Hlota Lava Va Ringanelwako
1. Hi kombisisa kuyini a kutsakela ka hina a lungelo ga ku tira wutirelini?
1 Xikhatini xa wutireli gakwe, Jesu i lo famba mipfhuka yo leha a xumayela mahungu yo saseka ma tangalisako ka vanhu va kurula. (Isa. 61:1, 2) Kota mitsumi ni varumiwa va yimelako Kristu, hina inyamutlha hi na ni lungelo ga lisima ga ku mu pimanyisa hi ku hlota lava va ringanelwako lomu xipanzeni xa hina xontlhe na hi nga karali. — Mat. 10:11; 2 Kor. 5:20.
2. Xana a kutizwananisa ka Paule ni ziyimo ku kombisisilwe kuyini, niku yive yihi a mihanzu ya kona?
2 Ti Zwananise Ni Ziyimo: Mupostoli Paule i wa hi ni tolovelo wa ku ranga hi ku enzela a sinagoga kasi ku xumayela a vaJuda ni vaproselita. (Miti. 14:1) Le Filipi, yena na Silasi va lo lavetela a vanhu laha va nga alakanya lezaku ‘ku wa hi ni wutshamu ga kukhongela.’ Va lo sangula ku xumayela a ntlawa wa vavasati, zonake a munwe wabye, a nga hi Lidia, i lo tekela ku vumela a zinene. — Miti. 16:12-15.
3. Hi wahi a malungelo manwani ya ntiro lawa hi nga ha vako nawo ahandle ka xipanze lexi hi xi tirako hi muti-ni-muti?
3 Ahandle ka ku tira ntsena hi muti-ni-muti lomu xipanzeni xa nwina, xana u nga zi kota a ku xumayela a vanhu lava va kumekako lomu ku nyimelwako mimova, maparki, tihofisa, mahanzakanya ya maruwa, mabazari, ni lomu zitolo za hombe zi nga xipanzeni xa nwina? Kuzilava wa zi kota ku nyika wukustumunyu ka lava va hanyako lomu mitini leyi ku nga vumelelwiko ku nghena a munhu wihi ni wihi hi ku tirisa a mapapilo kutani telefone. A ku tiva ku cuwuka khwatsi a ziyimo zo hambanahambana ni ku ti zwananisa nazo lomu xipanzeni xa nwina zi ta ku vuna a ku “anza mitirweni ya Hosi.” — 1 Kor. 15:58.
4. Hi tihi a tindlela tinwani leti hi nga ha ti tirisako wutirelini loku a bandla ga hina gi hi ni xipanze xi tsongwani?
4 A vahuweleli vo tala va vile ni lungelo ga ku engetela a wutireli gabye hi ku rura vaya ka bandla ginwani ku ngava tikweni gabye kutani matiko-wundle. A vanwani va gonza a lirimi liswa kasi ku xumayela vanhu va tako hi ka tiko ginwani.
5. Xana hi fanele kuva ni mawonela muni xungetano hi xikhati lexi hi hanyako ka xona, niku hi fanele ku ti yimisela ku maha yini?
5 Hontlheni hi fanele ku tiva lezaku “a simu hi tiko.” (Mat. 9:37; 13:38) Hi kota ya kutshinela ka kugumesa ka mafambisela lawa ya kubiha ya zilo, a munwe ni munwani i fanele ku ehleketa khwatsi hi xiyimo xakwe, wuzikoti, malungelo, ni tindlela ta ku engetela a wutireli gakwe. Jehova i hi nyika xitiyisekiso xa lezaku loku hi rangisa a zilaveko za Mufumo, yena i ta katekisa a mizamo ya ku engetela a wutireli ga hina. — Mat. 6:33.