuna kutani sati wakwe i wo vumela zonake a nghena zineneni! A ximaho lexo xo tsakisa xi wa ta tlhela xi neha litsako la hombe ka Jehova, tingelosi ni bandla gontlhe. (Luka 15:7, 10) Hambulezo, loku loyi a nga kholwiko a nga tekeli ku vumela, hi na ni zigelo za ku simama hi tsaka hakuva a mizamo ya hina yi tsakisa Jehova, loyi ‘a nga ranziko lezaku ku lova ni munwe, kanilezi a ranzako lezaku vontlhe va hunzuluka.’ — 2 Ped. 3:9.
[Magezu yo koka kupima ka phajina 6]
A ndlela ya chukwana ni yo ranga ya ku vuna a munghana wa wukati lezaku a vumela zinene, zimaho za hina, na ku nga hi ku bhula hi Biblia